Saturday 11-04-2015 Sunday 12-04-2015 & suddenly I stopped being afraid of life, & instead willing to live it! اعتقد اني ممكن اصنف البشر لنوعيين…النوع اللي بينط ف البحر و هو عارف انه ممكن يتعور…و النوع اللي بيخاف من البحر حتى و هو هادي و بسيط و ممتع و بيكتفي بالنظر له. صعب تلاقي نوع تالت ف النص…صعب تلاقي شخص بيحب البحر نص نص….او شغفه بالبحر محدود…يا بيبقى الشخص عاشق للبحر لدرجة تخلي حبه له يطغي على خوفه منه…يا بيكون خايف منه اكتر بكتير مما ممكن يحبه. و التصنيف ده سهل اوي يعرفك حاجات كتير عن البشر…عن سكان كل مجموعة…و عن اللي جاي. “I know you are hard to deal with, & I love you for it…but give him some slack” الحلو ف الناس القريبة مننا مش انها بتبقى مدركة عيوبنا و شكراً على كده…متقبلها و شكراً على كده….لأ, بتبقى عارفة عيوبنا, متقبلها, متعايشة معاها, و قادرة تتعامل معاها. حاجة زي المقولات اللي بتتكلم عن الاشخاص اللي الوحوش اللي جواهم بيعرفوا يرقصوا مع الوحوش اللي جوانا. حاجة زي قدرة اشخاص على فهم الكلام اللي بتقوله و هو مش مترتب و ماحدش اوي سهل يفهمه…بس هما فاهمين الكلام نابع منين,ف بيكملوا الاجزاء اللي مش مفهومة فيه. خليكوا ناس حسيسة, بتنصح اللي بتحبهم و هي ف نفس الوقت بتفكرهم انها بتحبهم, وانهم حلويين, و ان الحياة بسيطة. و حافظوا على الناس الحلوة, اللي مش بتستنى الناس القريبة منها تشرح لها اللي بين السطور, عشان يوصل لها اللي هما حاسينه. “All that is worthy, is scary” و شكراً انك بتيجي تقول لي ان الخوف مش وحش…و بعدين بعدها بساعة تقعد جمبي ن فريك اووت سوا…شكراً انك مش بتخجل تبين الجزء اللي هش فيك, بالعكس, بتستوعب قد ايه ده بيزود من انسانيتك مش بيقلل منها. و انك بتسيبني اتفلفس و مش بتسمي ده فلسفة فارغة…و بتسيبني اقول كلام مالوش علاقة ببعضه, من غير ما تحس اني بتكلم ف عشرين موضوع ف نفس الوقت…و على الخفة. و شكراً على الونس اللي بيخلي الحياة اخف…و بيفكر الناس انهم حلويين جداً, بس طول ما الرفقة غلط و انت مش مرتاح, طول ما عمرك ما حتكون باحلى صورة ممكنة لك. “the truth is hard, shocking & it hurts…but sometimes, you have nothing to serve them but it” زمان كنت لما ببقى لازم اتكلم بصراحة, كنت بحس ان ده فيه شيء من القسوة, و ان ده بيحملني ذنب اكبر من اني استحمل حمله. و بعدين مع الوقت, و مع مرور الزمن…اكتشفت ان معظم المواقف اللي وجعتني انا شخصياً, كانت لما طلبت الحقيقة و الاشخاص في المقابل ادوني حقائق مقنعة او هربوا من انهم يرموا الحقيقة زي ما هي ف وشي. و زعلت على كل مرة حاولت اقول فيها اي كلام مزوق او افرش الطريق للحقيقة بورد…عشان ده كان فيه ظلم للاشخاص اللي طلبت مني الحقيقة و مالقتهاش. ف بقيت مؤخراً برمي الحقيقة زي ما هي, مهما كانت بتوجع, عشان اللي قدامي يستحقها…, يستحق كمان كام سنة لما يفتكرني, حتى لو كرهني, يبقى فاكر اني ما بخلتش بالحقيقة و ماحاولتش اكون الشخص اللي بيلوي ايد الحياة عشان يحميه و بيقلل من قوته على تحمل الحياة زي ما هي كده. و بقدر ما بيوجع لما بترمي في وش حد حقيقة عارف انها ممكن تكون حتوجعه, على قد ما بعدها بتحس انك مالبستش وشوش و استخبيت ورا حيطان و جريت للحلول السهلة. لان على قد ما الحقائق قولتها بتوجع, على قد ما قولتها محتاجة شجاعة….و تخبئتها, جبن خالص و ان كان بيفضل يقنعنا انه احساس و مراعاة لمشاعر الغير!

Matter of fact!