Rigjenerimi vizual i McCann dhe porosia e tij
Ne, dhe gjithë rrjeti botëror i agjencive McCann nëpër botë, jemi duke kaluar një periudhë entuziasmuese tranzicioni drejt një identiteti vizual të ri. Për një grup njerëzish si ky i yni, të ndjeshëm ndaj mesazhit që sjellin linjat e tipografisë, ngjyrat apo edhe hapësira negative, ky rigjenerim vizual ndikon përtej logos apo kartëvizitave.
Siç mund ta keni vënë re edhe nga faqja jonë në Facebook, identiteti i ri global i McCann është minimalist, elegant, novator. Është një prezantim i natyrës sonë. Gjithashtu, është mishërimi vizual i një porosie frymëzuese nga mendjet mbas këtij ndryshimi.
Kjo është pikënisja e këtij identiteti të ri. Bashkë me një ndjesi të re rreth markës McCann, sjell një porosi, që si ne por ashtu edhe klientët dhe bashkëpunëtorët tanë e ndjekim përtej punës në agjenci.
Të kuptosh të kaluarën tënde është pikënisja drejt një të ardhmeje të shkëlqyer. Kjo porosi vlen direkt për stafin e McCann Tirana, që në punët tona për klientët tanë të reflektojmë historinë e agjencisë me krijime legjendare për emra si MasterCard apo Coca-Cola. Ajo vlen sidomos për bizneset, që duan të ndërtojnë marrëdhënie të forta me klientët e tyre. Vlen gjithashtu edhe per çdo njeri në rrafshin personal.
Sot, ne kemi rifreskuar kujtesën tonë rreth disa nga momenteve më krenare për McCann Tirana si qytetare e McCann Worldgroup. Pesë datat më domethënëse nga e kaluara jonë i kemi ndarë me ju edhe në faqen tonë në Facebook.
Njohja e së kaluarës për ne është rizbulim i vetvetes dhe rigjenerim. Kjo njohje në McCann Tirana vazhdon çdo ditë.
