eli's letterblr

Para kay M,

Hindi ko akalaing mayroon pala akong mga salitang gustong paulit-ulit na iparating sa iyo. Hindi ko rin alam kung bakit nga ba sinusulatan kita ngayon bagaman hindi naman tayo personal na magkakilala. Nakakatawang isipin na pasasalamatan kita para sa mga bagay na wala namang kabuluhan sa totoong mundong ginagalawan natin ngunit maikokonsidera kong napakahalaga para sa akin.

Nababanggit ko na rin naman ito noong mga nakaraang buwan sa tuwing magkikita tayo sa isang mundong buhay lamang para sa iilan. Salamat. Isang salitang nangangahulugan ng napakalalim. Isang katagang nagagalak at nagbibigay-pugay. Hindi man tayo lubusang at buong magkakilala ay nagpapasalamat pa rin ako sa napakabuti mong pakikitungo.

Isa ka sa mga estranghero sa buhay ko na masasabi kong hindi ko pinagsisisihang makasalubong. Napakababaw man ng leksiyon na naituro mo sa akin, malaki pa din ang naging parte mo sa istorya ko. Isa kang 'kaibigan' na hindi ko naman hinihingi pero dumating. Kaya naman maraming salamat.

Salamat sa pagsama sa'kin sa isang lugar kung saan maaari tayong maging bayani ng mga sarili nating buhay kahit na ito ay isang panandaliang libangan lamang. Kung sino ka man at nasaan ka man, gusto ko sanang malaman ang iyong katotohanan kung mamarapatin ng pagkakataon. Sa ngayon, lagi kang mag-iingat at sana sa araw na muli tayong magkita, sana maging totoo na tayong magkaibigan.

Salamat, M!

Hanggang sa muli,

Para kay K,

Kumusta ka na diyan? Ang panimula ng ating mga usapan nitong mga nakaraang araw. Mga tanong na kadalasan ay hindi nabibigyang kasagutan sapagkat para bang nagmamadali ang oras. Mga tawag na tila ba nawawalang kabuluhan tuwing nagpapaalam.

Kumusta ka na diyan? Paulit-ulit na tanong at paulit-ulit din sinasagot ng mga salitang walang laman. 'Okay naman' ang natatanging katagang palaging sinasambit kapag naririnig ang katanungan.

Kumusta ka na diyan? Aminin ang nararamdaman at maging totoo sa amin. Huwag ikubli sa isang tinig na hindi maintindihan. Narito kami na maaaring pagkwentuhan ng mga istoryang hindi pa nababanggit. Handang makinig kahit na saglit lang ang panahon na ibinibigay sa atin.

Kumusta ka na diyan? Huling tanong namin. Buksan ang pintuan at kami'y papasukin. At sa pagtatapos ng liham na ito ay laging ipapaalala, parati kang mag-iingat at tayo'y magkakasama rin pagdating ng bukas.

Hanggang sa muli,

Para kina R at E,

Maraming salamat. Mga katagang hindi ko madalas nababanggit pero gustung-gusto maiparating. Hindi man ako ang taong hinahangad ninyo nitong mga nakalipas na panahon, alam kong kahit paano'y nagagalak pa rin kayo sa aking pagdating.

Hindi tayo ang pakahulugan ng salitang 'perpekto' ngunit alam nating ang bawat isa ay isang mahalagang parte ng kabuuan. May mga pagkakataong hindi tayo nagkakaintindihan at minsa'y humahantong sa puntong hindi nagkikibuan, nangingibabaw pa din ang ating pagkakaisa at ang pag-unawa kahit na maraming pagkakaiba.

Kaya naman, ako'y nagpapasalamat at patuloy na magpapasalamat para sa lahat ng bagay. Isa kayong malaking leksyon sa buhay ko at isa sa mga piraso na bumubuo ng aking pagkatao.

Maraming maraming salamat sa inyo!

Hanggang sa muli,

Para sayo na nagbabasa nito,

Kumusta ka? Salamat at nakarating ka. Salamat sa pagbabasa. Ang mga liham na mababasa mo ay komposisyon ng mga pag-iisip na hindi naihatid sa kanilang mga patutunguhan. Mga salitang hindi masabi sa mga padadalhan. Mga sulat na maaaring para sa mga taong tulad mo, tulad ko mismo at mga taong hindi pa nagagawi sa lugar na ito. Inaasahan ko ang buong puso mong pag-unawa sa iyong mga mababasa sa mga susunod pang pahina. Salamat sa pagdaan mo rito.

Hanggang sa muli,

Si Eli ay isang taong nabibigo sa buhay ngunit nagtatagumpay din paminsan-minsan.

Si Eli ay isang pakiramdam na hindi pa nabibigyan ng pangalan at naipapakita ng hayagan.

Si Eli ay isang istorya na naghihintay maisalaysay at mapakinggan.

Si Eli ay isang sulat na hindi pa naipaparating sa dapat patunguhan.

Si Eli ay ako, maaari ding ikaw at maaari ding kahit sino o ano pa man.