زي مانا مبحبش اخد أي قرارات وأنا غضبانة، محبش إني كمان أكتب هنا حاجات وأنا مضايقة، ولو حد فاكر إن التحكم في النفس ده شيء عادي دا قمة الذكاء والجمال والتحول من الهمجية لحتة أكثر تحضر وراحة لأي شيء بتشاركه اللحظة. بس في حاجات بالملايين بتضايقني كل لحظة وبسكت وبعدي وببقى صوت العقل الفشيخ، بس مؤخرا زهدت حتى قمة العقل أنا نفسي امشي.

اتكعبلت في أولى حلقات مسلسل امرأة من زمن الحب وشدني حلقة ورا حلقة وكل ما اسكرول على الفيس تيجي الحلقة اللي بعدها وتلاقيني بكمل فرجه للآخر وسارحة في ملكوت تاني، وبما إنه السبت عندي بيبقى موافق معاه انتخه وسوشيال ميديا وفرجه مهما عزمت اني هخلص فيه كام برنامج وخطط كتير وبرضو بفشل، المهم إني مستمتعة جدا بالأحداث كأني بشوفها لأول مرة.

بضعف قدام حلاوة المولد لأنها متغلغلة في نسيج الطفولة المصرية بذكريات ورمزيات صعب تتفسر، وفي حالة هجومي المتأرجح بين الشعور بالذنب وعدم اللامبالاة، بنسى إنها سكر عالي جدا وده ضد نظامي، المهم لاحظت في يومين تلاتة وانا السليمة ولا اعاني من ضغط أو سكر، خمول عندي ووهن عضلات ومزاج زي الزفت وحاليا لقيت كمان الم في المفاصل والعضم اللي سببه الأساسي السكر والدقيق الأبيض عامةً واللي بالتجربة خلاني اقطعهم من حياتي. وبقول ده يومين بس لخبطه ميزان جسمي اختل، اومال اللي بيقولهم وهما مرضى سكر رسمي وابر انسولين وقفوه وافطروا نوتيلا ومربي واشربوا عصير صناعي وبلا أزرق، وكم الناس اللي آمنت بافكاره وفي اللي مات وفي اللي لسه بيقاوح، ده دليل إننا فاضيين جدا من جوه وناس سهل تقودهم باسم الوهم والجدل بسهولة.

شقى عمري كله راح وابو كمال وروقه بيعرض الآن، المهم إني لاحظت إن صوت نور الشريف بقا من الحاجات اللي برتاحلها مؤخرا وبترجعني لشعور مألوف قديم.

وانا محلقة في سماء الجريمة اللي بقينا مش ملاحقين عليها كل يوم، في جرايم القتل بالتحديد عقلي يوديني بدون ترصد لأن إبليس اختتم حفلته الكبيرة وقدر يتمكن من الإنسان ده وخلاه ينفذ أفظع فعل بشري على الإطلاق، خلاص ريحته من الدنيا بسفك دمه بدون وجه حق، قابل بقا عذاب الضمير دا إذا عشت يعني ومطيروش رقبتك. طيب هيخلص ذنبه بأخذ روح بروح الله أعلم؟ هل بالقصاص هنا ونتيجة غدره هيخفف حكمه عند ربنا برضو الله أعلم؟ المهم بتخف من دماغي نهايته ايه؟ وبتروح من دماغي يا ترى عمل كده ليه شوية بشوية والموضوع مش بيوصل لبُعد عالي وليفل إني اكره حياتي بكده لاء بتعدي. إنما في حالة الوساخة في تنفيذ حقارتك واجرامك واشوف حد بيضرب جامد طفل صغير أو راجل كبير على سبيل المثال وبتورثه الذل ويعيش بأمراض نفسية طول عمره وتحرمه إنه يعيش إنسان سوي، فدماغي مش بتوديني للشيطان هنا معرفش برضو ليه؟ لاء بشوف إن دي عملتها والشيطان نفسه قرفان منك وانا عادي نفسي اجيب بنزين واولع فيه قدام عيني ومش هتعاطف كمان. إنت معملتش جريمة كبيرة هتاخد القصاص فيها بعدين، لاء؛ إنت مش متشاف حتى من نفسك، فالإنسان ده بعتبره ملوش توبة ده مطرود من رحمة ربنا وكل القلوب رافضاك وبتنفر منك.