#liburua

Yanis Varoufakis ezagun egin da gure artean. Mundu osoan asko izan gara, 6 hilabeteren buruan bere jarraitzaile bilakatu garenak. Grezia, zorra, finantzak eta bere jarrera laburbiltzen ditu Syrizako gobernuak hautatu zuen ministroak. Ekonomia irakasle zela bagenekien, blogaria, twitter erabiltzaile iaioa.

Erreferendumak burujabetza ariketa mundiala jarri zigun begien aurrean. Herri bat, bere eskubideak eta izaera aldarrikatzen. Bere erabakia.

Biharamunean utzi zuen kargua. Estrategia ausartean, urrats bat gehiago.

Erreferendumaren egunean aipagai izan genuen liburua etxekoon artean. Biharamunean, pozik gainera, eskean joan nintzen herriko kioskora. Bi egunetara eskuartean nuen, irakurtzen hasteko pronto.

Lehen lerrotik, irakasle idazle guraso aidetsu bat, argia, azalpenak ematen goxoa, atsegina... eta modu ezin ulergarriago batean. Alabari azaltzen dizkio ekonomia kontuak, gazteengana zuzendu nahi du bere mezua, guri guztioi mintzo zaigu, ekonomia eta batipat kapitalismoaren historia ulertzeko moduan. Lehen lerrotik, parrafotik, kapitulutik harrapatuko zaitu liburuak. 

Sarea, eremu sortzailea

Ostean sarean iragarri nuen, sare sozialetan:  Ekin niola irakurketari. Varoufakisen ahotsa aldarrikatzen. Estiloa. Samurtasuna.  Aupamenak!

Berari buruz sekulakoak eta bi esaten ari diren honetan, bere irudiaz, izaeraz, jarreraz eta beste.... Bere alabari idatzitako liburu samurra irakurtzen ari naizen honetan, gizon atsegin, ulerkor, jator, xume eta argi bat, oso argia somatzen dut. Liburu batek hurbiltzen zaitu, beragana kasu honetan.... zer eta ekonomiaren historia bat istorio txiki eta ulergarriz osatuz. Sekulako liburua.... ez galdu aukerarik!

Eta haria sortu zen, jarioa. Galderak eta erantzunak. Proposamenak eta kezkak. Liburua eta euskaraketa. Beharra eta ezina. Gogoa eta indarra. Hariak eta jarioak jarraitzen du. Atsegin dut, edo nahi dut, edo behar dugu....

Euskaraketa martxan da, eta uda honetan lanean jarri gara. Auzolanean berriz ere. Eta argitaratuko dugu, eta modu askotara... dijitalean, paperean, enkarguz...