“Strange goddess, witch, and daughter of night"

كوني إنتِ، مرة بصدق ومرة بحكمة.

طوري مهاراتك وحنكتك، لأنك بالحياة بدك تكوني حكيمة وذكية أكثر من أي شي تاني.

لما تضحكي اضحكي من قلبك وعالآخر وقهقهي.

لما بدك تعملي شي تفكريش بردود فعل الناس، فكري بايش رد فعلك أنت تجاه نفسك.

إطلعي من دور الضحية وشدّي بعضك.

تكرهيش، الكراهية مشاعر بتدل على أهمية المكروه/ة عندك. صَفري مشاعرك تجاهه/ا.

لما بدك اشي تقعديش تستنيه، اعمليه.

عندك طلب أو توقع؟ أطلبيه وإحكيه، الناس مش عايشة براسك.

كوني فعل ومش رد فعل.

حبي الناس اللي بتحبك والبقية ما تفرق معك.

عيشي الطفلة والمراهقة اللي فيكِ حتى لو صرتي بنت ستة وستين.

مرات عدّي للعشرة وخُدي نَفَس.

اتطلعي كل يوم بالمراية وشوفي قديش أنت مميزة وقولي أنا أذكى وأحسن وأحلى انسانة.

تخجليش، لما بدك تغني غني ولما بدك تصلّي صلّي، حتى لو بالشارع، بدك ترقصي ارقصي حتى لو بالمصعد، بدك تحكي قصيدة قوليها وين ما أنتِ.

لما بدك تحكي لحدا اشي احكيه، لأنك يمكن اليوم تقدري وبكرا لأ.

إذا حدا بيغلط/بتغلط معك هاد بيدل على ايش هي/هو ومش على شو إنتِ.

كوني حرة بس ما تدعسي على حدا.

قوتك كامرأة عظيمة، استخدميها للشراكة مش لمطاعجة الأيادي.

إدعمي وأعطي طاقة بناءة وحلوة للي حواليكي.

أعطي منك وما تبخلي بأي اشي للي بيستاهل/بتستاهل عطائك وإذا طلع/ت عكس توقعاتك، فهاي مشكلته/ا والخسارة خسارته/ا.

تحكميش على الناس، مش بالضرورة اختيارك هو اللي صح، مثل ما اخترتي نهج حياة هي/هو اختار/ت نهجه/ا، عجبك أو ما عجبك، هاي مشكلتك، حليها مع حالك على جنب.

كوني فخورة بحالك واكبري، بس تواضعي وما تتكبري.

تندميش على اشي عملتيه، لأنك لما عملتيه كان صح.

فيه منك وزيك كثير، عشان هيك تميّزي وكوني الأولى في إشي واحد على الأقل.

بدل ما تقيمي موقف غيرك، احكي موقفك إنتِ.

إذا بتشوفي غلط قدامك وبتقدري تغيريه، غيريه لأنه بالآخر عالأغلب بيوصلك ورح تتعرضيله.

إذا بدك تتطوري تجاوزي نفسك وتجاوزي سقف حالك.

لما بدكش اشي، قولي بوضوح: بديش.

اعملي رياضة بتحبيها، لو مو رياضة سميها إنتِ رياضة.

عيشي على أساس لما تتطلعي وراكي تقولي: أنا عملت اشي لهالعالم.

تكونيش جزء من قطيع، أي قطيع.

بتسمعي اشي؟ مهم الك؟ روحي وابحثي عن المعرفة، تحرري من ثقافة "هنن قالولي".

تعلمي وسيلة دفاع واحدة، مش مهم شو وكيف.

في اشي فيكِ بتحبيهوش؟ غيريه لحد ما تعشقي نفسك، مو بس تحبيها. مش عم بحكي عن المظهر هون.

احكي بلسان الأنثى وخاطبي الأنثى، دائمًا. عشان النساء والبنات والصبايا اللي بتحبيهن.

انعشي روحك، الروح هي الأهم والجسد مادة راح ياكلها الدود، لكن لا تنسي إنه بإنعاش الروح مرات لازم تنعشي جسدك.

كل فترة اعملي تغيير مهم وكبير بحياتك، قد ما كان صعب، علمي حالك كيف تتكيفي مع التغيير، علمي حالك كيف تبطلي تتعلقي.

تنفسي كتير.