#28.4.2024

لا بأس، لو مستاهلش القسوة من حد يبقى أكيد مستاهلهاش من نفسي. لا بأس، لا بأس، لا بأس.

"أرى البُعْدَ لم يُخْطِر سواكُم على بالي، وإن قَرَّبَ الأخطارَ من جسدي البالي."

التسجيل ده (now deleted) بتاريخ 23 أغسطس اللي فات، جاي دلوقتي على بالي عشان النهارده من سنة صحيت على حلم غريب يخوِّف واتحقق بعدها بيوم بس لإكستريم أكبر كمان. صاحبتي كانت بتقولي "دماغك حاضرة دايمًا" عشان بفتكر حاجات في يومي عادي وألاقي إنها من سنة أو اتنين أو تلاتة حصلت وفكرت فيها، أو حتى حاجة ببساطة إني أشتهي أكلة معينة وألاقيني من سنة عملتها لنفس السبب. أنا حاسة إن مؤخرًا، آخر سنتين، الجرح هو اللي حاضر أو لسه حيّ. مش دماغي. كل ما بفتكر حاجة بلاقي إن ليها سبب في نفس الوقت بالضبط، لو جسمي وجعني بشكل معين بلاقي بسبب حاجة معينة من سنة أو اتنين. نفسي أنسى. نفسي بجد أنسى كل حاجة. أنا بطلت تدوين من زمان أوي، من سنة، بس لسه بفتكر ولسه الجرح مفتوح والله. الفرق إني دلوقتي مبعرفش يقينًا السبب ايه عشان مفيش يوميات تقولي عشان كذا، ومعرفش لو ده أحسن ولا أوحش. أنا بس عايزة أمسح كل اللي حصل من حياتي، بس كل مرة بلاقي نفسي بين الموج بصرَّخ. أنا زاهدة فيما سيأتي بالفعل، نفسي أكون ناسية ما قد مضى كمان.