#thehole2

O argumento, fiado entre números independentes, vén sendo unha escusa no cabaré, para recoller arredor dun tema aglutinante unha miríade de xogos espectaculares.

O fenómeno The Hole preséntase como un híbrido teatral de cabaré, musical, varietés e circo.

The Hole 2 cumpriu a súa función número 700 no Teatro García Barbón d’Afundación de Vigo o sábado 5 de decembro de 2015.

Polo mesmo palco pasara, hai uns anos, The Hole. Naquela primeira entrega facía de mestra de cerimonias La Terremoto de Alcorcón, unha “show-woman” que se fixera famosa na tele polas súas parodias musicais de Madonna e outras divas do pop.

Por aquela altura, en The Hole, chamaba a atención o tratamento igualitario e non discriminatorio de xéneros, a desmitificación da muller obxecto, e a desaparición dunha configuración heterosexista da escena.

Entre o escándalo que todo híbrido teatral de cabaré, musical, espectáculo de varietés e circo propón, un dos números que máis sorprendera por aquel entón consistía nas piruetas e voos dun rapaz que exhibía o seus xenitais como parte da coreografía.

Este efectismo, en certo sentido transgresor, ao empregar como elemento de provocación erótica o nu integral masculino, en disciplinas como o trapecismo, volveu a repetirse en The Hole 2, nunha variación aínda máis procaz, cun actor que exhibía unha pirola de gran tamaño.

Tamén se mantivo o personaxe da rata, interesante metáfora do humano e, á vez, introdución do “freak” e intervención daquilo que adoitamos rexeitar ou non aceptar. Ademais de facer aparecer, de novo, ao roedor sobre o palco, foi asumido no desenvolvemento dramático, nesta ocasión, por unha vedete cunha simpatía e unha voz tan grande como os seus peitos multiplicados.

Desta volta, o sarcasmo ou ironía burlesca, cun ton afiado como na farsa, cébase coa institución do matrimonio e co amor para sempre.

Os tocamentos teatralmente lúbricos abondan desde a escena e esténdense á platea.

A apoteose lumínica e musical súmase ao incribe virtuosismo nos números máis circenses de acrobacia con teas, no trapecio, na patinaxe artística, no equilibrismo...

Polo medio van os números musicais, con temas orixinais e versións de temas famosos, relativos ao argumento do fracaso amoroso e da hipocrisía e o medo que agochan a meirande parte das promesas de amor.

Amor e humor. Moito humor de todas as cores, excepto negro, que aquí a festa prima. Humor intelixente e áxil como o raio, afiado na crítica política e social, ao estender as promesas a declaracións de gobernantes cruzadas coas de personaxes da prensa rosa, extraídas da hemeroteca. Humor verde e obsceno.

Tres horas de espectáculo sen decaer, cun ritmo case atlético, perfectamente consciente da alternancia e contraste entre cadros falados, cadros cantados e musicais e cadros máis circenses con danza e acrobacias diversas.

The Hole é unha fórmula mestiza que triunfa polo acabado formal perfecto, por non caer en estéticas casposas, nin estereotipadas nin sensibleiras. No entanto, logra o recoñecemento, por parte do público, dese teatro-festa que recolle o que lle covén do cabaré, do musical, do circo, do “talk-show”, sen render pleitesía ou fidelidade a ningún deles, senón desde a variedade que supón saltar dun xénero ou modalidade a outro, sen por iso descoidar a cohesión dramatúrxica.

The Hole amosa a súa tendencia libertaria e crítica desde a estética aos contidos, desde a imaxe escénica ao deseño das situacións de acción. Festa, humor e ironía son as canles e un ritmo inclusivo que non deixa a ninguén fóra.

THE HOLE 2. 

EQUIPO CREATIVO

Creación: LETSGO Iñaki Fernández

Dirección: Víctor Conde

Deseño de produción: Sandia Frerot

Textos: Alex O’Dogherty

Letrista: Ferrán González

Música orixinal: Marc Álvarez

Coreografía: Amaya Galeote

Dirección de comedia: Gabriel Chamé Buendia

Maquillaxe e perruquería: Kley Kafé

Vestiario: Nicolas Vaudelet

Escenografía: Miguel Brayda

Deseño de luces: Juanjo Llorens

Deseño de son: David Castelló

ARTISTAS

MC: Alex O’Dogherty / Edu Soto / Canco Rodríguez

Madame Zoltar: Vinila Von Bismark / Marchu Lorente

María del Mar: Marta Ribera

Censor / Cover MC: Víctor Massán

Gato Voador: Álvaro Ramírez

Jungle Girl: Marchu Lorente / Belinda Henríquez

China Girl: Belinda Henríquez

Cupido: Nick Beyeler

O Home do Smoking Azul: Sergio Blanco

Banda de Rock: Chus Herrera, Angie Lófer, Susan Santos e Carmen Niño

Trapecista: Marilén Ribot

Rockeiro glam: Gustavo Sartori

Artistas invitados: Trío Sunrise