Erna Valborg

Bergdís er byrjuð að skríða, eða draga sig áfram. En hún er sko orðin snögg og allt sem er í gólfhæð og er ekki dót er í stórhættu að vera nagað. Í stofunni erum við með hvíta Kallax hillu úr Ikea. Í neðstu hillunum eru DVD myndir og karfa með föndurdóti og sprittkertum. Þessar hillur toga mjög sterkt í mína og hafa þónokkrar myndirnar fengið handfjötlun frá litlum puttum. Snögg ákvörðun var því tekin um að skreppa í IKEA og splæsa í tvo kassa til að setja í sitthvora hilluna. Þremur vikum seinna (bíllinn er búinn að vera bilaður) lá leiðin loksins í Garðabæinn.

Útkoman varð svona:

Núna getur hún gengið í (skriðið) hillurnar eins og hún vill og nagað eins og hún vill. Kassarnir eru líka alveg nógu léttir svo hún á auðvelt með að draga þá sjálf út og sækja dótið sitt sem er geymt í þessum kössum. Geymsluplássið í 45fm íbúðinni okkar er heldur ekki það besta svo þetta er mjög góð lausn til að geyma hennar dót.

Svo snyrtilegt. Og hún sátt.

Gleðilegt sumar elsku vinir og takk fyrir veturinn. Við komum sko vel undan vetri hér og hoppum brosandi kát inn í sumarið. Byrjuðum sumarið með göngu um Kópavoginn. Bergdís var sko sannarlega sátt við að fá að sitja síðustu metrana heim og geta séð aðeins umhverfið í kringum sig. 

Hefðum þurft að taka sólgleraugun með. 

Ég ákvað að vera rosa sniðug og skella dömunni í smá myndatöku í tilefni dagsins og því hún var í svo fínum kjól. 

Þennan kjól keyptum við í F&F í janúar. Hann átti að passa í sumar. Hann smellpassar núna. 

Þetta bros bræðir mig í hvert skipti. 

Kanínan fékk strax meiri athygli en ég. 

Og hún var ekki lengi að vippa sér yfir á magann til að eiga auðveldara með að naga hana. 

En ég fékk samt bros :)

Góður dagur, eins og þeir eru reyndar allir með þessari síbrosandi elsku. 

Pinterest. Ég elska pinterest. Ég get alveg gleymt mér við að skoða allskyns sniðugt og nota þessa síðu óspart til að fá hugmyndir. Ef ég ætti ekki barn sem þyrfti að sinna væri ég örugglega mjög virkur fíkill. 

Hér eru síðustu sex hlutir sem ég pinaði.

Hugmynd fyrir barnaherbergi, þegar kemur að því að Bergdís eignist sitt eigið.

Mælistika. Í hurðargatinu inn í eldhúsið heima má sjá hæð okkar systkina frá unga aldri alveg upp í hæð okkar í dag, merkt með dagsetningu. Mér finnst það mjög sniðugt og svo gaman að skoða það í dag. Þessi hugmynd heillar mig í því að merkja hæð inn á því það er miklu auðveldara að taka þetta með ef/þegar við flytjum heldur en hurð. :)

Barnaherbergi. Það er svo gaman að fá hugmyndir af fallegum herbergjum. Indjánatjald er á to do listanum.  

Hárgreiðslur fyrir sumarið. 

Lestrarhorn. Hún er strax farin að sína bókum mikinn áhuga, bæði til að naga og skoða myndirnar, og stefni ég á að kaupa helling af bókum fyrir hana. Þetta er mjög sniðug lausn.

Sumardrykkur. Svo girnilegur og örugglega hrikalega svalandi. Sé mig alveg fyrir mér með hann í svölunum í sumar. Og sólgleraugu, auðvitað. Það verður sól í allt sumar. 

Þið getið fundið mig og elt mig á pinterest hér - https://www.pinterest.com/ernabjorgvins/

Þegar Bergdís var 8 daga gömul vann ég ungbarnamyndatöku í Facebook leik hjá Hörpu Hrund ljósmyndara. Litla skottið lét mig sko alveg finna fyrir sér þar sem ég fékk bæði yfir mig gubb og drullu í þeirri myndatöku. En myndirnar voru góðar. Og úr varð tilvalin jólagjöf fyrir alla nánustu. Við sjálf fengum svo nokkrar myndir í albúmi og tvær stórar til að hengja upp á vegg. 

Nú, aðeins 6 mánuðum síðar, eru myndirnar svo loksins komnar upp á vegg. Og ég er hrikalega ánægð með útkomuna. 

Efri myndin er jólagjöfin. Neðri myndin var of góð til að sleppa henni. Bergdís varð líka alltaf brjáluð þegar við reyndum að halda á henni í apastellingunni þótt hún væri með magakveisu, svo þetta er mjög lýsandi mynd. 

Prjónakonan mikla, ég, á bara eftir að klára úrtökuna í þessari húfu. Húfan hefur legið þarna síðan í byrjun apríl. Fæ enga orðu fyrir þessi afköst.

Ég er svo sátt við þessar myndir og hvernig þær koma út. Get ekki hætt að dást að þeim. 

Síðan Bergdís fæddist hef ég haft augun opin fyrir fatahengi eða snögum til að hengja útifötin hennar á. Í skærum litum, með dýrum, hvernig sem er, en ég fann ekki neitt sem mér fannst nógu fallegt. Um helgina áttum við svo leið í IKEA, þar rákumst við á þetta fína fatahengi sem við ákváðum að kaupa og mála. 

Mynd er stolin af ikea.is því ég tók enga fyrir mynd. Snaginn heitir Leksvik ef þið hafið áhuga.

Eftir miklar vangaveltur um lit ákváðum við að mála það blátt. Bleikur kom sterkur til greina líka en mér finnst þessi litur yfirburða fallegur. 

Komið upp og tilbúið til notkunar. 

Barnið á fleiri útiföt en ég.

Er mjög, mjög sátt við þetta. 

Stærð krílis: Á stærð við banana.  Mér líður: Mjög vel. Komin austur, sumarvinnan að byrja og bumban er mætt á svæðið. Nældi mér samt í kvefpest en hristi það fljótt af mér.  Matarást: Pepsi! Mmmm, get drukkið það í hvert mál! Ávextir og klakar. Og bakaðar baunir, nammi. Matarhatur: Er nýbyrjuð að geta drukkið kaffi aftur, hefði getað skrifað það hér síðast. Annars get ég ekki hnetusmjör eða neitt svona þykkt og þungt á bragðið. 3 kostir í maí: -bumban sprakk allt í einu út -byrjuð að finna fyrir fyrstu hreyfingunum/loftbólunum -fékk að vita kynið á krílinu sem er svo bara lítil prinsessa 3 gallar í maí: -nældi mér í pest -passa ekki lengur í gallabuxurnar -það er ennþá svo kalt  Bý í: Kjólum og leggings, buxurnar eru byrjaðar að þrengja of mikið að. Hlakka til: Að finna almennilega fyrir hreyfingunum! Dreymir um: Sól, hita og sandala.

Ég sá svolítið á ferðalagi mínu um netið sem ég ákvað að stela. Því ég held að seinna meir verði gaman að geta lesið yfir þetta aftur og rifjað upp hvernig mér leið. Ég stal þessu héðan. 

Svona hefur apríl verið:

Stærð krílis: jafnstórt og laukur.  Mér líður: orkumeiri en á fyrsta hlutanum. enn að átta mig á þessu en það kemur hægt og rólega. fyrsta mublan og nokkur föt komin svo þetta er orðið svolítið raunverulegt.  Matarást: ávextir og allt sem er ferskt. og pepsi, ég gæti drukkið pepsi í lítravís. Matarhatur: það er ekkert sérstakt sem ég get ekki. 3 kostir í april: -dagurinn er lengri -orkan er meiri -skólinn alveg að klárast, sem þýðir bara sónar. 3 gallar í april: -verkur í mjóbaki -kláði í brjóstum og maga -ekki farið að sjást nóg, lítur út eins og ég sé bara að fitna. Bý í: gallabuxum ennþá, á meðan ég get og eins lengi og ég get. Hlakka til: að fara 20v sónar og fá að vita kynið. er alltof forvitin til að sleppa því! Dreymir um: sumarfrí og sól og að fara austur.

Jæja krakkar. Þá er þetta hafið og gengur vel. Lol, 2 dagar búnir. 

Ég bauð bróðir mínum og mágkonu í mat í gærkvöldi í kjúllasúpu. Allir þessir rigningardagar kalla bara á delish súpu, right? Allavega, ég fann einhverja uppskrift á netinu. Já, kokkurinn er ekki í mér svo ég þarf alltaf að fara eftir uppskriftum, þótt mér finnist alveg virkilega gaman að elda. Jæja, súpan átti að vera fyrir 5-6 manns. Fínt hugsaði ég, þá á ég afgang í matinn á morgun, því bróðir minn er stór maður og mikið matargat. 

Ég byrjaði að elda blessuðu súpuna. Grænmeti, vatn, tómatsósa og skornir tómatar í dós fóru í pott ásamt einhverjum kryddum. Kjúlli steiktur og hent svo ofan í. Yfirborð súpunnar hækkaði hratt og enn átti rjóminn eftir að fara saman við. Á þessum tímapunkti var ég byrjuð að svitna á efri vörinni. Hellti svo rjómanum útí og sá þetta allt fyrir mér flæða upp úr 5l pottinum og yfir alla eldavélina, út á gólf. Þetta slapp fyrir horn hjá hamfarakokkinum, eins og sést á myndinni hér fyrir neðan. 

Við borðuðum öll með bestu lyst, mikið sem hún var góð. Meira en helmingur var samt eftir svo ég sé fram á súpu í hvert mál út næstu viku líka. Vill einhver koma í mat? Þetta er samt fínt, mér finnst ekki gaman að elda fyrir mig eina. 

Fyrsta markmiðinu er náð. Ég splæsti í glænýja ræktarskó - ohmægood hvað ég hlakka til að fara í ræktina. Þeir eru svo fallegir. Aah. Enda eru gömlu Nike alveg að syngja sitt síðasta. Táin komin í gegn og farnir að rifna á hliðunum. Fór víst alveg með þá að fara í fótbolta á þeim á battavelli í sumar. Oft. Svo þetta eru alveg samviskulaus kaup.  

Hjartað er glatt. 

Það er kominn tími á að endurvekja þetta blessaða blogg áður en það endar á sama stað og Geirfuglinn, þótt það fengi líklegast aldrei sæti á fuglasafninu. Þetta byrjaði upphaflega á meistaramánuði og þar byrjum við aftur. Ég ætla að láta undan þverskunni og taka þátt í ár, ég þarf svo á því að halda bæði líkamlega og andlega. Taka klysjuna á þetta alla leið. Markmiðin eru komin á blað og hausinn er kominn á réttan stað. Þá er bara biðin eftir 1. okt. (Það eru bara svindlarar sem þjófstarta). Og ég er búin að skrá mig. Var númer 2.127. Akkurat happatalan mín. 

Ég var búin að skrifa færslu sem ég ætlaði að láta fylgja hér með. Ég guggnaði svo hún verður bara fyrir mig, enn sem komið er allavega. Hún er of persónuleg. Eitt af markmiðiunum er að geta lesið hana aftur eftir mánuð og hugsað; þvílíkt bull. Það er í raun aðalmarkmiðið. Þetta klysjukennda. Líða betur í eigin skinni. Endurraða hugsunum og forgangsraða. Já. Kannski þori ég. 

Meistaramarkmið: • fylgja ræktarprógramminu 100% - nema þá 2 laugardaga sem ég er að vinna, þá er útihlaup í staðinn því ræktin er lokuð fyrir og eftir vinnu.  • enginn bjór - omg.  • svindldagur á laugardögum - leyfilegt er smá nammi, t.d. súkkulaði með kaffinu og ein óholl máltið. • splæsa í nýjar gardínur - tja, já það hefur tekið dálítinn tíma að finna gardínur og því gardínulaust í Hamraborginni. Held það sé kominn tími á að redda því, er nú bara búin að búa þarna í rúm 2 ár.  • versla mér eitthvað fallegt - fyrir heimilið eða fyrir mig, skiptir ekki máli en þetta er gott fyrir sálartetrið af og til.  • eiga gleðidaga* með frændsystkinum mínum - þau stækka alltof hratt! • vinna í spegilmyndinni - sjá færslu. 

Svo þetta vanalega; drekka vel af vatni, ná góðum nætursvefni, vera lærdómssamviskusöm..

*Gleðidagar snúast um að stela börnum (með leyfi foreldra) í nokkra tíma einn dag. Gleðidagur getur falist í því að fara í bíó, kíkja í fjölskyldu- og húsdýragarðinn, fara út á róló, gefa öndunum. Allt sem okkur dettur í hug að gera. 

Síðasta helgi var góð helgi. 

Foreldrar mínir komu suður og voru alla helgina. Mamma er nýbúin að eiga afmæli svo við notuðum tækifærið og gáfum henni afmælisgjöf þegar hún kom suður. Við vorum búin að banna henni að plana nokkurn skapaðan hlut á laugardeginum en plönuðum hann í staðinn fyrir hana.

Dagurinn byrjaði á að ég skaust í próf. Kom svo við í blómabúð og færði henni rós þegar ég kom heim, smá gjöf og bréf með leiðbeiningum fyrir daginn.

Í bréfinu var útlistað hvað hún þyrfti að hafa með sér fyrir daginn. Fyrsti hlutinn var dekur í Blue Lagoon Spa í Hreyfingu. Pabbi vissi af því. Hann vissi samt ekki að við systkinin ákvaðum að panta paradekur. Svo saman fóru þau. Ég notaði tímann og fór í salinn á meðan.

Næst fórum við í brunch á Bergsson. 

Fallega "afmælisbarnið".

Faðir minn. 

Í "forrétt" var skyr með hindberjasósu og hnetum. Nammi gott.

Brunchinn í öllu sínu veldi. Mæli klárlega með'onum.

Kaffiþyrsta manneskjan.

Á leiðinni í bílinn kíktum við aðeins í kolaportið og náði ég að kaupa mér svartan blazer á 1.000 kr. Búin að leita af svona lengi svo þetta voru virkilega góð kaup. Já, og tælenskan harðfisk. 

Pabbi eldaði svo dýrindis kvöldverð handa okkur, með graskeri. Það er jafn gott og það er fallegt. 

Svona endaði kvöldið svo. Himininn einstakur og ekki skemmdi útsýnið, maturinn og félagsskapurinn. 

Ég kemst alltaf nær og nær þeirri skoðun að ég sé matarfíkill eða allavega með snert af einhversskonar matarfíkn. Ég hugsa um mat, allan daginn. Frá því ég vakna og þangað til ég fer að sofa. Ég hugsa hvað ég eigi að fá mér í kvöldmatinn áður en ég borða hádegismatinn. Á kvöldin er ég orðin spennt að borða morgunmatinn daginn eftir. Ég stóð mig meira að segja að því í morgun í ræktinni að velta því fyrir mér hvað ég ætti að hafa í kvöldmatinn á meðan ég var að gera niðurtog. Það er slæmt. Matur er bara svo góður. 

Það er samt orðið svo kalt á morgnanna. Eina sem blívar er 66°N peysan og dúnúlpan. Hendast í skólann og beint í Hámu fyrir fyrsta kaffibollann. Svo getur dagurinn byrjað. Veðrið í morgun var samt einstaklega fallegt. Skólinn er bleikur og sólin var að koma upp en það var samt enn nógu dimmt til að sjá litinn á skólanum og sólina speglast í gluggunum. Fallegt.

En aftur að mat. Þegar ég er heima í kaffinu þá geri ég eiginlega alltaf pönnsurnar auðveldu; eitt egg, hálfur banani, smá haframjöl og dass af kanil. Ég ákvað að prufa í dag að setja smá berjasaft út í, svona áður en hún myndi klárast. (Já mamma, ég er að verða búin með saftina sem pabbi kom með um helgina.) Það fannst ekki mikið berjabragð, góðar voru þær þó. En mikið agalega voru þær ljótar. Urðu gráar á litinn og einstaklega ógirnilegar. Ég smurði þær svo með smá hnetusmjöri og hellti mér upp á kaffi með. Mæli með þessum pönnsum. Fljótlegar, auðveldar og fáránlega góðar. Sleppið samt saftinni ef þið viljið hafa matinn ykkar girnilegann.

Ljótt en gott. 

Eftir langa umhugsun, mjög langa ehe, ákvað ég að hafa einn uppáhaldskjúlla réttinn minn í kvöldmatinn. Sem er svo auðveldur og góður.

Kjúlli með mozarellaosti og tómötum ásamt sætum kartöflum, í ofni. 

Það er ekki alveg í lagi með mann. (kemur kannski engum á óvart) :)

Ég var löt í um eina og hálfa viku og kom mér ekki í ræktina. Á þessari rúmu viku leið mér eins og ég hefði þyngst um 10 kg og fannst erfitt að finna föt á morgnanna sem pössuðu. Ég byrjaði svo aftur í gær. Eftir um 1 og hálfan tíma í ræktinni leið mér eins og ég hefði misst 10 kg og ég get svarið það að maginn á mér var sléttari heldur en fyrir æfingu. Djöfull er maður klikkaður. 

Ég er í fjarþjálfun frá Háfit og var að fá meistaramánuðsprógram frá þeim (þótt ég hafi ekki ætlað að taka þátt þá má þetta). Svo það er all in næsta mánuðinn. Unnur ætlar með í ræktina í fyrramálið og ég veit að hún er að deyja úr spenningi. 

Ein ástæðan fyrir því að ég er nánast hætt að snooze-a á morgnanna er besti morgunmatur í heimi. Ab-mjólk með bláberjum og múslí. Einfalt en alltof gott.

Þetta er bara of gott til að vera satt. Elska líka þegar bláberin lita Ab-mjólkina. Já það þarf oft lítið til að gleðja mig. 

Kvöldmaturinn. Heilhveitinúðlur með fullt af grænmeti og kjúlla. Afgangurinn kemur svo með í nesti á morgun. Ég veit það elska allir matarmyndir. 

10 kílóin að leka af mér.