ދެމިހުންނަނިވި ތަރިކައެއް
ފުންމިން އެނގުން ނުވާ ކަނޑުތަކުގެ އަޑީގައި އަގުބޮޑު އެތައް މުތެއް ފޮރުވިފައިވެއެވެ. ބޯ ޖަންގަލިތަކުގެ އެންމެ އެތެރޭގައި ކުލަ ރީތި ވަސް މީރު އެތައް މަލެއް ފަރިވެ ފޮޅި މިލައި މޯޅިވެގެން ގޮސްފައިވެ އެވެ.”
ޝުޢޫރަކީ އިނގިރޭސި ޅެންވެރިއެއްގެ ސިކުނޑީގައި އުފެދިފައިވާ ޝުޢޫރެކެވެ. މި ބީދައިން މީހުންގެ ތެރޭގައި ވެސް މީހުންނަށް ފޮރުވިފައިވާ ނޭނގޭ އަގުހުރި އެތައް މީހުންނެއް އުފެދި، ދިރިއުޅެ، ފަނާވެގެން ގޮސްފައިވެއެވެ. މިރާއްޖޭގައި ވެސް މިފަދަ އެތައް ޝަޚުޞިއްޔަތެއްގެ މިސާލު ވަނީ ފެނިފައެވެ. މިފަދަ އެންމެންނަކީ ދަރަޖަވެރިންނެއް، މުއްސަނދިންނެއް ނޫނެވެ. އަދި ކީއްހެއްޔެވެ؟ އެއީ، އެމީހުން ދަންނަ އަގުހުރި ތަކެތީގެ މުއްސަނދިކަމުން އެކަމަށް ގަދަރުކުރާ ބައެއްގެ ގޮތުގައި ފާހަގަވެގެން ހޮވިފައިވާ މީހުންނެވެ.
ލ.ގަމު މަންދަގޭ މުޙައްމަދަކީ އާދައިގެ މީހެކެވެ. ނަމަވެސް އޭނާގެ ސިކުނޑީގައި އެއްކުރެވިފައި ހުރި ޚަޒާނާއަކީ މިގައުމަށް ނުހަނު ބޭނުންތެރި ޚަޒާނާއެކެވެ. މި މުޙައްމަދު އަދާކުރި ވަޒީފާތަކުގެ ތެރޭގައި އެރަށު ކާޑުގޭ ކާތިބުކަމާއި މަދުރަސާގެ މުދައްރިސްކަން ހިމެނެއެވެ. މުދައްރިސެއްގެ ގޮތުން އޭނާ ކިޔަވައިދިނީ ޤުރްއާން، ދީނިއްޔާތު، ލިޔުން، ހިސާބެވެ. އޭނާގެ އަތުގައި މުދިންކަމުގެ ސަނަދު އޮވެއެވެ. ހުކުރުކުރުމާއި، ޖަމާޢަތްތެރިކަމުގެ ސަނަދުވެސް އޮވޭމެއެވެ. މިދެންނެވި ދީނީ މާއްދާތަކުގެ މުދައްރިސަކީ އަލްފާޟިލް މޫސާ ޖަމީލުކަމަށް އޭނާ ބުނެއެވެ.
އޭނާ ކިޔެވި ލ.އަތޮޅު މަދުރަސާއިންނެވެ. އޭރު މުދައްރިސުންގެ ގޮތުގައި ތިއްބެވި އެންމެ އިސް ދެބޭކަލުންނަކީ، ސުމުއްވުލް އަމީރު މުޙައްމަދު އަމީން ދޮށިމޭނާ ކިލެގެފާނުގެ ދައުރުގައި މަދްރަސަތުލް މަޖީދިއްޔާއިން ކިޔަވައިގެން ތިއްބެވި އަލްފާޟިލް ޢަބްދުލްކަރީމް އަލިމަނިކު ފޮނަދޫ އާއި އަލްފާޟިލް އާދަމް ޔޫސުފު ދަނބިދޫއެވެ. ޤުރުއާން މުދައްރިސަކީ ތ.ތިމަރަފުށީ އަލްޙާފިޡު މިސްރު މުޙައްމަދުފުޅެވެ.
މުޙައްމަދު، މަހަބަދިކަލޯ ވާހަކަ ދަސްކުރިކަމަށް ވަނީ، ގަމު ކަޅުސޮރުގެ ގާތުންނެވެ. އެއީ އުމުރުން 70 ވަރަކަށް އަހަރުވެފައި ހުރި ދުވަސްވީ މީހެކެވެ. އޭރު މި މުޙައްމަދުގެ އުމުރުންވާނީ 15 އަހަރުކަމަށް އޭނާ ބުނެއެވެ. އެދުވަސްވަރުން ފެށިގެން އޭނާ އަންނަނީ މިބާވަތުގެ ވާހަކަތައް ދަސްކުރަމުންނެވެ.
މަހަބަދިކަލޯ ވާހަކައިގައި އޭނާ ބަޔާންކުރާ ނާޖެއްސި މަގުކަމަށް އޭނާ ބުނާ ވޭމަގުގެ ދެފަރާތުގައި ރާނާފައިހުރި ފާރުގެ ނިޝާން މިހާރުވެސް އެބަހުރިކަމަށް ބުނެވެއެވެ. މަހަބަދިކަލޯގެ ނިޔާނުވި މާފަތްގޭގެ ގަލުގެ ނިޝާންތައް ވެސް އެބަހުރިކަމަށް ވެއެވެ. ސަންދޯއް ވަޅުލި ޒިޔާރަތް ހަތްތެލީގެ ދެކުނުން އެބަހުރި ކަމަށްވެއެވެ. ދުނިޔޭގެ އެތަން މިތަނުން މިއަދު ހޯދަން މަސައްކަތްކުރާ ފޯކްލޯ ނުވަތަ ފުލޯކީ ވާހަކައިގެ ޚަޒާނާއެކެވެ. އެކި ޤައުމުތަކުން މި ރާއްޖޭގައި ހުރި މިބާވަތުގެ ވާހަކަތައް އެއްކުރަން ޝައުޤުވެރިވެގެން، ކެނޑިނޭޅި ޒިޔާރަތްކުރަމުން ގެންދެއެވެ. އެބާވަތުގެ ވާހަކަތަކުގެ ތެރެއިން މިދެންނެވި މުޙައްމަދަށް ދިވެހި ޤައުމަށް ހަދިޔާ ކުރެވިފައިވަނީ މަހަބަދިކަލޯ ވާހަކަ އާއި ދޫނިދޫކޮއި ވާހަކަ އާއި މަޝްހޫރު ކަޅުކުރު ވާހަކައާއި ބަރުތީލަ އަލިފުޅުގެ ވާހަކައެވެ. ދެންހުރި ވާހަކަތައް ކިޔައިނުދެވިގެން އުޅެނިކޮށް އޭނާއަށް މިފަނާވަނިވި ދުނިޔެ ދޫކޮށްލަން ޖެހުނީއެވެ. އުފަންވީ ހިޖުރައިން 1338 ވަނަ އަހަރުގެ ޖުމާދިލް އައްވަލް މަހުގެ 16 ވަނަ ދުވަހުއެވެ. ނިޔާވީ 2012 ވަނަ އަހަރުގެ ޑިސެންބަރު މަހުގެ 18 ވަނަ ދުވަހުގައެވެ.
އަޅުގަނޑު ދަންނަވަން މިއުޅޭ ވާހަކައަކީ މިކަހަލަ އަގުހުރި އެތައް މީހުންނެއް ރާއްޖޭގެ ކަންކޮޅުތަކުގައި އަދިވެސް ތިބޭނެއެވެ. އެމީހުންނަކީ ބަޔަކު ފާހަގަކުރާވަރުގެ ބަޔަކަށް ނުވަނީކަން ނޭނގެއެވެ. އެހެން ނޫން ނަމަ މިބާވަތުގެ ތަކެތި އެއްކުރަން މިކަމަށް ޝައުޤު ހުންނަ މީހުން އަވަހަށް ރަށްރަށަށް ފުރާނެއެވެ. ވަގުތު ފާއިތު ނުވަނީސް އެތަކެތި ހޯދުމަށެވެ. މިއީ ޤައުމެއްގެ ހައިސިއްޔަތުން ޤައުމަށް ނުހަނު ބޭނުންތެރި، ދެމިހުންނަ ތަރިކައެވެ.
ރާއްޖޭގައި ކިޔަމުން އައި މަޝްހޫރު ކާތަކުގެ ތެރެއިން ރޯނުއެދުރު ކާ ގެއްލިދިޔަކަމަށް އަލްއުސްތާޒު މުޙައްމަދު ޖަމީލު ވިދާޅުވިއެވެ. ހަމައެފަދައިން ފުލޯކީ ވާހަކަތަކުގެ ތެރޭގައި ހިމެނޭ ހަންޏާމީދޫ ކަމަނާ ވާހަކަ ވެސް ގެއްލި ދިޔައީ ބާވައޭ ހިތަށް އަރައެވެ. ކޮންމެވެސް މަޖައްލާއެއްގައި އެވާހަކަ ލިޔެވިފައިވާ ވާހަކަ އެބަ އަހަމެވެ.
ކުރިން މި ދެންނެވި މުޙައްމަދު ކިޔާފައިވާ “ގަމު ރަށްބޭގެ ހަސަނު ވާހަކަ” ވެސް އެގޮތަށް ލިޔެވިފައެއް ނެތެވެ. މުޙައްމަދަކީ އަޖައިބެއް ކަހަލަ މީހެކެވެ. އެހެރަ ދިގު ވާހަކަތައް ހިތުން އެހެރަ ކިޔާލަނީއެވެ. ފަސޭހަކަމާއެކުގައެވެ.
މިބާވަތުގެ ވާހަކަތަކަކީ ޤައުމުގެ ތާރީޚަށްޓަކައި އެއްކުރެވިފައި ހުންނަން ޖެހޭ ވާހަކަތަކެވެ. މަޝްހޫރު ބޮޑުތަކުރުފާނު ވާހަކަ އަކީ ވެސް މިބާވަތުގެ ވާހަކައަކުން ކިޔެމުން އައި ވާހަކައެކެވެ. އެގޮތަށް އެވާހަކަ ކީ ބުރާރު މުޙައްމަދުފުޅެވެ. ފަހުން އެވާހަކަ އެއޮތީ ޙުސައިން ޞަލާޙުއްދީނަށް ފެނިވަޑައިގަންނަވާ ގޮތަށް ބަދަލުކުރައްވައިގެން އޭނާ ލިޔުއްވާފައެވެ. ދޮންހިޔަލަ އާއި އަލިފުޅަކީ ވެސް “ބުރުނީ ކަމަނާ ރައިވަރު” މި ނަމުގައި ރައިވަރު ބަޔަކުން ކިޔެމުން އައި މިބާވަތުގެ ވާހަކައެކެވެ. ހަމަ އެގޮތަށް ދޮންމޮހޮނާއި މިޔަރަކީ މާކެޔޮޅުކަމު ރައިވަރު ބައިން ކިޔެމުން އައީ ވާހަކައެކެވެ. އެދެ ވާހަކަވެސް މިހާރު ވަނީ ލިޔެ ޗާޕުކޮށްފައެވެ.
މިބާވަތުގެ ފުލޯކީ ވާހަކަތައް އެއްކުރަން އަވަސްވެގަތުމަކީ ޤައުމަށްޓަކައި ޤައުމުގެ ތާރީޚަށްޓަކައި ޤައުމުގެ އަދަބިއްޔާތަށްޓަކައި ކޮންމެހެން ކުރަން ޖެހިފައިވާ ކަމެކެވެ.
titsay
yousharknotpass
izzy806
amandla
pixelskylines
2087
turnnoffyourmind
