#levriou

Un istor sorserien eo Le livre perdu des sortilèges, skrivet gant Deborah Harkness, met pell eo da vezañ keñveriet da heuliad levrioù Harry Potter. Ur gouc’hemenn re vrav ha diverit e vefe !

Setu diverrañ ofisiel al levr, troet ganin diwar golo a-dreñv ma skouerenn : « Hini diwezhañ ul lignez hir a sorserien eo Diana Bishop, met abaoe pell eo bet dibabet ganti dilezel herezh he familh a-benn splujañ en hec'h enklaskoù skol-veur. Betek an deiz ma vo amprestet ganti un dornskrid hudstrilhouriezh [ alchimie ] : an Ashmole 782. Ne oar ket d’ar mare-se emañ o paouez lakat war well ur sekred kozh ha spontus, hag an holl – drouksperedoù, sorserien ha sunerien-gwad – a zo o troukc'hoantaat anezhañ. En o zouez, Matthew Clairmont, ur suner-gwad ken spouronus ha m'eo divinadellus. « Ul lazher », ‘zo bet lavaret dezhi. En em adkavout a ra buan Diana e-kreiz ar reuz, etre un dornskrid milliget hag ur garantez dibosupl. »

Ha setu hervezon ar pezh ho po da c’houzañv ma lennoc’h al levr-mañ : un istor pounner, enoeus, dioberoù, ur seurt remix Twilight, gwelloc’h ( n’eo ket diaes ), met ur gwir dorr-revr, memestra.

Dibosupl eo stagañ ‘barzh, abalamour d’un istor na grog james, d’un titouriñ pounner ha kalz re hir diwar-benn munudoù ( war-dro un ugent linenn bennak evit ar boued, ar memes tra evit ar gwin, hag tremen a ran war skouerioù all ) hag un haroz pell da lakat kengarantez da sevel ennomp.

Skrivañ kalz evit lavar nebeud a dra. Met aze, 517 pajenn evit netra, kalzik eo memestra. Marteze e krog an istor en eil levr… Met n’on ket evit lenn anezhañ.

Ar gwashañ en istor ? Ur film vo savet. D’en em grougañ e vo, ma ne cheñch ket ar sevenner an istor. Ha cheñchamantoù ‘zo d’ober !

Thirrin, Priñsez ar Skornegoù eo romant kentañ un heuliad levrioù bet skrivet gant Stuart Hill. Evit ar poent eo bet embannet an daou levr kentañ en heuliadenn hag emañ an trede hini o vezañ skrivet. Thirrin a zo al levr kentañ bet skrivet gant ar skrivagner ha n'eo ket gwall anavezet met plijet en deus kalz da lodenn-vrasañ al lennerien, kement en deus divizet Stuart Hill tardañ gant e labour evit bevañ gant ar skrivañ.

Al levr kentañ a c'hoarvez en ur bed faltaziek bet ijinet gant S.H. hag a denn kalz d'an henamzer da vare an impalaeriezh Roman pa oa en he mare galloudusañ. Thirrin a zo merc'h nemeti roue Carmin hag hêrez ar rouantelezh Yenerezh-Uhel e Norzh ar c'hevandir, e-tal bevenn impalaeriezh Polypont. Koulskoude memes ma 'z eus kalz a c'halloud gant impalaeriezh Polypont, e tiviz ar jeneral Scipio Bellorum aloubiñ ar rouantelezh Nordek vihan hag e varvo tad Thirrin en emgannoù evit difenn Yenerezh-Uhel hag he familhoù. Neuze e vo ret d'ar plac'h yaouank difenn ar rouantelezh a-bezh a-enep an impalaeriezh. Evit en ober e c'houlenno sikour gant an holl bobloù a vev muioc'h c'hoazh en Norzh egeti : pobl gouez an dud-vleiz, hini kriz ar sunerien-gwad hag hini dianavezet louparded an erc'h. Sikour ar galloudoù burzhudus he do ivez a-drugarez da Oskan Mab-sorserez, ur sorser yaouank o vevañ e koadoù ar rouantelezh.

Ur romant plijus, leun a nerzh ha skrivet mat eo Kronikoù Yenerezh-Uhel, gant ul live yezh dereat ha fraezh. Ar faltazi a zo unan eus temoù pennañ al levr met pa lenner anezhañ e santer ivez pouez an Istor hag ar sevenadurioù nordek ha kelt, met ivez reoù roman. Ul levr evit ar grennarded yaouank eo dreist-holl met pa lenner Kronikoù Yenerezh-Uhel aketus e kaver ivez kudennadurioù sokiologel, etikel ha prederouriezh ivez.

*Haute-Froidurie e galleg

Plijet on bet kalz gant al levr-mañ. Ma plij deoc'h al levrioù gant kalz a spisadurioù, lennit Victor Hugo. Ur skrivagner brudet-kenañ eo. Graet en deus kalz a romantoù hag un tammig barzhoniezh. Peurvuiañ eo tev levrioù Victor Hugo. Diaes eo mont e-barzh an istor evit kregiñ, met a-feur ma 'z eoc'h en istor e krogoc'h da gompren ha tapet oc'h e-barzh ha ne c'helloc'h ket diskrogañ dioutañ. Les Misérables a zo ul levr bet skrivet e 1862. Tri levr a zo en holl. E penn kentañ ho peus poan da vont 'barzh, met war-lerc'h ur pemp pajennad bennak emaoc'h e-barzh. Ar spisadurioù eo ar pezh a gavan mat-kenañ e skritur Victor Hugo. Gellout a ra chom war un objed e-pad dek pajennad ha deskrivañ a ra anezhañ gant ar muiañ a vunudoù a c'hell kavout. Ar fed e vefe kalz a vunudoù a zo un dra vat evit al lennerien, peogwir e c'hellont ijinañ evel ma wel Victor Hugo. Gellout a reoc'h gwelet al lec'h e-giz m'emañ el levr. Istor Les Misérables a dremen e Bro-C'ahll en XIXvet kantved. Kontañ a ra istor ur prizoniad, bet dieubet. C'hoant en deus adkregiñ e vuhez met den ebet en deus c'hoant dioutañ. Dont a ra da vezañ haroz an istor. Ne lavaran ket ouzhpenn. Setu perak e alian anezhañ deoc'h ma 'z oc'h plijet gant ar spisadurioù. Ouzhpenn al levr eo deuet er-maez ar bloaz-mañ, ar film hag a zo ur « comedie musicale » gant aktourien vrudet e-giz Hugh Jackman, Helena Bonham Carter, Rusell Crow, Amanda Siefried... Kavout a ran ar film dispar ivez, met kalz gwelloc'h eo lenn al levr rak ober a reoc'h ho istor hiniennel gant ho tudennoù.