انهاردة وانا بتمشى كان في طفل شقي اووي عمال يشد في هدوم ابوه ويجري ورا طفل تاني في الشارع، المهم يعني ان ابوه زعقله جامد وشده من هدومه.

اللطيف في الموضوع ان الطفل وقف ساكت ويضحك من بعيد لبعيد مع الولد التاني، ويغيظوا بعض بحركات اطفال.

في الحقيقة موقف عادي جدا لكن عقلي عمل فلاش باك لما كنت في سنه. كانت اقل كلمة من والدي بتزعلني، مكنتش بعرف أرجع اهزر واضحك كأن مفيش حاجة حصلت !.

حتى الحاجات اللي كنت ببقى عارف انه بيزعقلي فيها عشان مصلحتي كنت بزعل منها.

المؤسف في الموضوع أني كبرت وانا كدا، نفسيتي ضعيفة قدام أي كلمة مُحبطة أو جارحة، غصب عني مش بعرف أطلعها من عقلي وأكمل يومي عادي وكأن مفيش حاجة حصلت.

أقل كلمة بتغير مزاجي وتقفل يومي، وطبيعي لما المزاج يتغير ريأكشنات الوش بتتغير وطريقة الكلام بتتغير.

بعترف اني ضعيف قدام أقل كلمة (حتى لو من شخص معرفهوش اوي). وبعترف اني بتغير في التعامل من اقل كلمة، ما بالك اقل فعل ؟!!.

Algunos doodles de FC's para mis amigas :,0

Keroo - @cyberakiragirl

كان صديقي من الاعدادية ولحد ثانوي وحتى لما دخل هو كلية وانا كلية، كان يجي معايا محاضراتي واروح معاه محضراته. كان أبسط انسان عرفته، كان بيعرف يخلي كل حاجة بسيطة جميلة وليها طعم بشكل غريب. وأجمل ما فيه أنه كان عنده هدوء وسلام نفسي عجيب حتى في اصعب المواقف.

كان يبقى عندي مصيبة واعصابي مشدودة على الاخر، يقولي مال وشك كدا ليه؟ وعاملنا حواجبك ٨٨ وكأن في مصيبة، ولما احكيله يقولي اه اتصدق دي مصيبة 😅 .. بقولك ايه عايزين نفول عشان نعرف نشغل ماتور العقل ونلاقي حل.

وننزل على عربية فول صاحبها راجل كبير كان بيعشقه، كان اسمه عم مصطفى في شارع بورسعيد جنب بيته. كان بكل بشاشة يقوله ازيك يا عم مصطفى يا بركة، امانة عليك معايا ضيف كل مرة مش عايزك توجب معاه ولا حاجة انت ابو الكرم بس عايز كرسي ليا انا عشان رجلي بعافية 😅 والغريب انه فعلا كان بيجبله كرسي والناس كلها واقفة الا هو !.

نخلص يقولي فولنا تمام .. ناقصنا بقى نشحم بكوباية شاي، وفجأة يبصلي يقولي نفول ونشحم تحسني ميكانيكي صح ؟! 😅

تعدي الايام واعرف انه عنده كانسر ومقالش لحد شهور طويلة، وكان حابب يستقل عن اهله في شقة جدته. ووقت ما بدأ ياخد كيماوي وشعره بدأ يقع بدأ يلبس أيس كاب صيف شتاء.

كنت ببقى زعلان عليه وعلى شعره الناعم، بس رغم وجعه عمري ما حسيته زعلان!، ولما كنت اجيبله كاب عادي كان يقولي وماله الايس كاب .. دا بص انا عامله محفظة وكان يشيل فيه فلوس ويضحك.

كانت ضحكته جمييلة جدا، وكأن ربنا جعل فيها طاقة للي يشوفها !. ومن وقت تعبه كنت ازوره واحاول اخف شوية من الكلام عن مشاكلي، وكان يصمم يعرف.

ولو قولتله عن مصايب الدنيا كان يقلل منها ويشحن روحي بطاقة غريبة، اي حاجة ولو كارثة يقولي : وايه يعني ؟! هي نهاية العالم ؟! مكبر الموضوع ليه ؟!.

ولو حاجة تاعبة نفسيتي كان يعمل العكس، مايقللش منها بالكلام، بس يقلل منها بخروجة وعزومة، بتأمل في البحر بتمشية رغم اني كنت ببقى واثق انه مش قادر يمشي.

حتى لما فكرت انزل جيم مقدرتش عشانه وعشان محسسهوش بضعف صحته، جه من نفسه قالي مش يلا بينا جيم، اتصدمت ! وقولتله لا مكسل بصراحة وخلاص تخنا من كتر ما بتأكلنا، وكان يرد .. لا زي ما تخنتك انا مسؤول اخسسك لازم ننزل جيم.

حرفيا ماشوفتش في حياتي حد ينطبق عليه مثل اعمل خير وارميه في البحر أد ما شوفته فيه، لا تعصبه كلمه من ورا دهره، ولا يشيل من حد زعله. كان بيهرب من اي شر بشكل غريب !. وافتكر ناس كتير زعلته ولما احتاجته عمره ما اتأخر، ولا فكر حد بغلطة عملها في حقه!.

وصحيح عدى على وفاته ٤ سنين، الا انه حاضر دايما، ورغم اني محتاجه جداا دلوقتي ، الا ان كلامه دايما على بالي، يمكن أكون مش بقوته في البساطة ولا في قلبه اللي لا كان بيغضب ولا يشيل من حد، لكن حقيقي هيفضل أعز من في القلب واكتر شخص بيعرف يقويني. هيفضل الحاضر الغائب.

وزي ما كان بيقول .. ماتشلش هم كل شوية يا كيرو، مش عايز همك يخطفك من الدنيا قبل الكانسر ما يخطفني، دي حتى تبقى عيبه في حقك.

أنا عقلي لسه محبوس في أيام المدرسة والدروس وكأنها كانت امبارح !، أنا باقيت بتصدم في كل مرة طفل يقولي فيها يا عمو، وعقلي مش فاهم ازاي يتقالي الكلمة دي دا انا اللي كنت بقولها إمبارح ؟!!! ..

في الحقيقة عيد ميلادي بشوفه ذكرى بتفكرني اني كبرت، وإن الحياة بتجري بشكل أسرع مما كان العقل يتوقع. باقيت براجع اللي فات وحاسس اني ملحقتش، معملتش حاجة لسه.

طب انا بطئ ولا الدنيا اللي سريعة ؟!! ..

ولما أفكر عشان أجاوب .. ألاقي العمر جري وأنا راكب قطار وبنزل في محطات مش بتاعتي، بنزل في محطات في حياة غيري وانا فاكرها محطتي !.. عشان كدا اتأخرت رحلة وصولي للمحطات اللي انا عايزها .. أنا مكنتش عارف عنوان اللي أنا عايزه ! .. أنا كنت بدور عليه في كل محطة تقابلني واضيع فيها شوية وقت "عمر" حلوين كدا وفي الأخر أكتشف أنها مش بتاعتي !.

في الأول حابب أوضح أن كلامي دا مش تحليل ولا عبقرية لشخص عالم في علم النفس، لكنه تجربة حياتية عيشتها بنفسي وشوفتها في غيري وقرأت عنها بقدر ما أستطاعت، لا أكتر ولا أقل.

ولأن الخوف أبو كل المشاعر السلبية والعامل المشترك بين غالبية الأمراض النفسية حابب بس أوضح كام حاجة (من وجهة نظري) اغلب الناس بتعملها أو تقولها بدافع الحفظ - أيوا الحفظ - يعني تلاقي حد بيعبر عن خوفه فا تلاقي اللي قدامه رد عليه بإجابة سريعة بديهية ماتعبرش عن أي حاجة غير أنه حافظ الرد ومالحقش حتى يفكر في شعور اللي قدامه او يفهم الاسباب.

يعني عندك مثلا بعض النصائح اللي حافظينها وبنقولها لأي شخص خايف ..

١. (قرب لربنا وصلي) .. مفيش أي نقاش ان الصلاة والتقرب من ربنا بيطمن القلب. بس معلش يعني أنت عرفت منين أنه بعيد أصلا عن ربنا ؟!!، ما ممكن يكون طول الليل والنهار بيعيط لربنا وبيصلي يمكن اكتر منك !. طب بلاش النقطة دي، أفرضنا خوفه كان نتيجة إضطراب ما في كيمياء المخ اللي بتأثر على تفكير المخ وتخليه "لا إراديا" يخاف !!، أفرضنا أسباب خوفه عبارة عن ظروف حياتية بيعيشها كل يوم وكل يوم مربية الرعب في قلبه وبيدعي ربنا تخلص "لانه بشري تحت الضعف طبيعته كدا يعني وربنا خالقه كدا". وبرضوا مش بقلل من أهمية التقرب من ربنا عشان الناس اللي بتزايد وتسيب الموضوع والمعنى، لكن قصدي مايبقاش تهوينك لخوف غيرك بأنك تقوله قرب من ربنا "كأنك شايفه وهو بعيد !!"، ويبقى شعوره خوف واكتئاب لانك بقصد او من غير قصد اتهمته انه بعيد عن ربنا ومقصر، وانت اساسا ماتعرفش حياته !.

٢. النصائح الشخصية وقصص بطولاتك مع خوفك مش مناسبة لغيرك !! - على سبيل المثال - ماينفعش تنصح شخص حاسس انه خايف من الناس ونفسه يهرب بعيد عن كل البشر وتيجي حضرتك تقوله بطولاتك الاجتماعية وأهمية العلاقات في حياتك !!. ما ينفعش تهون خوف حد من مقابلة شغل هو في أشد الحاجة ليه وتقوله تجربتك مع الخوف ايام ثانوية عامة !!. هو خايف وبيعترفلك انه خايف تقوم تستعرض قوتك وبطولاتك قدامه فا يبقى خايف وحاسس انه خايب ومش طبيعي ولا من حقه يخاف !!.

٣. التشجيع الإجباري أو محاولة زراعة الحماس في الشخص الخايف واحدة من اسوأ محاولات التهوين والتقليل من خوف غيرك. يعني ايه حد يقولك خايف فا تقوله قوي قلبك ؟!!! ايوا يعني يعمل ايه ؟! يقوي قلبه ازاي ؟!. ايه الخدمة او النصيحة او العلاج في كلمات زي "متخافش"، "ماتبقاش جبان". ايه اللي استفاده بجد ؟!! .. التشجيع بالطريقة دي بيجيب انتكاسه وبيبقى الشخص خايف وشايف نفسه جبان وضعيف، ومش بعيد يهرب من قعدتك بعد كدا عشان مش هيجيله وش يقعد معاك وانت شايفه خايف وجبان (وكأنك بتعايره) ويصدق فعلا انه جبان وعقله يحاربه بفكره جديدة غير خوفه ودا بفضلك طبعا.

في حاجات تانية كتير بنقولها لبعض بتنزع اللي باقي من ذرة امان بنحسه. فياريت زي ما احنا عارفين يعني ايه شخص خايف نبقى عارفين ازاي نتعامل مع خوفه. ازاي نعرف الشخص الخايف ان دا حقه وانه طبيعي يخاف وان مفيش اي حد في الدنيا مش بيخاف (في الدنيا فعلااا مش مجرد تعبير). أي حد يقولك مش بخاف كدااااب. اكثر الناس إيماناً بتخاف من ربنا وتخاف تعمل عمل يغضبه، بتخاف من المدح الكداب. واكثر الناس شرا وقسوة بتخاف من الموت اللي مش بس هيخليهم ينالوا عقابهم على شرهم في الاخرة، لكن كمان عشان هيحرمهم من دنيا حبوها اوووي وعايزين يخلدوا فيها. والناس الطبيعية بتخاف برضوا خوف عند كل الناس.. على عيالها .. مستقبلهم.. امتحان وتعب دراسة .. شغل .. رزقهم ورزق بيتهم .. الفراق لحد بيحبوه .. الخذلان .. الوحدة .. إلخ ، كل دا خوف طبيعي فا ماتحسسوش الواحد أنه خايب اوووي او ضعيف لمجرد انه خايف من حاجة انت مش خايف منها، واللي لو واجهك بيها هتلاقي ألف مُبرر تدافع بيه عن نفسك انك خايف من حاجة تستحق يتخاف منها، لكن خوفه تشوفه تافه !!.

طبعا شايفني سودت الدنيا وقفلتها وقولت في النهاية ان الخوف مش بيتعالج ولا كأني بعمله دعاية وبقول للكل عيشوا خوفكم !!..

في الحقيقة مش هقدر اتكلم على علاج محدد لخوف مُتغير النسبه والاسباب من الشخص للتاني. لكن في حاجات أساسية لأي خوف "ما عدا اللي أسبابه مرضية نتيجة تغييرات في كيمياء المخ او خلاياه" ..

ازاي بقى نقلل من خوف شخص لحد ما هو بنفسه يغلبه ويتخلص منه ؟! ..

١. جوا نفسك كدا بص لخوف اللي قدامك على أنه شعور لا إرادي، مش تبص لسبب الخوف تافه ولا لا !!، لانه ممكن يكون تافه ليك بس راعب الشخص الخايف (خلي تركيزك على احساس ان الواحد يبقى خايف، اكتر من تركيزك على سبب خوفه وتقييمك ليه !!) وقتها هتقدر تتعاطف معاه بجد من غير تقليل لشعوره.

٢. يمكن منقدرش نهزم خوف مش خوفنا (خوف شخص غيرنا بيحس بيه)، بس نقدر نزرع جواه طمأنينه أد ما نقدر، ومش بالكلام التحفيزي اللي قولنا ممكن يجي بنتيجة عكسية !، لكن بأنه يلاقينا معاه، خايف من امتحان ؟ هذاكر معاك، خايف من الوحدة هتصل بيك كل شوية ومهما كنت مشغول اكيد هلاقي دقيقة ولا اتنين اصدعك بيهم. خايف من بكرا ؟ وانا كمان مرعوب ومحتاجك معايا فيه. خايف من الناس ؟ سيبك منهم وخليك معايا، وواحدة واحدة تنزل معاه هنا وهناك ويشوف ان الدنيا والناس مش وحش مرعب زي ما كان فاكر.

احنا منقدرش ننزع خوف حد بس نقدر نبقى معاهم فيه بقدر المستطاع فا عقلهم ميبقاش مركز على الخوف وبس.

٣. أسمع .. صدق أو متصدقش أكتر خوف منتشر هو الخوف من التعبير عن خوفنا، فأسمع وأهتم وخلي اللي قدامك يحس ان فعلا موضوعه مهم ويستحق يتسمع لاخر حرف، وانه مش هين ولا تافه.

٤. عارفين ايه اللي بيخلي دايرة الخوف تضيق علينا لحد ما تخنقنا ؟!! .. هو أننا نفقد الثقة في ناس كانت في يوم من الأيام كسبانة كل ثقتنا، فا نحس ان العالم متوحش وناسه غدارين، وعقلنا يقولنا اذا كان الأقرب كدا امال الناس الغريبة ازاي ؟!! فيتصفح العقل بـ العزلة وقله الثقة ويبقى خايف من اي حد. دا بقى علاجه بسيط جداا (نبقى بني أدمين طبيعين وعند ثقة غيرنا)، ثقوا ماتخونوش إنشاالله لو في كل 100 شخص هنكسب شخص يستحق ثقتنا. ثقوا واطلعوا من حالة أن العالم برا مرعب، ثقوا مش هتخسروا اكتر ما خسرتوا.

طولت اوووي في الكلام وواثق ان كلامي عدى على ناس كتير ملحقتش تشوفه اصلا. لكنه كلام ليا في الأول هحتاج ارجعله عشان قولت فيه كل اللي كان نفسي اسمعه.

المهم أننا نزلنا نجري بيك على اي مستشفى قولنا يمكن مغص ،وكشفوا عليك وقالوا كويس لا حرارة ولا احتقان ولا أي حاجة !!. كنت على صرخة واحدة وبكل قوتك وانا بعيط مش عارفة مالك، لحد ما جدتك شافتك وقالتلي باين عليه ممزوق !! وفعلا قعدت تدعك في جسمك وكدا لحد ما بدأت تهدا ..

أنا كنت زعلانة عليك اووي، حتى بعد ما عرفنا اللي تعبك كنت زعلانة عليك .. كنت تعبان ومش عارف تقول مالك ولا ايه اللي واجعك.