#kuwaitflights

சென்னை விமான நிலையத்தில் நேற்று இரவு மற்றும் இன்று அதிகாலை இயக்கப்பட வேண்டிய மும்பை மற்றும் குவைத் தொடர்பான 4 முக்கிய விமானங்கள் திடீரென ரத்து செய்யப்பட்டன. இந்த ரத்துகளுக்கான முக்கிய காரணமாக “போதிய பயணிகள் இல்லாமை” கூறப்படுகிறது.

தகவல்களின் படி, நேற்று முன்தினம் இரவு 8.25 மணிக்கு மும்பையில் இருந்து சென்னை வர வேண்டிய ஏர் இந்தியா விமானம் ரத்து செய்யப்பட்டது. அதேபோல், இரவு 9.05 மணிக்கு சென்னை இருந்து மும்பை செல்ல இருந்த ஏர் இந்தியா விமான சேவையும் நிறுத்தப்பட்டது.

இதனைத் தொடர்ந்து, இன்று அதிகாலை 2.25 மணிக்கு குவைத்தில் இருந்து சென்னை வர இருந்த குவைத் ஏர்லைன்ஸ் விமானமும், மேலும் 3.25 மணிக்கு சென்னை இருந்து குவைத் செல்ல இருந்த விமானமும் ரத்து செய்யப்பட்டதாக அதிகாரப்பூர்வமாக அறிவிக்கப்பட்டது.

விமான நிலைய அதிகாரிகள் தரப்பில் கூறப்படுவதாவது, சமீப நாட்களில் சில சர்வதேச மற்றும் உள்நாட்டு வழித்தடங்களில் பயணிகள் எண்ணிக்கை குறைந்திருப்பது காரணமாக விமான சேவைகள் பாதிக்கப்பட்டுள்ளதாக தெரிவிக்கப்படுகிறது.

இதற்கிடையில், சென்னை விமான நிலையத்தில் இருந்து டெல்லி, கொல்கத்தா, புனே, ஹைதராபாத், பெங்களூரு, கொச்சி, கோவை உள்ளிட்ட நகரங்களுக்கு செல்ல இருந்த பல்வேறு விமானங்களும் தாமதமாக இயக்கப்பட்டன. மொத்தமாக 12 விமானங்கள் 1 மணி நேரம் முதல் 2 மணி நேரம் வரை தாமதமாக புறப்பட்டன என்பது பயணிகளுக்கு கூடுதல் சிரமத்தை ஏற்படுத்தியது.