#carroms

Team playing carroms to relax

ദുബായ് - ആവേശത്തിന്റെയും ആ‍ര്‍മാദത്തിന്റെയും അലകളുണര്‍ത്തിയ ഒന്നാ‍മത് റമദാന്‍ കേരംസ്  ടൂര്‍ണമെന്റില്‍ പ്രതീക്ഷകള്‍ തകിടം മറിച്ചു കൊണ്ട് അട്ടിമറി പ്രകടനത്താല്‍ ആസിഫ്-പീയെമ്മാര്‍ സഖ്യം ചാമ്പ്യന്മാ‍രായി. ഇന്നലെ രാത്രി ഖിസൈസ് ഈഎംഎസ്ഐ ക്ലബില്‍ നടന്ന പത്ത് ടീമുകള്‍ മാറ്റുരച്ച ടൂര്‍ണമെന്റിന്റെ ഫൈനലില്‍ ഇഞ്ചോടിഞ്ച് പോരാട്ടം കൊണ്ട് കാണികളെ ത്രസിപ്പിച്ച് ഫിറോസ്-ഷമല്‍ സഖ്യത്തെ കീഴടക്കി ആസിഫ്-പീയെമ്മാര്‍ സഖ്യം കപ്പില്‍ മുത്തമിട്ടു.

ടൂര്‍ണമെന്റിലെ സീഡ് ചെയ്യപ്പെടാത്ത താരമായ പീഎമ്മാര്‍ ആദ്യ മൂന്ന് കളികളിലെ പരാജയത്തിന് ശേഷം സ്ഫിനിക്സ് പക്ഷിയെ പോലെ ഉയിര്‍ത്തെഴുന്നേറ്റ് തന്റെ മാസ്മരിക പ്രകടനത്തിലൂടെ രണ്ട് ഗെയിം 10 വീതം പോയന്റ് നേടി സെമി ഉറപ്പാക്കുകയായിരുന്നു. സെമിയില്‍ മിന്നുന്ന പ്രകടനം ആവര്‍ത്തിച്ച ആസിഫ്-പീയെമ്മാര്‍ തോല്‍വി അറിയാതെ സെമിയിലെത്തിയ മഷ്രൂക്ക്-ഫിര്‍ണാ‍സ് കൂട്ടുകെട്ടിനെ പരാജയപ്പെടുത്തി കലാശകളിയിലേക്ക് യോഗ്യത നേടുകയായിരുന്നു. രണ്ടാമത്തെ സെമിയില്‍ ഫിറോസ്-ഷെമല്‍ സഖ്യം നസീര്‍-ഷമ്മു സഖ്യത്തോടേറ്റുമുട്ടി ഫൈനല്‍ ബര്‍ത്ത് ഉറപ്പാക്കി.

12 മണിക്ക് ആരംഭിച്ച ടൂര്‍ണമെന്റ് കാണാന്‍ ആബാലവൃദ്ധം കാണികള്‍ ഈഎംഎസ്ഐ ക്ലബില്‍ ഒത്തുക്കൂടിയത് ഒരു വേള ഒളിമ്പിക്സ് ഇവിടെയാണോ ലണ്ടനിലാണോ എന്ന സംശയമുളവാക്കി.  ടോപ്പ് സീഡായ ഷിബു ഫവാസ്, ചൂലു എന്നിവരുടെ ഫോം മങ്ങിയതും ഇടക്കിടെ മാന്ത്രിക ചൊട്ടുകളാല്‍ കേരംസ് ബോര്‍ഡില്‍ അത്ഭുതം വിരിയിക്കുന്ന നവാസ് മോറിസ്, താജിം എന്നീ വമ്പന്മാര്‍ക്ക് തുടര്‍ച്ചയായി വെല്ലുവെളി ഉയര്‍ത്താനാവാത്തതും പുതിയ താരങ്ങളുടെ ആധിപത്യത്തിന് വഴിയൊരുക്കി. വളരെയേറെ പ്രതീക്ഷയുണ്ടായിരുന്ന മൊജ-എം സഖ്യവും ശക്തമായ തീപ്പാറുന്ന മത്സരങ്ങളില്‍ നാനോമീറ്ററോട് നാനോമീറ്റര്‍ വിജയം കപ്പിനും ചുണ്ടിനുമിടയില്‍ കൈവിട്ട് കളിച്ചതും കാണികളില്‍ നിരാശയുളവാക്കി. ഗുരുവായ നസീറും  ശിഷ്യന്‍ അച്ചുവും ഒരേ ടൂര്‍ണമെന്റില്‍ മത്സരിച്ചതും തൃശൂരിന്റെ സ്വന്തം റോഷന്‍ കീസ ഫെയര്‍പ്ലേക്കുള്ള പ്രത്യേക പരാമര്‍ശം നേടിയതും ടൂര്‍ണമെന്റിന്റെ ഓര്‍മ്മശകലമാണ്. പലരും ഫ്രഞ്ച്, ഉക്രൈന്‍ തുടങ്ങിയ വിദേശനാടുകളിലെ കോച്ചുകളുടെ പരിശീലനം സ്വന്തമാക്കിയപ്പോള്‍ ഹ്രസ്വമായ യൂട്യൂബ് കോച്ചിങ്ങില്‍ കളി മെച്ചപ്പെടുത്തി കാണികളുടെ രോമാഞ്ചമായ ഷമ്മു ഇന്റെര്‍നെറ്റിന്റെ അപാരസാദ്ധ്യതയാണ് വിളിച്ചോതിയത് എന്ന് കളിക്ക് ശേഷം അവലോകനം ചെയ്ത അവുക്കര്‍ അഭിപ്രായപ്പെട്ടു. കളിയെന്നാല്‍ അഡല്‍സ് ഒണ്‍ലിയും ക്രിക്കറ്റും മാത്രമാണെന്ന് തെറ്റിദ്ധരിക്കപ്പെട്ട ഈ കാ‍ലഘട്ടത്തില്‍ പീയെമ്മാറിനെ പോലെയുള്ള താരങ്ങളുടെ ഉദയം കേരംസ് പോലെയുള്ള കായികവിനോദത്തിന് പുത്തനുണര്‍വ് നല്‍കുമെന്നും അവുക്കര്‍ അഭിപ്രായപ്പെട്ടു.