Glenn Miller

Èg bað hana að klippa mig nokkuð snöggt. Þegar hún  var hálfnuð með hausinn á mér vorum við komin á kaf í samræður. Allt í einu hætti hún að klippa og lagði  eyrað við höfuðið á mér. Hún sagðist heyra eitthvað. það var ekki um að villast. Þetta var Glenn Miller. Ég varð hálfvandræðalegur og sagði henni að þetta kæmi fyrir af og til. Hún bara brosti í speglinum og hélt áfram að klippa mig og ég heyrði að skærin voru farin að saxa loftið í takt við lagið.  —Óskar Árni Óskarsson, Lakkrísgerðin 2001