E kam kundërshtuar fort mikun tim, Peter Lucas, gazetar i njohur i Boston Globe dhe Boston Herald, kur ka shkruar në një rast, në mbrojtje të shkrimtarit tonë të madh, Ismail Kadare, se “një pjesë e shqiptarëve duket se kanë një defekt në kompozimin e tyre gjenetik, që i bën ata të urrejnë, të përbuzin dhe t’i kenë zili bashkëkombasit e tyre”, pasi unë nuk jam një ithtar i sociobiologjisë. Por, kur shoh se si individë që as më kanë njohur ndonjëherë dhe as i njoh, në vend që të merren me argumentet që parashtroj unë dhe të më kundërshtojnë me argumentet e tyre, shajnë jo vetëm mua, si autor, por edhe tim atë, të cilin, gjithashtu, s’kanë pasur rast ta njohin ndonjëherë, kuptoj se sa të thella i ka rrënjët te shumë nga ne instikti primitiv klanor dhe mentaliteti i fisit, sipas të cilit, djali, babai, gjyshi, stërgjyshi, stërstërgjyshi duhet të mendojnë e veprojnë njëlloj dhe të ruajnë të njëtën filozofi jete e mënyrë jetese.