#karnero

Mateo 25:31-46

Ang atong pagahisgutan karong higayona, mao ang kataposang paghukom. Dili nata matingala pa nga haduol na gyud ang kataposang adlaw sa kalibotan ug hukman gyud kita, matag-usa kanato. Busa samtang naa pa tay panahon, susihon na nato daan ang matag-usa natong kaugalingon kung tinuoray ba kitang nagdawat kang Kristo, tinuoray ba kitang matawag na Kristohanon, naa na bay kabag-uhan sa atong mga batasan ug binuhatan, unsa kaha nga hukom ang ihatag sa ato, unsa kaha ka, Karnero o Kanding? Atong himay himayon, atong klarohon unsa o kinsa man kining mga karnero o mga kanding na akong ginaingon sa umaabot nga paghukom. Para atong maklaro kini, atong tubagon kining unom ka pangutana:

1. Duna bay paghukom?

2. Duna bay maluwas?

3. Unsa imong makita sa mga maluwas?

4. Kinsa ang masilotan sa kalayo?

5. Nganong silotan sila?

6. Unsa man gayod ang kaluwasan?

DUNA BAY PAGHUKOM?

Atong basahon ang Mateo 25:31-33. Sa 31 atong mabasa "inig-anhi sa Anak sa Tawo ingon nga Hari...", Mao na si Hesus para sa iyang ikaduhang pagbalik. Unsa man iyang tumong? Sa 32a mabasa nato "Ug ang tanang tawo sa kalibotan tigumon sa iyang atubangan...", para asa? 32b "...unya bahinon niya sila sa duha ka pundok, sama sa usa ka magbalantay sa hayop nga maglain sa mga karnero gikan sa mga kanding" para gyud sa pagbahin o paglain. Naa pay dungag sa 33 "ibutang niya ang mga karnero sa iyang tuo ug ang mga kanding sa iyang wala". Sa atong nabasa, naa gayud paghukom. Naay paglahi! Sa sambingay, gilahi ang mga karnero sa mga kanding, ug para sa tanang katawhan dre sa kalibotan, lahion ang mga taong matarong ug lahion pud ang mga taong masupilon sa umaabutay na paghukom.

DUNA BAY MALUWAS?

Kinsa man kani sila? Sa Mateo 25:34a mabasa nato "unya ang Hari moingon sa mga tawo sa iyang tuo..." kinsa ba tong mga naa sa tuo, mao ang mga karnero, 34b "...'Duol kamo nga gipanalanginan sa akong Amahan..." ang pananlangin na ilang nadawat gikan sa Dios Amahan mao si Kristo Hesus. Unsa may mahitabu sa ila, sa 34c "...ug dawata ninyo ang Gangharian nga giandam alang kaninyo sukad pa sa pagbuhat sa kalibotan." Atong nakita nga naay gyuy maluwas. Maluwas tong mga tao nga nagtuo ug nagdawat nga si Kristo Hesus ilang manluluwas ug mahiagoman nila ang kinabuhing walay kataposan.

UNSA IMUNG MAKITA SA MGA MALUWAS?

Unsa pa ang mga rason nganu maluwas sila? Atong tan awon sa Mateo 25:35-40. Sa atong nabasa sa bersikulo 35 ug 36 kaning mga taong maluwas naay pagbuhat nga serbisyo o pagpangalagad. Kay kinsa man sila nangalagad? sa 40 giingon "unya ang Hari motubag kanila, 'Sultihan ko kamo nga sa matag higayon nga maghimu kamo niini alang sa usa sa labing ubos niining akong mga igsoon, gihimo ninyo kini alang kanako!" Alagaran gyud nato atong Ginoo ug ang atong kapwa Kristohanon ug ang tanang tao dre sa kalibotan. Dli dapat mamili kon kinsa man imung alagaran. Kon ikaw karun nangalagad buot pasabot ana nga naa kay buhi nga pagtuo diha sa Ginoo kay nilihok man ka. Pareha nato run nga buhi pa, nanglihok man ta, ginabuhat nato ang mga matag adlaw nga buluhaton, unya kung sa buhi nga pagtuo ang hisgotan, nagatoo man gyud kita nga dako gyud ang paghigugma sa Ginoo sa atua, mao ipakita nato pinaagi sa buhat ang gugma sa Ginoo para sa ubang tao, kay dli lang man ako ang gihigugma sa Ginoo, kita mang tanan.

Ang problema krun kung paralyzed gani ang imung pagtuo, tungod nabira ka sa mga bisyo nga makadaot ug nagpatuyang ta sa atong mga lawasnong kailibgon, kay maglisud na gyud kag lihok, maglisud ka sa pagpangalagad. Pero kung nagtinguha ka nga mangalagad sa Ginoo nya tan aw nimu paralyzed ang sitwasyon nimu, pag ampo sa Ginoo ug paghinulsol ug patambal sa Iya, ug patabang nga hinluan niya ang atong hunahuna ug kasingkasing para makalihok na ta para sa buluhaton sa Ginoo.

KINSA ANG MASILOTAN SA KALAYO?

Kabalu nman tang tanan nga duha lang gyud atong paingnan kung kita hukman, una katong maluwas o makaadtug langit, ang ikaduha mao ang masilotan sa kalayo. Kinsa man kining masilotan sa kalayo? Atong susihon sa Mateo 25:41, giingon sa bersikulo "Unya muingon siya ngadto sa mga tawo sa iyang wala, 'Pahawa kamo kanako, kamong gipanghimaraot sa Dios! Ngadto kamo sa kalayo nga walay pagkapalong nga giandam alang sa Yawa ug sa iyang mga anghel." Klaro kaau na ang masilotan, katong mga tawo nga naa sa walang bahin o ang mga kanding. Kinsa paman? Apil pud nga pagasilotan ang Yawa ug ang mga daotang anghel niini. Tapokon ug ilabay ni silang tanan sa way pagkapalong nga kalayo.

NGANONG SILOTAN SILA?

Unsa kaya ang rason nganong silotan sila? Unsa bay makita sa ila? Atong tan awon sa Mateo 25:42-46. Sa bersikulo 42 hantud 45, giingon nga nagdumili sila sa paglihok para sa buluhaton sa Ginoo. Wala nila serbisyuhi ang mga tawo nga makakaluoy nga muduol sa ila. Kabaliktaran nila ang mga tao nga naa sa tuong bahin ni Hesus. Buot pasabot, kani silang mga tawhana patay ang ilang pagtuo diha sa Ginoo o sa sobra pa wala gyuy pagtuo sa atong Ginoo. Kay kung patay, di na gyud mulihok, wala nay pakialam sa iyang palibot. Mao pud ni ang mga tao nga Magpabiling gapos sa ilang salawayong binuhatan ug batasan. Mao ni sila ang gipakadios ang bahandi dre sa kalibotan, kanang dili gusto makaplagan nga si Hesus maoy tinuod nga bahandi sa ilang kinabuhi. Ug unsa man ang mahiagoman ani nila, sa 46 gisaysay nga "Busa kini sila mahiagom sa walay kataposang silot apan ang mga matarong makaangkon sa kinabuhing dayon". Mao gyud ang kamatuoran, silotan gyud ang mga taong wala gyuy tinuoray nga pagdawat o nidumili gyud sa pagdawat kang Kristo Hesus nga siya ilang manluluwas.

Drea ba sa atong panagtapok, naa pa bay kanding drea? Kapareho man gud ug nawong ning karnero ug kanding. Unta walay nagpakarnero karnero dre sa atua karon pero kanding di ay tung dako. Muingon nga dawat na niya si Hesus Kristo pero ang tinuod wala pa di ay. Pormado nga musulod sa simbahan pero ang kasingkasing dili di ay ang Ginoo ang nakasentro. Mao ng susihon nato tanan, matag usa kanato, nakaplagan na ba nimu si Hesus sa imung kinabuhi? Ato na ba gyud tinuoray nga gidawat ug gipasulod sa atong kasing kasing si Hesus? Kung tan aw ninyo wala pa, ampo ug hangyua si Hesus nga musulod sa imung kasingkasing, hangyua nga ipakaplag ni Hesus ang iyang pagkaDios sa imuhang kinabuhi, hangyua nga si Hesus nga siya nay mudala ug maglihok sa kabag-uhan sa imung batasan ug binuhatan, hangyua nga pildihon niya sa kanunay ang lawasnong kailibgon nimu dre sa kalibotan, ug pagpatabang nga birahon ka ni Hesus pabalik sa iya ug dili na magpadala pa sa mga tintasyon niining kalibotana, dili pa ulahi ang tanan, naa pay panahon para dawaton nimu nga si Hesus imu gyung manluluwas, tapos mulihok napud para sa pagpangalagad sa Ginoo sama sa mga tao nga naa sa tuong bahin ni Hesus arun dili ta mahiapil sa pagsilot sa kalayong way pagkapalong.

UNSA MAN GAYOD ANG KALUWASAN?

Sa panahon karun daghan pa gihapon ang galibog mahitungod sa kaluwasan, mao ng atong klarohon kung unsa ba gyud ang pamaagi para maluwas. Atong basahon sa Efeso 2:8-10, "Kay pinaagi sa pagtuo naluwas kamo tungod sa grasya sa Dios. Dili kini inyong buhat kondili gasa sa Dios. Busa walay makapasigarbo niini sanglit dili man kini bunga sa inyong mga paningkamot. Mga binuhat kita sa Dios. Ug gibuhat kita niya diha kang Kristo Hesus aron magbuhat kita sa maayo nga maoy iyang tuyo alang kanato." Sa bersikulo 8 ug 9 klaro kaayo nga naluwas kita tungod sa pagtuo nato sa Ginoo ug dili tungod sa atong buhat, kay dili man ta kapasar kung ang kaluwasan pinaagi sa buhat. Kay nganu man? Tungod kay "Kaniadto patay kamo tungod sa inyong pagkadaotan ug pagkamakasasala. Gisunod ninyo ang daotang pagkinabuhi sa kalibotan..." (Efeso 2: 1-2a) Tan-aw nimu makahimu pa ka ha ta ug maayo aron maluwas kita kung gapos man ta sa atong mga sala? Dili jud! Apan... "Apan dako kaayo ang kaluoy ug gugma sa Dios alang kanato. Bisan gani nga kaniadto patay na kita sa espiritu tungod sa atong pagkadaotan, gibanhaw kita niya uban kang Kristo. Naluwas kamo tungod sa grasya sa Dios." (Efesos 2: 4-5). Tungod sa atong pagtuo, naluwas kita. Atong klarohon, dili kini bunga sa pagpaningkamot, pero buot pud ba pasabot niini nga dili napud ta mubuhat sa maayo? Sa bersikulo 10 giingon nga mga binuhat kita sa Dios, ug gibuhat kita niya diha kang Kristo Hesus. Para asa? Aron magbuhat kita sa maayo nga maoy iyang tuyo alang kanato. Tungod kay nadawat na nato si Hesus nga atong manluluwas sa atong kinabuhi ug samtang naa pa ta aning kalibotana, mubuhat gyud ta sa maayo hangtud na muabot ang kataposang paghukom para sa atua. Ingon pa sa Santiago 2:14-17, ingon ani ang kaluwasan "Mga igsoon, unsay kapuslanan kon ang usa ka tawo moingon nga siya may pagtuo apan walay maayong binuhatan? Makaluwas ba kaniya ang iyang pagtuo? Dili gayod! Pananglit may mga kaigsoonan nga nagkinahanglan ug bisti ug walay igong pagkaon, magpulos ba ang inyong pag-ingon kanila, 'Panalanginan unta kamo sa Dios! Pagsinina kamo ug kaog maayo!' - kon dili ninyo sila hatagan sa ilang gikinahanglan? Ingon niini ang pagtuo: patay kini kon dili ubanan sa buhat." Giklaro sa bersikulo nga ang patuo ug ang pagbuhat mag uban para kita maluwas. Kay unsa gani ang pagtuo kondili ubanan sa buhat, patay ang pagtuo. Gi segundahan pa kini sa Santiago 2:26 "Kay sama nga patay ang lawas nga wala nay espiritu, patay usab ang pagtuo kon walay mga buhat". Kung muingon man gani mo nga maynalang naay pagtuo. "Nagtuo ka nga usa ray Dios. Maayo kana. Apan ang mga demonyo nagtuo usab niana-ug nagkurog sa kahadlok." (Santiago 2: 19) klaro kaayo nga maayo man nga magtuo ka sa Dios pero atong hinumduman demonyo gani gatuo man pud ang naka-apan lang kay patay ilang pagtuo tungod kay di man sila mubuhat sa matarong mao ng mahiagoman gihapon nila ang pagsilot sa kataposan.

Daghan pud biyang mga Kristohanon, muingon lang na sige 'ampuan lang taka, luoya pud sa imuhang sitwasyon noh?' Pero kutob rpud didto. May lang unta ug muampo jud unya usahay kutob rajud sa storya. Akong usabon, walay kapuslanan ang imong pagtuo kung dili ubanan sa pagbuhat. Gatinguha ta nga makatabang ka sa imung pamilya, pero hangtud run nagtinarung ba ka o buluyagon ra ghapon? Gatinguha ta nga mangalagad, pero kung kutob ra sa tinguha ug way paglihok, sayang lang imung tinguha, mas nindut kung muaksyon dayun! Naa pud uban, puro rapud buhat, wala pud pagtuo sa atong Ginoo, mas labaw nga way pulos. Usahay kaning buhat lang, dili mulahutay ug dili mulambo kung dili ubanan gyud sa pagtuo sa Ginoo. Usahay pud mugawas ang batasan nga pagpakarun ingnon, kay nganu? Giunsa nila pagbati ug kaluoy ug gugma sa uban kung wala man gani sila nituo sa Ginoo nga ang Ginoo, gugma man. Mao ng akong usabon sa pagsulti, ang pagtuo ug ang pagpangalagad sa Ginoo mag uban sa kanunay. Tungod sa atong pagtuo sa Ginoo, tungod kay ato siyang nakaplagan sa atong kinabuhi, tungod kay nakita nato iyang gugma ug pagkamaayo sa ato, ato pung i-convey ang gugma sa Ginoo para sa ubang tao pinaagi sa pagbuhat ug kaauyahn para kanila. Ang bersikulo sa Mateo 25:34-40, Efeso 2:8-10, Santiago 2:14-17 isa ra ang ginapasabot nga maluwas ka kung naa kay pagtuo sa atong Ginoo ug inubanan pa sa pagbuhat ug maayo.

Kung imung susihon ang imung kaugalingon unsa kahay tubag nimu sa atong gihisgutan krung higayona, karnero ka ba o kanding?

OUTLINE BY: PBP