#egyrevolution

أغنية إرجع ياريس وأجمل إرتجال من ميدان التحرير

=====================

إرجع ياريس....لألألأ

إرجع ياريس...لألألأ

مش عايزينى أبقى كويس إرجع ياريس...لألألأ

إرجع ياريس علشان خاطرنا

ماحد غيرك أبدآ واكلنا

دا انت حبيبنا وإيدك فى جيبنا

وسايب الشعب ده مفلس

ينفع ياريس؟...لألألأ

إرجع ياريس...لألألأ

إرجع ياريس من غير سؤال

إرجع وهات إبنك جمال

خليه يرجع الأموال

وانت بس ياحسنى تكنزَ

ينفع ياريس؟...لألألأ

إرجع ياريس...لألألأ

مش عايزينى أبقى كويس

إرجع ياريس...لألألأ

إرجع ماتبقاش مستفز

دا انت فلوسك زى الرز

وإسأل صاحبك أحمد عز

ماهو عالتزوير متأسس

ينفع ياريس؟...لألألأ

إرجع ياريس...لألألأ

إرجع وشوف مين اللى ظالم

إرجع دا ربك هو اللى عالم

وإسأل صاحبك حسين سالم

نوَر إسرائيل بغازنا

وسايبنا فى الضلمة نحسس

ينفع ياريس؟...لألألأ

إرجع ياريس...لألألأ

إرجع دا احنا عليك بنغير

إرجع بجد الأمر خطير

طب لو جيت هنا التحرير

هاتلاقى إنك خسرت شعب كويس

ينفع ياريس؟...لألألأ

إرجع ياريس...لألألأ

إرجع طب إنت ليه قلقان

هو إنت نمت فى مرة جعان؟

وإبقى خد من حضن ماما سوزان

ماهى بردوا قربت تفلس

ينفع ياريس؟...لألألأ

إرجع ياريس...لألألأ

قصه الشهيد مصطفي الصاوي الذي أبكي العالم كله بعد استشهاده في ثوره 25 يناير

أتحدى أى حد يسمع كلام الأطفال دول وميبكيش

اغنية ارجع ياريس واجمل ارتجال من ميدان التحرير

فيروز كراوية - آخر مرة

لآخر مرة هستنى أشوفك جاية مهتمة نلم إزازك المكسور كفوف رجليا نزفت دم وانا رايح أقيد النور فى عمدان كل ميادينك باقولهالك لآخر مرة اعيش هالك مابين حرصى وإهمالك وعلمانية أنانية ودقن تفتش النية  ف أعمالك آخر مرة هلم شباب بيتظاهر وساسة لعبهم ظاهر يحضروا كل عفاريتك يجهزوا زان توابيتك لعمالك آخر مرة  هاخبى الشهدا فى جرابك واهدى ف غضبى أعصابك واهش النخبة عن صحنك وافض وليمة على لحمك وأحلامك آخر مرة هطارد كل حرباية بتتلون عشان غاية تصيب بكرة بقناصة تجيب للفقرا مصاصة بأموالك آخر مرة  هالف شوارعك الخايفة واوحد خمسميت طايفة بتتخانق على الجنة وبتحاكم ولد غنى بألحانك آخر مرة هاشيل قلبى من الدفتر وأنهى تاريخ بيتعسكر عشان اخبز رغيف سمنك ولو متأجرة لأمنك 

 أنا المالك

من داخل مقر اتحاد الاذاعة والتليفيزيون لحظة بث خطاب التنحى

يقول الرسول صلى الله عليه وسلم(اذا مات ابن ادم انقطع عمله الا من ثلاث صدقة جارية او علم ينتفع به او ولد صالح يدعوا له)صدق رسول الله صلى الله عليه وسلم

بفتكر الحديث ده كل اما اشوف صورة شهيد من شهداء الثورة المصرية المعروفين والمجهولين ايه اللى ممكن نعمله عشان ماننساهمش او عشان الاجيال اللى هاتيجى من بعدنا ماتنساش فضلهم عليهم ماتنساش ان لولا انهم اتشجعوا ونزلوا كنا هانفضل زى ما احنا نحلم بالتغيير واحنا نايمين وأول مانصحى من نومنا بننسى ومابنحاولش نفكر ازاى نحول الحلم اللى بنحلمه كل يوم الى واقع فى من الشهداء  اللى هانفتكرهم بعلمهم ودول قليلين وفى منهم اللى سابوا من وراهم أولاد صغيرين مالحقوش يفرحوا بيهم  ربنا يكرمهم ويكبروا ويكونوا صالحين،نيجى بعد كده لموضوع الصدقة الجارية أغلب الشهداء  شباب الجامعات ويمكن فى  منهماللى أقل من كده سنآ او تعليمآ فى منهم اللى كان لسه بيدرس وفى اللى خلص طب ليه مانحاولش نعمل مشروع صدقة جارية باسمهم مش لازم نسميه باسم حد فيهم لأ نسميه باسم الشهداء وأعتقد لو طلبنا من الشعب انه يساعد فى المشروع ده محدش هايقول لأ يكفى لو كل واحد يطلع جنية مش أكتر من كده شوف كام جنية هايتجمع احنا شعب عاطفى ودى ميزه مش عيب فينا ومعتقدش ان فى حد هايرفض انه يشارك فى الثواب ده وبالنسبة للمشاريع كتر الله منها ممكن نعالج بعض مصابى الثورة منها ممكن نساعد بيها بعض العائلات المحتاجة او نساعد بعض الطلاب اللى محتاجين ممكن نبنى بيها مساكن للعائلات اللى بدون مأوى ممكن نعمل بيها أى مساريع خدمية لأهل بلدنا وفى الأخر ده كله هايكون جزء بسيط من رد الاعتبار للناس اللى ضحت بحياتها عشان احنا نعيش حياة كريمة وبكده نبقى ابتدينا على الطريق الصحيح فى اننا نغير مقولة:

(فى هذه الثورة مات من لايستحقون الموت،من أجل أن يعيش من لايستحق الحياة)

وفى النهاية ياريت أكون عرفت أوصل الفكرة