عـــابِر

بس الحقيقة إنه كل لما يجي موقف من المواقف الكبيرة تكشف الواحد قدام نفسه إنه أد إيه بيعشق البلد دي .. مهما مرّت على الواحد مواقف تخيّل فيها إنه عشان تعب فهو بطّل يحبها، تيجي حاجة زي دي تعرّفك إن إنت كنت واهم مش أكتر .. ممكن الواحد مش قادر يعيش فيها زيادة آه، لكن مهما بِعد وسافر ولا هاجر هتفضل روحه غريبة زي الطير الشارد.

أتمنى من ربنا سبحانه وتعالى قبل ما يقضي أجلي أكون لحقت أشوفها زي ما أحب .. انتهى.

لإن اللي حصل إمبارح للأسف استحضر في الذهن كل الأحلام والأماني التي نالت من الإنسان ولم ينالها .. استدعى الخيبات التي كانت في طي النسيان لتشابه الشعور .. الشعور الذي لا يسعك شرحه ولا تستطيع إيقافه ليمتد .. الشعور الذي يدخلك إلى الوجوم.

أنا حقيقي قلبي وجعني إمبارح ولسة الحقيقة، والإحساس دا أنا حسيته في حياتي مرتين ودي التالتة .. الزعل مش على ماتش كورة والله .. الصورة أعمق وأشمل من كدا بكتير أوي.