²

ورغم ده بتحصل مواقف بتدوس على ذكرى كانت مابينا ، فحتى الشغل مش نافع ، لما باخد بريك للصلاة بفتكر قعدتنا سوى فى مسجد النادي وكلامنا الطويل ونقاشنا … أنا حتى مبقتش أروح النادي ! بهرب من أي مكان كان بيجمعنا ، لإني عارفة نفسي لو دخلت في اكتئاب مش هطلع منه بسهولة…

"إنّ الله معنا" مش مجرد جملة، دي يقين بيخلي أضيق الأماكن وأصعب الظروف تتحول لسكينة !

ألا وهو مشاعرنا بعد منكتشف إن اللي حولينا بيحبونا " حُب مشروط " … اللي هو أنا بحبك طول مأنت بتقدملي حاجة أنا بحبها ، طول مأنت بتخدمني في مصالحي ، ومع أول توقف منك عن خدمة مصالحهم ، بتتحول لشخص سيء في نظرهم :)

و إن مكانتك عند البعض كانت مجرد "وظيفة" بتأديها، مش لشخصك ، وإنك دايماً في "سباق" أو اختبار، لازم تفضل تجري وتُعطي عشان تحافظ على رضاهم ..

حصلي موقف النهاردة خلاني أقول ليه وألف ليه؟ ليه الناس مبتصدقش إنك بتعمل الخير لله ومش عاوز منهم مقابل؟ وليه نظرات الاستغراب بشوفها في عيونهم لما بمدلهم إيدي، وأول حاجة بتتقال: المقابل إيه؟

الست دي سببتلي أذى أكثر من مرة ولإني مضطرة أتعامل معاها كنت دائمًا ببادر بالسلام وتقديم الخير ليها ولأولادها، كنت بشوف الفرحة في عيونها لما بيحصلي حاجة وحشة وفي ضحكها وهزارها وأنا في أيامي السيئة ..

ورغم ده كنت بتغافل وأقول أجري على الله ، النهارده سمعت خبر وحش عنها وإنها تعبانه جدا، الغريب إني حسيت قلبي فرحان :" وخلاص هبتسم بس لحقت نفسي وقولت " هو في إيه يا فزدق، احنا هنشمت ونفرح لوجع غيرنا ، دي مش أخلاق ناس قلبها سليم !"

فضلت ساعة في دوامة وصراع بيني وبين نفسي !! ليه أحس إحساس حيوان زي ده ، وما هديت إلا لما روحت زورتها، وأخدتها في حضني وواسيتها وبإذن الله يوم الخميس هروح معاها المستشفى واقف جنبها … مش علشانها ! علشان قلبي محتاج يتربى ويتطهر من الشعور اللي حسيته …