#utpalmena

অসমৰ মাননীয় ৰাজ্যপাল মহামহিম শ্ৰীযুত লক্ষ্মণ প্ৰসাদ আচাৰ্য ডাঙৰীয়াৰ হাতৰ পৰা অসমৰ ৰাজ্যিক চলচ্চিত্ৰ বঁটাৰ #মুনিন_বৰুৱা শ্ৰেষ্ঠ সমালোচকৰ #বঁটা - ২০২১" গ্ৰহণ কৰোঁ।

কালি সন্ধিয়া শ্ৰীশ্ৰী দামোদৰদেৱ প্ৰেক্ষাগৃহত অসম চৰকাৰৰ দ্বাৰা আয়োজিত "নৱম অসম ৰাজ্যিক চলচ্চিত্ৰ বঁটা" প্ৰদান অনুষ্ঠানত ২০২০ বৰ্ষৰ এগৰাকী জুৰি হিচাপে থকাৰ বাবে "প্ৰমাণ পত্ৰ"ও গ্ৰহণ কৰোঁ।

--উৎপল মেনা

এখন ৰাজনৈতিক থ্ৰীলাৰ-- "খাকী"। সাংবাদিকৰ পৰিচালনা। সাংবাদিক অতনু ভূঞাৰ ৰূপালী গল্প। সাংবাদিক অতনু ভূঞাই দীৰ্ঘ সময় অসমৰ ৰাজনীতি দেখিছে। ৰাজনীতিক আৰু পুলিছৰ "কৰ্ম"ৰ বাস্তৱ ছবি খনো অনুভৱ কৰিছে! নিশ্চয় দেখা, বাস্তৱত অনুভৱ কৰা "ঘটনা-উপঘটনা" ৰূপালী গল্পটোৰ কাহিনী-ৰেখালৈ আহিব।

আজি মোক পৰিচালক অতনুদা ভূঞা আৰু চিনেমা খনৰ প্ৰচাৰ ডিজাইনাৰ শিৱাণু বৰাই "পোষ্টাৰ" মুকলি কৰাৰ দায়িত্ব দিলে। পৰিচালকৰ সৈতে "পোষ্টাৰ" খন মুকলি কৰাৰ পাছত মোৰ পৰা "পোষ্টাৰ" কেন্দ্ৰিক চৰ্চা বিছাৰিলে। 

ক'লো-- পোষ্টাৰ খনত স্পষ্ট হৈ আছে চিনেমা খনৰ বিষয়-বস্তু। 

--সেই সময়ত পোষ্টাৰ খন ভালদৰে চাব পৰা নাছিলোঁ। পাছত, ভালদৰে চোৱাৰ পাছত অনুভৱ কৰিলোঁ পোষ্টাৰ ডিজাইনাৰৰ (আৰু যি গৰাকীৰ চিন্তাৰে পোষ্টাৰ খন ডিজাইন কৰা হৈছে) পৰিপাটি কৰ্ম, পোষ্টাৰ খনেৰে "দৰ্শক"ৰ ওচৰলৈ "চিনেমা" খন লৈ যাব "শিল্প-শক্তি"। 

পোষ্টাৰ খনত "হাইলাইট" হৈছে-- দুখন স্থিৰচিত্ৰ। এগৰাকী ৰাজপাটত বহি থকা ৰাজনৈতিক নেতা, আনগৰাকী পুলিছ বিষয়া (আৰক্ষীৰ দল), যিয়ে নেতাৰ আসনখন বাগৰি নপৰিবলৈ ধৰি আছে। আৰু পোষ্টাৰ খনত দেখা গৈছে-- দুটা ৰাজনৈতিক দলৰ মাজত পতাকা লৈ কৰা প্ৰতিবাদ। 

ক'ব পাৰি-- পোষ্টাৰ খনে চিনেমা খনৰ বিষয়-বস্তু, কাহিনী অনুভৱৰ বাট দিছে। 

প্ৰেছ বিজ্ঞপ্তিৰ পৰা সংযোজন:

চিনেমা খনৰ প্ৰযোজনা গোষ্ঠী ABCDৰ ফালৰ পৰা জনোৱা হয় ‘খাকী’ মুক্তি দিয়া হ’ব অহা ২৭ ফেব্ৰুৱাৰীত। ৰাজনৈতিক চিনেমাখন নিৰ্বাচনৰ আগে আগে মু্ক্তি দিয়াৰ সিদ্ধান্ত লোৱা হৈছে। ‘খাকী’ৰ অন্তিম পৰ্যায়ৰ কাম বৰ্তমান মুম্বাইত চলি আছে। পৰিচালক অতনু ভূঞাই প্ৰায় ১৫ দিন ধৰি মুম্বাইত বাহৰ পাতি চিনেমাখনৰ কাৰিকৰী দিশৰ সৈতে জড়িত বিভিন্নজনৰ সৈতে আলোচনা কৰিছিল। 

বৰ্তমান ছবিৰ DI অৰ্থাৎ ডিজিটেল ইণ্টাৰমিডিয়েটত কাম চলি আছে মুম্বাইৰ বিখ্যাত প্ৰসাদ লেবৰেটৰীত। পৰিচালকৰ মতে, প্ৰথমবাৰৰ বাবে অসমীয়া চিনেমাৰ কালাৰ কাৰেকচনত অতি উচ্চমানৰ টেকন’লজি ব্যৱহাৰ কৰা হৈছে। মুম্বাইৰ প্ৰসাদ লেবৰেটৰীত ডিআইৰ কাম কৰিছে বিখ্যাত পৰিচালক কিৰণ কোটাই। ‘ৱেডনেচ ডে’, ‘দ্য মাদ্ৰাছ কাফে’ আদি চিনেমাৰ ডিআইৰ সৈতে জড়িত আছিল কিৰণ কোটা। ইয়াৰ উপৰি বলীডউৰ বহু ছবিৰ কাম কৰিছে ‘খাকী’ৰ সৈতে জড়িত কিৰণ কোটাই।

-আৱহ সংগীত আৰু অন্যান্য আনুষংগিক কামো চলি আছে মুম্বাইত। আৱহ সংগীতৰ দায়িত্ব দিয়া হৈছে বলীউডৰ জনপ্ৰিয় ডেনিয়েল বি জৰ্জক। ডেনিয়েলে ইয়াৰ পূৰ্বে বলীউডৰ জনপ্ৰিয় চিনেমা ‘আন্ধা ধূন’, ‘মেৰী খ্ৰীষ্টমাছ’, ‘জনী গাড্ডাৰ’ আদি ছবিৰ আৱহ সংগীতৰ কাম কৰিছিল। ‘আন্ধা ধূন’ৰ বাবে ডেনিয়েলে ফিল্ম ফেয়াৰৰ শ্ৰেষ্ঠ আৱহ সংগীতৰ বঁটাও পাইছিল। উল্লেখযোগ্য যে ২০২৫ বৰ্ষত এ আৰ ৰহমান আৰু ৰাম চম্পটৰ সৈতে ডেনিয়েল বি জৰ্জ শ্ৰেষ্ঠ আৱহ সংগীতৰ বাবে ফিল্ম ফেয়াৰ বঁটাৰ মনোনয়ন পাইছিল। অৱশ্যে শেষ মুহূৰ্তত এ আৰ ৰহমান আৰু ডেনিয়েল বি জৰ্জৰ পৰিৱৰ্তে আমীৰ খানৰ প্ৰযোজনাৰ ছবি ‘লাপাটা লেডীজ’ৰ পৰিচালক ৰাম চম্পটে এই বঁটা লাভ কৰিবলৈ সক্ষম হয়।

| উৎলেন্দু কাশ্যপ 

গাওঁ চাবলৈ জিলা চাহাব আহিব। শক্তিমান মৌজাদাৰৰ গাত তত নাই!  চাহাব অসন্তুষ্ট হ'ব লাগিলে-- মৌজাদাৰৰ পৰা চাহাবে মৌজি কাঢ়ি নিয়াৰ ভয়! গতিকে গাওঁবাসীক গাওঁ খনক চিকুণ কৰাৰ কথা ক'লে, হাতে-কামে লগালে। চাহাবৰ সৈতে মেমচাবো আহিব। চাহাব-মেমচাবৰ বিনোদনৰ বাবে ওস্তাদক মাতি অনালে। দায়িত্ব দিলে-- যাত্ৰা প্ৰস্তুতিৰ বাবে। সময়ত চাহাব-মেমচাবৰ সন্মুখত যাত্ৰা আৰম্ভ হয়। কিন্তু যাত্ৰাত দেখুওৱা ৰাম-সীতা-লক্ষ্মণৰ "সুখ-দুখ" ভাল নাপালে মেমচাবে! চাহাবে আদেশ দিলে মৌজাদাৰক-- মেমেচাবে আনন্দ পাব পৰাকৈ আন কিবা দেখুৱাব লাগে। গাওঁবুঢ়াই নিৰ্দেশ দিলে ওস্তাদক। তেনেতে যাত্ৰাৰ এটা চৰিত্ৰ "হনুমান" মঞ্চলৈ আহে। "হনুমান"ক মেমহাচাবে পছন্দ কৰে, হাঁহিবলৈ ধৰে। মেমহাচাবৰ হাঁহিয়ে চাহাবক সুখী কৰে; আৰু নিৰ্দেশ দিয়ে আৰু এটা হনুমান, তাৰ পাছত আৰু এটা হনুমান উলিয়াবলৈ। সময়ত হনুমানৰ সংখ্যা বাঢ়ি থাকিল-- মৌজাদাৰ, গাঁওবুঢ়াকে ধৰি গাওঁ খনৰ বাসীন্দা সকলো "হনুমান" হৈ নাচিবলৈ ধৰে। যাত্ৰাৰ কাহিনীতকৈ চাহাবৰ সন্তুষ্টিহে গাঁওবুঢ়াৰ বাবে প্ৰধান কথা! --চাহাব, মেমচাহাবক সন্তুষ্ট কৰিবলৈ গাওঁৰ সকলোৱে বান্দৰ নাচ আৰম্ভ কৰ, সম্ভৱতঃ ইমানতে শেষ হ'ব ৰূপালী গল্পটো। ৰূপালী গল্পটোৰ নাম-- "হনুমানৰ সাধু"। প্ৰবীণ হাজৰিকাৰ পৰিচালনা। "শৃংখল"ৰ পাছত পৰিচালক গৰাকীৰ দ্বিতীয় পৰিচালনা (feature film)। চিনেমা খন চিত্ৰগৃহলৈ আহিব এই বছৰটোতে।

চিনেমা খনৰ কাহিনী "ইংৰাজ কাল"ৰ। ১৯৪৭ চনৰ আগৰ। --পৰিচালক হাজৰিকাৰ ব্যখ্যা, "এই কাহিনী আজিও চলি আছে। দিল্লীৰ নেতা এগৰাকী আহিলেই আমাৰ ৰাজ্যৰ নেতাৰ গাত তত নাইকীয়া হয়! বাট-পথ চকুত লগাকৈ চিকুন কৰা হয়। চিনেমা খনৰ কাহিনীৰ গতিত চাহাবে গাওঁবুঢ়াৰ কামত (আলপৈচানত) সন্তুষ্ট হৈ কয়-- 'তোমাক আমি ৰজা বনাম'। এনে ধৰণৰ কথা আজি দিল্লীৰ নেতাৰ পৰা শুনাৰ বাবে ৰাজ্যৰ নেতা সকলে গাওঁবুঢ়াই চাহাবক তেল মৰাৰ দৰে কৰা আচৰণ আমি দেখি থকা নাই জানো! তেতিয়াৰ পৰা এতিয়ালৈ চলি থকা ৰাজনৈতিক তৈল মর্দন বা চামচামি এই চিনেমা খনত দৰ্শকে অনুভৱ কৰিব!"

চিনেমা খনৰ কাহিনী পবিত্ৰ কুমাৰ ডেকাৰ।

কাহিনী পৰিবৰ্ধন প্ৰবিণ হাজৰিকাৰ। চিত্ৰনাট্য আৰু সংলাপ পবিত্ৰ কুমাৰ ডেকা,প্ৰবিণ হাজৰিকাৰ।

 চিত্ৰনাট্য উপদেষ্টা: তৰুন শইকীয়া( বি চাৰিআলি), ৰাজীৱ কুমাৰ ফুকন। চৰিত্ৰ নিৰ্মাণ কৰিছে উপকূল বৰদলৈ, হিৰণ্য ডেকা, বিল ৰিছমণ্ড, সুৱাগমনি মহন্ত, সুস্মিতা শইকীয়া, মীনা শইকীয়া, জিতেন বৰা, দুলন বৰা, বাবুল ভাগৱতী, প্ৰকাশ বৰা, ভৱ বৰা, কুমুদ মেধী, ৰিপণ বাগিশ, অশ্ৰুমনি বৰা, ৰিয়া গোস্বামী, উৎপল কলিতা, মৌচুম বৰা আদিক লৈ। চিত্ৰগ্ৰহণ মিনাক্ষী ভাগৱতী আৰু জীতেন বড়োৰ, চাউণ্ড ডিজাইন কল্পনা গগৈ আৰু হিমন্ত কুমাৰ গগৈৰ, 

কালাৰ গ্ৰেডিং অন্তৰিপ হাজৰিকাৰ, ৰূপসজ্জা প্ৰকাশ বৰাৰ, সম্পাদনা নিৰঞ্জন গগৈৰ, সাজ-সজ্জা ৰাণী দত্ত বৰুৱাৰ। জেউতী প্ৰডাকচনৰ বেনাৰত চিনেমা খন প্ৰযোজনা কৰিছে মৃণাল বিন কুতুবে।

প্ৰযোজনা নিয়ন্ত্ৰন: পৰমা হাজৰিক। পৰিচালনা সহকাৰী- ইন্দ্ৰ দাস, মানৱ গগৈ।

"মঙহ্"-- চালোঁ। ৰচনা-পৰিচালনা সীমান্ত শর্মাৰ। সুৰজিৎ একাডেমীৰ উদ্যোগত শ্ৰীমন্ত শঙ্কৰদেৱ কলাক্ষেত্ৰৰ ড° বানীকান্ত কাকতি প্ৰেক্ষাগৃহত মঞ্চস্থ নাটক খনৰ বিষয়-বস্তু-- নাৰী। নাৰী নিৰ্যাতন! নাৰী শক্তি! বিষয়-বস্তু নিৰ্মাণৰ বাবে নাট্যকাৰে জন্মৰ পাছতেই, জন্মদাত্ৰীয়ে বা আন কোনোৱে পেলাই থৈ যোৱা "জীৱন্ত মঙহ্‌" (দেৱশিশু) প্ৰসংগ আনিছে। আনিছে ঘৰুৱা নিৰ্যাতনৰ বলি হোৱা কিশোৰ প্ৰসংগ। "জন্মৰ পাছতেই পথৰ দাঁতিত পেলাই যাবলৈ কিয় জন্মদিয়ে আমাক!" --এনে ধৰণৰ সংলাপেৰে গতি লয় নাটক খনৰ কাহিনী-ৰেখাই। কাহিনী-ৰেখাৰ মূল বিন্দু-- আই। নাম:শেৱালী। চৰিত্ৰটোত অভিনয় কৰিছে কৰিস্মিতা তালুকদাৰে। সন্দেহ নৰখাকৈ ক'ব পাৰি-- কৰিস্মিতাৰ অভিনয় নাটক খনৰ প্ৰধান সৌন্দৰ্য। অতীত-চাৰণেৰে দেখুৱাই শেৱালী ধৰ্ষণৰ বলি হয়, শেৱালীৰ প্ৰেমিকক হত্যা কৰায় নাটক খনৰ কাহিনীৰ খলনায়ক বংশীধৰে (অভিনয় কৰিছে ধ্ৰুৱজ্যোতি কলিতাই)। কাহিনীৰ গতিত স্পষ্ট হয় বংশীধৰে কাম কৰে ৰাজনীতিৰ ক্ষেত্ৰ খনত আগবাঢ়িব খোজা হিমাদ্রী হাজৰিকাৰ (আভিনয় কৰিছে জেছমিনা হুছেইনই।) পক্ষত থাকি। আনফালে কৰৱী (কৃষ্টি ৰাজবংশী), পদুমী (পলক কৈৰি), মিতু (লিয়ানা দেৱ), ৰিতু (কৌস্তভ চৌধুৰী),

ৰন্টু (অংশুমান দাস) আদি অনাথ শিশু কিশোৰক জীৱনৰ বাট দেখুৱাই শেৱলীৰ পৰা সমাজত আইৰ পৰিচয় পোৱা শেৱালী হিমাদ্রী হাজৰিকাৰ বাটৰ কাইট হৈ পৰে। মানুহৰ হিটৰ বাবে, সমাজৰ বাবে কাম কৰি জনপ্ৰিয় হোৱা শেৱালীক বংশীধৰৰ হতুৱাই আঁতৰাবলৈ ফাং পাতে।

--নাট্যকাৰ, পৰিচালকে (নাটকৰ কাহিনী-ৰেখাৰ শেষত) শেৱালীক দেৱীৰ ৰূপলৈ ৰূপান্তৰ কৰে। দুর্গা, কালি, চণ্ডীৰ ৰূপত নাৰী শেৱালীয়ে শেষ কৰে সমাজৰ অপশক্তিক, অন্ধকাৰ আঁতৰাই জগত পোহৰাই তোলে । সমাজৰ নেতিবাচক শক্তিক আঁতৰাই ইতিবাচক আদর্শ প্রতিষ্ঠা কৰে নাৰীৰ সেই ৰূপে। শেষ (হত্যা কৰে) কৰে সমাজৰ দানৱ বংশীধৰক। এই নাট্য-দৃশ্যত দৰ্শক অনুভৱ কৰে কৰিস্মিতাৰ অভিনয় শক্তি (acting power)। নাট্য-দৃশ্যটো নাট্য-সৌন্দৰ্যলৈ ৰূপান্তৰ কৰিছে অভিনয়ৰ লগতে সংগীত (পৰিচালনা: গৌতম শইকীয়া), পোহৰ (কৃতাৰ্থ শৰ্মা আৰু যাদৱ মহন্ত), মঞ্চসজ্জাই (গনেশ বড়ো)।

--এই নাটক খনৰ নাটখনৰ সহকাৰী পৰিচালক বিনীতা দেৱী আৰু হেমেন সেনাপতি, গীতৰ কণ্ঠ চন্দামিতা ডেকা, সংগীতৰ সহযোগী দীপা মহন্ত, নৃত্য পৰিচালনা প্ৰণৱ জ্যোতি ৰাভা, ৰূপ সজ্জা জ্যোতিস্মিতা কলিতা, সাজসজ্জা তৃষ্ণা কলিতা আৰু হিমাংশু দাসৰ।

সংযোজন, প্ৰযোজনা গোষ্ঠীৰ বিষয়ে:

সুৰজিৎ একাডেমী ১৯৯৭ চনৰ ১ জুনত গুৱাহাটী বিশ্ববিদ্যালয়ত প্ৰতিষ্ঠা কৰা হৈছিল। তেতিয়াৰ পৰা অহৰহ নাট্য-কৰ্ম, নাট্য-চৰ্চা কৰিআহিছে। তেতিয়াৰ পৰা দুবছৰীয়া নাটৰ পাঠ্যক্ৰম আজি পৰ্য্যন্ত চলি আছে। প্ৰশিক্ষণ প্ৰদান কৰি আহিছে অসমৰ অভিজ্ঞ নাট্য কলা কুশলীয়ে। বছৰত তিনি-চাৰি খন নাট পৰিৱেশিত হৈ আহিছে। তাৰ লগতে অসমত নাটৰ প্ৰতিযোগিতা সমূহতো অংশ লোৱা হৈছিল। ভাৰত চৰকাৰ আৰু অসম চৰকাৰৰ অধীনৰ বিভিন্ন বিভাগৰ আঁচনি সমূহ বাটৰ নাটেৰেও পৰিৱেশন কৰে।

শিক্ষাৰ্থী বহুজন ৰাষ্ট্ৰীয় নাট্য বিদ্যালয়, দিল্লীৰ পৰাও স্নাতক হৈছে। বহু জন ৰাষ্ট্ৰীয় পৰ্যায়ৰ সাংস্কৃতিক ক্ষেত্ৰ, অসমৰ মঞ্চ আৰু চলচ্চিত্ৰত প্ৰতিষ্ঠিত- হিমাংশু প্ৰসাদ দাস, চন্দনা শৰ্মা, ৰাজীব কলিতা, বিনীতা দেৱী, মণ্টু কুমাৰ দাস, অদিষ্ণা ৰাজবংশী, দিগন্ত শৰ্মা, কাবেৰী মহন্ত, হিমাংশু শৰ্মা, স্বপন দাস, প্ৰাণজিৎ ডেকা, গৌতম দাস, মৃণাল শৰ্মা।

বহুজন শিক্ষাৰ্থী ভাৰত চৰকাৰৰ সাংস্কৃতিক মন্ত্ৰালয়ৰ পৰা ৰাষ্ট্ৰীয় পৰ্যায়ৰ টেগৰ স্কলাৰশ্বিপ, ওস্তাদ বিছমিল্লা খান যুৱ পুৰস্কাৰ, চিনিয়ৰ ফেল' শ্বিপ, জুনিয়ৰ ফেল' শ্বিপ, যুৱ স্কলাৰশ্বিপ, শিশু স্কলাৰশ্বিপ পাইছে।

#Number 1 #Roi_Roi_Binale