الاسبوع اللي فات كنت اجازة وكلموني من الشغل يوم الاربع الساعة ٢ ونص عشان في ريبورت محتاج يتملي وعايزيني اشتغله. طيب يا جماعة، ما مدى أهمية هذا الريبورت؟ أصله مطلوب من المكتب الرئيسي وبيزنوا عليه. ماشي يا جماعة على راسي، بس انتوا واخدين بالكم انه ريبورت رخم وتفاصيله كتير ومش بيخلص في يوم ولا حاجة، يعني الدنيا مش هتتهد لما اعمله يوم الحد (الخميس كان اجازة رسمي). فضلنا نهري كتير والحمد لله وجهة نظري هي اللي انتصرت عشان مفيش حاجة اسمها انا عايز ده دلوقتي، كن فيكون دي بتاعة ربنا بس المفروض.

يشاء القدر إن يوم السبت بالليل جميلة تتعب ودرجة حرارتها عالية. جِس وات يا شباب، أنا مش جاية بكرة! فبعتولي اللابتوب عشان اشتغل الريبورت من البيت. ف أنا كنت غضبانة قوي، وعبرت عن غضبي بالراحة وبأدب، إنه تمام طبعا هحاول اشتغله بس احب الفت انتباهكم إن لو كنت هزنق نفسي في يوم شغل عشان اخلصه، فمتتوقعوش مني اني اعرف اخلصه من البيت وانا مشغولة معاها وعليها ومش نايمة كويس! ف الحمد لله فهموا وقالولي انتي هتعملي اللي تقدري عليه حسب وقتك وخلاص هنعمل ايه يعني!

- تلات ضمات وسكون

- يا رب لك الحمد كما ينبغي لجلال وجهك وعظيم سلطانك

- أنا بدور في تفاصيل صغيرة جايز الاقي فيها حاجة كبيرة نقصاني

- اللهم اجعلني مقيم الصلاة ومن ذريتي ربنا وتقبل دعائي