An ode to the ceiling

باقول الحمد لله إنه الموقف ده، حصل في الوقت ده، بالطريقة دي، عشان كل حاجة تبان في الأول ومايحصلش خساير أكتر من كدة في مرحلة متقدّمة. كنت فاكرة إنّي أطيب من إنّه يحصل لي الموقف ده، بس أنا مش أحسن من حد. بافتكر وبازعل وأرجع أقول الحمد لله، بعدها الموضوع مش بييجي على بالي بنفس القدر اللي كان بييجي بيه، بعدها بافتكر كل حاجة مرة واحدة وأزعل تاني.. وأزعل من نفسي عشان لسة فاكرة. ماما ساعات بتسألني لسة بتفكري في الحكاية دي، في نفس اللحظة بالظبط اللي الموضوع بيخبطني فيها تاني! كفاية يا ماما. ساعات باحسّ إنه ربنا بيعاقبني بالموقف ده، وساعات أقول بيحبني عشان كان عايزني أشوف حاجة وأتعلم حاجة. يمكن اتعلّمتها في وقت متأخر، بس احتمال لو كانت حصلت وأنا أصغر شوية ماكنتش هاتعلّم بنفس السرعة مثلًا؟ أو كان هيحصل بطريقة أسوء؟ الله أعلم. تاني، في أسوأ أحوالي، عمري ما كنت هاتخيّل إنه الموقف ده هيحصل معايا. على طول باتساءل ازاي الناس مستعدة تشيل ذنب أذية شخص آخر وتعيش بيه كدة؟ باقول الحمد لله إنّي لسة مش مدركة ازاي فيه ناس بتستسهل الأذى.. آه لو كانت جدتي عايشة، ماكنش حصل لي كدة، والله ماكان حصل كدة. تفسيري الطفولي الوحيد للإحساس ده هو إنّ جدتي كانت بتمثلّ الطيبة والبساطة، وبعد وفاتها ظهرت الوَحشة! كإن وجودها كان حصانة من أي شر. يمكن اليوم اللي مش هاتفاجىء فيه بقدرة الناس على الأذى، نسيان العقاب الإلهي دنيا وآخرة، والاستمرار في عدم رد الحقوق للناس، هيبقى يوم وحش أوي.. وماتمناش أفقد الشعور بالذهول، عشان وقتها هابقى فقدت الإنسانية فيّ.. ودي أسوء حاجة ممكن تحصل لي

شكرًا رياض السنباطي على مقدمة قصيدة "من أجل عينيك،" شكرًا على صولو جيتار عمر خورشيد بشكل خاص.. بس كدة بقالي ساعة باعيد وازيد فيها من شدّة الجمال ومش عارفة أوصل للست

من كام أسبوع كنت قاعدة في مكان ومعايا تليفون، وفيه بنت صغيرة جت قعدت على الكرسي اللي قدامي واستنت لحد ما أخلص المكالمة. الحقيقة، من زمان وانا بارحّب بالأطفال اللي بتعمل معايا الحركة دي، بس النهاردة، بقيت بارحّب بيهم بطريقة أكثر رسمية، يعني باتعامل معاهم كإنّهم ناس كبيرة هنجري حوار مع بعض دلوقتي لما بيقرروا يتكلموا.. ولو فِضلوا ساكتين، بافضل ساكتة أنا كمان.. بس الحق يتقال، معظمهم بيتكلموا ويفتحوا مواضيع ظريفة. ولد واحد بس اللي جه قبل كدة بطبق أكله، خلص الأكل وبعدها خد الطبق ورجع لترابيزة عيلته. البنت اللي شفتها من كام أسبوع، ورتني رسمة هي عملتها، الحقيقة كانت جميلة جدًا. ولو طفلة تانية ورتني رسمة تانية، هاقول لها دي أحلى رسمة.. وده عشان الحاجات دي ماتتقارنش ببعض خالص.. إمكانياتهم انّهم يصوّروا حاجة في خيالهم ويقدروا يحققوها في ورقة، ده شيء ساحر بالنسبة لي. مش مهم نسب ولا خطوط منطقية. انا لو أم، هابقى في قمة سعادتي وفخري لما ولادي يوروني رسوماتهم. البيت كله هيبقى فيه رسوماتهم، حياتي كلها هاملاها بيهم.. ولادي بيرسموا، دي حاجة مش قليلة أبدًا. البنت كانت مبسوطة أوي لما لقيتني معجبة جدًا بالرسمة بتاعتها. الحقيقة ماسألتهاش عن الشخصيات اللي في اللوحة، لأسباب تتعلق بمفهومي عن الخصوصية في الحوار بشكل عام، ومع الأطفال بشكل خاص. بس كانت رسمة جميلة جدًا، حسيت لو انتي عاملة معرض أكيد هاحضر وأشتري رسوماتك. كانت حلوة أوي الفساتين وشكل الجزم اللي لابسينها.. الخطوط لفتت نظري أوي، خطوط أطفال ساحرة. المواقف دي بقيت باحبّها وباقدّرها جدًا، ومش باخدها باستخفاف.. باعتبرها هدايا من ربنا، زي اليمام اللي بييجي يقف على الترابيزة شوية ويطير.. حاسة بقيت عارفاهم من بعض. شكرًا يارب

٢٩ يونيو ٢٠٢٦