#15.9.2018

September 15, 2018 - Day 88

- أنا اهدا كتير دلوقتى. حقيقي والله.

- ممتنة لصوت Charles Trenet و Joe Dassin والكام أغنية ليهم اللى على موبايلي اللى اسعفوني وانا جاية وعلى حسهم إستعدت هدوء وخفة مش مشروطين كنت مفتقداهم بقالى فترة. كان بقالى فترة محستش إني خفيفة وطايرة كدة من غير سبب. خفة الفترة اللى فاتت كان لها سبب.

- على ذكر الخفة، كان نفسى المرة دى يكون الجزء الأولانى من سؤالى المعتاد هو الإجابة، مش الجزء التاني: "Who knows! Is this the start of something wonderful and new, or one more dream that I can not make true"

- أنا كنت مفتقدة جدا النهاردة مشاركة تفاصيلي الصغيرة جدا والعبيطة جدا، زى إني وزنت وخسيت كيلو ف اخر تلات أيام، زى إني إحتفالا بالكيلو ده أكلت عسل وطحينة وكان نفسي فيهم، زى إني قضيت وقت لطيف مع يوسف وخوخة، زى إن طنط مامة رضوى عملت لنا أكل ملوكى النهاردة: بط محشى بالفريك وورق عنب وطاجن لحمة وبطاطس وطاجن بامية، زى إني اتوترت النهاردة كتير وفرحت كتير وضيعت فرحتى بإني مبينتهاش للى كان سبب فيها.

- مش عارفة هبطل امتى اتخيل حاجات مش هتحصل وببقى مستنياها تحصل، زى مكالمة مثلا، زى مجيّ على فجأة مثلا، زى سؤال اطمئنان مثلا.

- النهاردة بعد الجروب حسيت إني اتمليت شوية، وده حدث عظيم لو تعلمون.

- كان نفسى الدنيا تكون أبسط من كدة وأسهل من كدة وأيسر من كدة. أبسط فإني معملش حظر تجول على مشاعرى والحاجات اللى بحس بيها واقدر اقولها وابطل اخبيها، أسهل فإن الكلام اللى بيتقال يتقصد هو والأفعال اللى بتحصل منترجمهاش لمقاصد تانية، وأيسر فإن الحاجات اللى بنتمناها تكون هى هى اللى الكون بيبعتها وتكمل على طول.

- أنا ممتنة إن القراية والفرجة على أى حاجة بتساعدنى أروح ف النوم وبتقلل التفكير وسحلة دماغي، ممتنة جدا والله.

- شوفت ابويا النهاردة ومشوفتوش، أو بمعنى أصح هو شافني بس مشافنيش.