#semiscripts

في غرفة تكاد تكون مظلمة، تميز بوضوح موسيقي شوبن الصادرة من جهاز اللابتوب الذي ينعكس ضوؤه علي وجه غير واضح المعالم وعلي أشباح تتطاير من تلك السيجارة التي تبدو معلقة في الهواء، يجلس شخص منهمك ومشغول لدرجة تمنعه من وضع سيجارته المسكينة، التي تآكلت، في الطفاية. يرن الهاتف المحمول برتابة لم تحرك ساكنا، يرن للمرة الثانية بإلحاح جعل ذلك الشخص أخيراً يتوقف عن الكتابة ويضع سيجارته بحركة سريعة وعينيه معلقة بالشاشة، الآن فقط انتبه للمحمول فإلتقطه سريعا وهو ينفث بقايا الدخان بقوة، ويرد: ألو.. مين؟ علي الجانب الآخر: أنا مدحت! -يرد: إسمع يا مدحت، أياً كان الكلام اللي أنت هتقوله أنا مش مهتم أسمعه.. أنا آسف. يغلق الهاتف ويضعه علي المكتب، ويلتقط سيجارة بسرعة ويشعلها ويتركها وحيدة بين شفتيه، ويضع يديه علي الكيبورد ليستعيد وعيه بما كان يكتب. ينظر إلي المحمول ويدور حوار نفسي بداخل عقله:"وآدي كمان واحد كرهني"! يرفع صوت الموسيقي، ويبدأ بالكتابة مرة آخري. إظلام

إمبارح مثلًا، زي دلوقتي كده، راودتني فكرة إني أعمل كوباية شاي بالنعناع وأطلع أشربها في البلكونة، وأسمع شوية مزيكا فشيخة بقي لباك ستريت بويز؛ علشان أظبط المود بتاعي يمكن أعرف أذاكر، ولسه حالًا واخد بالي إني لسه معملتش كده! فات 24 ساعة، وأنا تقريبًا قاعد بنفس الطريقة، ده لو هنهمل ساعات النوم"قاعد علي السرير" وهنهمل اللحظات اللي بخرج أدخل فيها الحمام، والدقايق اللي بدخل فيها المطبخ؛ آكل أي حاجة موجودة، والدقايق اللي بفتح فيهم التلاجة في كل مرة بدخل فيها المطبخ بدون سبب واضح، وبفضل مبحلق في ولا حاجة، أنا حفظت كل الموجود في التلاجة، ومع ذلك بفتح التلاجة في كل مرة أدخل فيها المطبخ وأقف قدامها، مفيش دافع يخلي إنسان عاقل يعمل كده، أنا لسه ما إتجننتش، أنا طبيعي جدًا، بصحي من النوم بفكر في فنجان القهوة اللي هبدأ بيه يومي، ولما بدخل المطبخ وأجهِّز كل حاجة، وعلي وشك إني أفتح الضلفة وأجيب القهوة، بفتكر إنها خلصت، بسيب كل حاجة مكانها وبمشي في هدوء أدخل أوضتي تاني، أو أفتح التلاجة أبص فيها شوية!بفكر أقوم أعمل كوباية شاي بالنعناع وأطلع أشربها في البلكو....

حياتك البائسة بتبدأ تزداد بؤس في الدقايق الأولي وأنت عند الدكتور النفسي اللي بيحاول يوهمك إنه مش دكتور وأنت مش مريض، ويطلب منك تتكلم، وأنت بتصمت، وبتحاول تستوعب الموقف بهدوء، ايه اللي جابك هنا لما أنت مش بتعاني من مشاكل؟، والمفروض تقول ايه؟ المفروض تتكلم كمريض نفسي وكشخص مش طبيعي بيعاني من مشاكل نفسية وتبدأ تسلط الضوء وتحكيله عن أعظم مخاوفك في الحياة، خباياك وعقدك وكل حاجة مش طبيعية بتعملها في حياتك، تمردك علي الواقع والعادات والتقاليد والروتين، وسنن الحياة اللي المفروض كلنا نتقبلها ونتعايش معاها، أنت مقتنع إنك طبيعي، بس محاولات الدكتور في إنه يوهمك إنك مش مريض بتخليك تحس إنك في أشد حالات المرض، تلهف الدكتور إنه يسمع أي حاجة تدينك بالمرض والأسباب اللي بتوصلك للحالة اللي بتظهر فيها مش طبيعي، تشخيص الدكتور لحالتك من قبل ما تتكلم، صمتك اللي بيحاول يعبَّر عن كل اللي جواك وبيفشل، كلامك اللي مش بيعبر عن ولا حاجة من اللي جواك وبينجح، بترجع تصمت تاني فاتفشل أكتر، أنا مش مريض، أنا طبيعي، أنا طبيعي لأني مقدرتش اتعايش مع الواقع. أنا آسف، آسف لأني حاولت وهحاول! أشباه سيناريوهات<</button>

أشباه سيناريوهات

-وكانت هي فعلا؟! -كانت هي بشحمها ولحمها. -وأنت عملت إيه؟ -ولا حاجة.. فضلت أضحك ضحك هستيري طول الطريق! خليني أحكيلك من البداية. طيارتي كانت الساعة ٨ صباحا، وأنت عارف إن ده توقيتي المفضل في السفر، وصلت المطار حوالي الساعة ٦ ونص، دخلت عالكاونتر، وزنت، وخلصت الاجراءات بسرعة، ودخلت صالة الانتظار، روحت الكافيه، جبت قهوة، وونا خارج لقيتها في وشي، كادت إنها تخبط فيا، بضع قطرات من القهوة وقعت علي ايدي، اتأسفتلي، قلتلها ولا يهمك، عيني جت في عنيها، ابتسمتلي، ونا ابتسمتلها واومأت براسي ومشيت، الموضوع كله حصل في لحظات، روحت صالة الانتظار، قعدت اشرب القهوة، طلَّعت رواية كانت معايا أتسلي فيها، كنت في الصفحات الأخيرة، كمِّلت قراية. “لا تكن جبانًا كعادتك، وانتهز الفرص التي يرسلها إليك القدر حتي لا تقع فريسة للندم” بصيت لفنجان القهوة بعمق، وراودتني مجموعة أفكار لثواني، صورة ابتسامتها ونظرة عنيها كانوا الفكرة الرئيسية، مش عايزة تفارق خيالي، ملامحها كانت مألوفة جدا، حسيت إني أعرفها من زمان، مش مجرد إني اكون شوفتها صدفة قبل كده مثلا، أو حلمت بيها. معقولة هي دي فتاة احلامي؟ مشوفتهاش غير مرة واحدة وصدفة ويا عالم هشوفها تاني ولا لأ، الموضوع مش منطقي، بس أنا عندي رغبة شديدة إني اشوفها تاني، معقولة دي رسالة من القدر وفرصة لازم انتهزها؟ بدأت تروادني أفكار وتساؤلات من ذلك القبيل، شربت القهوة. “نرجو من السادة المسافرين علي الرحلة رقم ٥٦٥ التوجه إلي البوابة رقم ٣..” افكاري تاهت مع الصوت ده، وقلبي دق بسرعة، وآمالي كلها انقطعت في إني اشوفها تاني، قمت وأنا متوتر، عدلت شنطة ايدي وبصيت لآخر مرة في أماكن عشوائية لعلي أشوفها تاني، قال يعني بدوَّر علي أي رسالة تانية من القدر! آدي أخرة قراية الروايات، اتجهت للبوابة، ركبت الطيارة، جمب الشباك طبعا، تنهيدة وشوية أفكار عبيطة بحاول أهرب منها، بس مازالت مسيطرة علي تفكيري، ازاز الشباك الصغير كان بالنسبالي أمل أخير في إني مثلا يمكن الحظ يحالفني وأشوفها منه، بس هشوفها فين، وايه الفايدة؟ ما خلاص فات الأوان. طلَّعت الرواية كمِّلت قراية. “علي المرء أبدًا أن لا يفقد الثقة في القدر، ويحقق ذلك يإيمانه التام به وبالمعجزات التي هو قادر عليها…” وفجأة سمعت صوت مألوف: مساء الخير، ولسه بلتفت، لقيتها كملت: ايه ده.. مش حضرتك بردو.. أنا آسفة بجد علي اللي حصل في الكافيه، احب اعرفك، عماد خطيبي، احنا مكانا هنا.. جمبك!

فاكر وأنت صُغيَّر.. يوم ما الدنيا كانت بتشتي؟! وأنت كنت مستخبّي في البيت، بتبص من ورا إزاز الشبّاك، وفرحان ومبسوط بالشتا، والمطر بينزل علي الشبّاك ومش بيلمسك! وإنِّك مستخبِّي من المطر ودفيان..  بتشوف ناس بتجْري، وبتحاول تستخبَّي من المطر.  بيلفت انتباهك.. ناس فرحانة بالمطر، ومبسوطة وبتضْحك، ورافعة راسها للسما؛ بتستقبل المطرة بوشَّها، ورافعة إيديها لفوق؛ بتحاول تمسك المطرة! ابتسمت ابتسامة عجز وغيرة! حسّيت إن المطرة دي بتاعتك إنتَ، ولازم تخرج تعمل كدا! بتجْري تقول لمامتك: عايز أخرج! تقولك بعصبية: إنتَ اتجننت! بتفقد الأمل إنّك تخرج، بترجع تاني جري عند الشبّاك، وبتحط إيدك علي خدّك، بتبص للناس اللي واقفة تحت المطرة بإستغراب، وسرحت شوية.. "هم فعلاً مجانين؟" ومن جوَّاك متأكد إنهم مستمتعين. بتفوق من السرَحَان علي صوت مامتك، واقفة جمبك.. بتراقبك بإبتسامة حب وحنان. معاها مج "هوت شوكلت"، بتحطُّه جمبك، وبتاخدك بحضن كله خوف وحنان. وتقولك: أنا عارفة إنَّك عايز تنزل وتفرح بالمطرة، بس أنا خايفة عليك أحسن تتعب. وتعطيك "الهوت شوكلت"، وتمسح يإيديها علي شعرك، وتطبع علي خدك قبلة، وتسيبك وتخرج. بترجع تاني تراقب الناس، والتناقضات في التصرفات. الدنيا بطَّلت شتا، الشوارع فضيت!