#21.5.2019

يمكن الشغل كان عادي والمسؤولين كانوا عاديين، لكن أنا اللي مش مسؤولة وأنا اللي طماعة أو تهمني راحتي أو كسولة أو مبعرفش أشتغل أو غير ناضجة.

يمكن أهلي طبيعين، لكن المشكلة إني مبعرفش أتعامل مع البشر في المطلق وهما خصوصًا، يمكن أنا فعلًا ابنة/أخت لا تطاق، يمكن معاييري للتعامل السوي مثالية زيادة عن اللزوم، يمكن المفروض أسمع الكلام وأعمل اللي هما عايزينه عشان ده الصح، يمكن ده مش معناه إني مليش شخصية، ولكن معناه إني شخصيتي معيوبة ومينفعش أعيش بيها.

يمكن أنا اللي مبعرفش أحب أو أرتبط أو أكون في علاقة عاطفية، المشكلة مش في إني ملقيتش الشخص المناسب، المشكلة إني أنا نفسي مش مناسبة لحد ومنفعش أكون في علاقة.

يمكن أمراضي النفسية ملهاش الأثر الكبير ده في حياتي ولا هي اللي غيرتني تمامًا كده ولا هي اللي بتخلي الحياة كل يوم أصعب من اللي قبله والحاجات اليومية أصعب ما تكون، يمكن أنا بس اللي كده، وبأنا أقصد إنه اختيار مش حاجة خارجة عن إرادتي. يمكن الدكاترة النفسيين الكتير اللي جربتهم كانوا شاطرين ويقدروا يعالجوا الناس، بس مقدروش يعالجوني أنا لإني غير قابلة للعلاج، مش لأنهم فاشلين أو محاولوش بما فيه الكفاية.

May 21, 2019 - Day 336