🦢 No Dm.

وقال إنه من الدعم الفني لشركة ڤودافون وفيه مبلغ إتضافلي من الشركة تعويضًا للرسوم اللي بتتسحب من كل تحويل او سحب بعمله وفي بداية المكالمة خالص قال إسمي بالكامل وبياناتي وده اللي خلاني مشكيتش فيه خالص ده غير ثباته وطريقته في الكلام وغير كل مسدچ وصلتني بالخطوات على Vodafone cash الأصلي يعني مش مسدچات فيك

ومخدش الباسوورد ولا طلبه بس كان متحكم في بياناتي كلها، وفيه كود وصلني وهو طلبه عشان يأكدلي خطوات النصب كامله بقى و بعدها ببص في حسابي لاقيت الرصيد صفر 0

وغلطتي اني من عدم تركيزي وسهو مني غصب عني قولتله الكود اللي وصلني في مسدچ متوثقه

الله يعوض عليا وكله خير الحمدلله بس أنا مش قادرة أستوعب الموقف لأن ده عمره ما حصل فيا ولا اتعرضتله قبل كده وطبعًا لما إتصلت بعدها خلاص هو الخط إتقفل وغالبًا كسره

والمشكلة إن ناس كتير محذرة من الموضوع ده بس كل حاجه اتقالت منه و بياناتي الكاملة اللي معاه حتى تواريخ تحويلاتي بالميعاد ده اللي خلاني مديتش اي خوانه، ياريت تخلوا بالكم بعد إذنكم و بلاش اي حد يرد على أرقام غريبة ولا يصدق الطريقة الثابته اللي بيتكلموا بيها ده حتى حاطت نغمة الويتينج نفس بتاعة ڤودافون بالظبط وحقيقي أنا مش فاهمه ده كله بيتعمل إزاي

ولما كلمت خدمة عملاء ڤودافون نفسها واشتكيت باللي حصلي وبرصيدي اللي اتسرق كله قالولي للأسف يا فندم ربنا يعوض عليكي "نصًا كده" اللي هو معلش ربنا معاكي مش هنقدر نفيدك بحاجه حتى بيانات الرقم اللي سرقني رفضوا يدوهالي عشان اعمل محضر في مباحث الإتصالات وقالولي معلش ده عميل ومنقدرش نقولك بياناته يعني نصاب و حرامي وهما مسميينه عميل !

ومش دي المشكلة بردو، المشكلة إن حتى مباحث الإتصالات مبيردوش ومفيش اي مساعدة او حماية من اي جانب، وعندهم حق هو القانون لا يحمي المُغفلين وانا كنت اكبر مغفلة النهاردة 😅

الحمدلله على كل شيء ياريت تاخدوا بالكم جدًا.

El Alamein, North Coast