#ladeka

最近 Pop-up Cafe 大行其道，就連本土設計的卡通人物都唔輸蝕。繼癲噹成為夢見屋店主之後，今次輪到松鼠仔 Squly 的朋友仔 Ladeka 成為 Lab Made 店主。我依莉詩今日就率先到荃灣店品嚐一下佢精心炮製的份子甜品！

裝飾以平面為主

係 Squly Pop-up Cafe 門口歡迎大家的並唔係松鼠仔 Squly，反而係佢嘅朋友仔 Ladeka。咦？睇嚟應該叫 Ladeka Pop-up Cafe 先啱啵！因為 Lab Made 本身賣份子雪糕，所以鋪面唔大，得幾張枱可以坐，為咗慳位，裝飾都只係以平面為主，影相位就唔多夠啦！

▲ 點解門口唔係松鼠仔，反而係企鵝仔呢？ Squly & Friends 共同創辦人 Cyril 和設計師 Claudy 就解畫啦，原來因為整份子雪糕需要好抵得冷，所以 Ladeka 就幫 Squly 手做大廚啦！

▲ 賣雪糕的位置有 Squly 同  Ladeka 的畫，好可愛呢！

▲ 另一邊就有 Squly 同佢的朋友係雪地上玩的繪畫。

限定甜品平過杯雪糕

雖然話呢間本身係份子雪糕店，但係限定菜單入面，雪糕反而變成配角，賣相仲變得更吸引添！唔單止有 Squly 最愛的松果型甜品 同  Ladeka 最鍾意食的雕魚燒，另外仲有焦糖燉蛋、心太軟同窩夫。但奇怪的是，價錢唔單止無價到，反而仲平咗添，超抵食！

Squly 最愛朱古力榛子松果配牛奶雪糕 $36

用一片片蛋糕加上榛子醬砌成的松果甜品超得意，食落有 D 似繽紛樂，而牛奶雪糕味道較淡，可以中和榛子醬的甜度。

▲ Ladeka 奶皇雕魚燒配抹茶雪糕 $42

雕魚燒內夾有奶皇，大小適中，唔會話太飽太乾，而抹茶雪糕配埋紅豆一齊食就更有口感。

▲ 脆皮窩夫配奶皇雪糕 $36

呢個我覺得最抵食！雖然窩夫外型、花生醬、糖同花生碎好易令人聯想到街邊十蚊件的格仔餅，不過加埋中間的奶皇同奶皇包味雪糕之後，即刻升咗呢！奶皇包味雪糕唔太甜，但有奶皇香，夠晒特別。

▲ 火焰雪糕芝士撻 $22

雖然芝士撻唔係 Squly 限定甜品，不過我真係一試難忘！將分子雪糕的元素加入芝士撻中，食落又熱又凍，集澳洲芝士的香濃，意大利芝士的軟滑於一身，一次食幾個都仲得！

▲ 中間入澳洲同意大利芝士雪糕製成，所以愈食就愈有流心效果。

    ▲ Squly 鮮奶抹茶 $25、Ladeka 朱古力 $26、Cely 鮮奶焙茶 $25

成甜品之餘，買任何 Squly & Friends 限定甜品都可以以 7折購買任何飲品。

精品數量少，但超可愛

皆因土地問題，所賣嘅精品唔算多，不過以本地原創卡通嚟講，精品都算幾多元化架啦！

▲ 只要食滿 $44 就可以儲一個印花，儲兩個可以免費換領 A4文件夾一個，儲滿 10個加 $45 就可以換領 Ladeka 毛公仔一隻。

▲ 特別版的 Ladeka 毛公仔超可愛架！

  依莉詩：「仲抵食過其他分店！」

今次呢間 Pop-up Cafe 規模唔算大，不過以兩間本土店合作可以就到咁已經好利害。至於限定甜品方面，真係勁抵食，平時一杯份子雪糕都成 $40幾蚊，依家加埋松果型甜品、雕魚燒、焦糖燉蛋、心太軟或者窩夫反而仲平咗。不過我最鍾意食的係火焰雪糕芝士撻呢！香濃芝士味，但又一 D 都唔「流」，食多幾件都仲得！

Lab Made x Squly & Friends Theme Cafe

日期：2015年 11月 20日至 2016年 2月29日

地址：Lab Made 荃灣分店 (眾安街68號千色匯2樓美食廣場1號舖)