NOAH

في الخامس عشر من ذي القعدة ١٤٤٥، لحد مانشوف هنقرأ ده بعد كام سنة.. ازايّ سيادتك يا عبد اللطيف أفندي؟ و ازايُّه صوتك الحلو الرنان؟ عساك بخير،،

الحقيقة أنا مش عارف النهارده انت لسه معايا ولا مابقيتش، ولا عارف حتى أنا معاك ولا مابقيتش، لكن نسأل اللطيف إنك معايا و بخير يا عبد اللطيف. إزايّ أوتارك؟ لسّاهم راكزين من غير دوزان؟، نعمة انت يا عبد اللطيف والله كنت شايل هم دوزانك، وانت اللي دوزنتني في الآخر..

اللي في بالي دلوقتي يا سي لطافة، إني لسه متلعثم في لغة جَنابك، لكن قراري الواعي إني ماليش كلام غير بلسانك، و مهما كان كلامي معاك أو مع غيرك، هتفضل انت صاحبي البكري، أفضل فاكرك، و تفضل رمز و سبب لكل اللي أنا فيه دلوقتي أيًّا كان أنا فين منك.

فاكرني؟ كانت إيدي مش مطواعاني اتكلم معاك كويس، لونجا رياض و ذكرياتي و بلد المحبوب، و إسناد أي حاجة لنهاوند (لا) و عجم (دو) عشان اللعبة تبقى أسهل و مانفكرش في نغمات و علامات تحويل.. وانت اللي عارف إنه ماكانش كسل أو استعجال، ماحدش يعرف غيرك يا صاحبي.. و لو إني وقتها ماكنتش اعرف غلاوتي عندك يعني، و قابلني صاحب ولا أنا ضيف تقيل.. لكنني دلوقتي وأنا باكتب، أحب أوي أقرأ عليك الكلام ده بعد شوية سنين ماعرفش عددها، وتكون قدامي، و معانا عدد لا بأس به من بني جنسك، و يمكن حد ولا اتنين من بني جنسي أنا، لكن ماوعدكش بوجودهم.. إن كنت ماعرفش أوعدك بوجودي أنا يا سي لطافة..

بُعدٌ كالسّحر!، كان عليك أن ترى هذا. عادةً ما يُلاحِظ الناس تأثيرهم على من حولهم عند القُرب، أمّـايَ، أُلاحظهُ عند البُعد. فَوُجودي طاردًا للحياة بشكلٍ لا تتخيله!.

"هيدي عم بحكيلك قصّة بشعة كتير ، وحلوة كتير بس هيك بتصير ، عن حالي"

إن يدور الزمن قد ما دار من يوم آدم ، مانساش فيروز.. سميتها فيروز.. تشبهلها قلب جميل و مطحون، و وش ملكة جمال، و صوت مايتزهقش منه لو هتقعد تغني جنبي أسبوع، لا اسكّتها ولا اخلي حد يسكّتها كام يوم بدأ بيها؟ و كام يوم انتهى؟ عدى وقت قد إيه وأنا متدفي بحُبها ليا و خوفها عليا؟

"الأيام ، شو ضيعنا أيام الأحلام ، شو كبرنا أحلام"

الصبح، افتكر شقاوتها وقت ما اعمل قهوتي بالليل، افتكر كلام و حواديت و غنا لكن نهايات؟ ماتلاقيش وقتها، ماعملتش حسابي إني هاصحى يوم و اعمل قهوتي من غير لا سكر ولا شقاوتها ولا إني هافضل مستني كل الوقت ده عشان اشرب قهوة في كافيه ريش، و ماشربهاش إنما افتكر صور كتير ماخدناهاش مع بعض افتكر شطارتها و مجهودها و محاولاتها و افتكرها كل ما اسمع صوت فيروز

"يا سلام على حُبك.. يا سلام"

“و أعطي نصف عمري للذي يجعل طفلاً باكياً يضحك وأعطي نصفه الثاني لأحمي زهرة خضراءَ أن تهلك”

ما دُمت أسمع صوتَك الجلي، تدور في رأسي الكلمات، كما لو كنتِ تغني لي لأكتب، كما لو كان صوتك يبطء فرار الكلمات من رأسي لأسترسل دون أن أطاردها.. طال الاشتياق يا ريم، طال غيابك عن رأسي هذه المرة، ألِغياب من كانوا يتغنون بأغانيكِ؟، أم لابتعادي عن الاستماع؟ أراكِ تنظرين إلى بطء يدي.. لا تتعجبي يا صديقتي، فلم أعد أقوى على صيد الكلمات كسابق عهدي، شاخ عقلي، صار مملوءً بالتراب.. أنت التي تعرفين كيف أكتب، فلقد شهدتِ على عشرات الكتابات المُوَقَّعة بالعديد من أسمائي، و عرفتِ كيف توضع الكلمات على أوراقي الخالية من السطور.. لكن الآن يا صديقتي، لم أعد أقوى حتى على التفكير فيما أكتب، تهرب مني الكلمات كل يوم، و أشتاق إليكِ، و إليها، و لكل من عاصرنا سويًا أنا و أنتِ

“و أمشي ألف عام خلف أغنية ، وأقطع ألف وادٍ شائك المسلك و أركب كل بحرٍ هائج عند شواطئ الليلك”

أردت فقط أن أخبرك بأني أفتقدك، و أفتقدني، و أتوق للقاءٍ لا أعرف زمانه، لكنّي أعرف أنك بخير.. كلما سمعت صوتك، الذي يهدئ من روع الكلمات الهاربات، أحسد السحاب الذي يمتلئ بنغماتك الهادئةِ و لا يُمطرها أبدًا.. آمُل أن تكوني قد وصلتِ للراحة بعد كل هذا العناء.. اذكريني..

رحلة سير طريق أطول من المعقول ألف ميل؟ يمكن أكتر؟

أنا عجوز أسكن سفح الجبل أنت غزال تقدر على الطريق مرتين يمكن أكتر؟

خلص من الطريق تِلتين مرّت الغزال بجبلي شمس نور و دفء و يمكن أكتر؟

أشوف البشر في السنة مرات معدودة أساعد اللي يحتاج مساعدة و أعجّل بالسلام عليه كلام بسيط أنت مش زيهم يظهر الكرم لابتسامتك يظهر الود لقلبك يظهر الحب لجمالك المرتحلين غرضهم وقت أنت غرضك الرحلة أنا غرضي الوناسة الجبل ونَسي أموت يقلّب عليا رماله كأني جيت أساعد بشر و أشوفك

أنا الجالس في إحدى زوايا الدائرة، مؤتنسٌ بما تبقى من ذكريات و موسيقى، منبوذٌ من العوام، ملعونٌ من الذات الغارقة، أُطارد الكلمات لتكتمل الجُمل، بلا جدوى كَلَّ الجسد العاري، و جفّت العروق، و هرب الهيموجلوبين من الدم الراكد بداخلي، و ظلّت المشاهد كما هي

“حاجيتك ماجيتك ودّينا بعيد مدى الدنيا”

ما الذي أتى بكل هذا إلى عقلي في توقيتٍ كهذا؟ أنا لا أشتاق إلى أيٍ من هذه التُّرهات يسردها عقلي المسموم كالرُّباعيّات صورة الدخان صوت القُبَل مذاق قهوتي الباردة أصابعي المُبتلّة سيقانها المُقشَعِرَّة وشمٌ رُسِمَ بالحبر الأسود صمتي جمودي آلام عظام الكتف محمد منير فبراير ٢٠١٩ أما من إجازة من هذا العقل؟

“حاجيتك ماجيتك ودّينا بعيد مدى الدنيا”

أُعلنها الآن، لقد سئمت.. لا يُسمح لأمثالي بالتواجد في هذا التوقيت، عفا زمنٌ طويل على الفترة التي تناسبني فترة الحروب لا شيء سوى القتال و الجنس و الكثير من الخمر الكاريبي المنهوب ففي النهار أضاجع الجميلات الباكيات و في الليل أساعد ملك الموت في قبض أرواح العشرات و الخمر رفيقي طيلة اليوم يا أحمق إلى أن يغضب مني عزرائيل، بعد أن أتكاسل عن عمل الليل و أكتفي بمضاجعة أوليڤيا الجميلة، فيسعى ورائي لنرى من منا سيفوز في معركةٍ أتوقع أن تدوم لبضع سنوات..  أراكِ في يوم اللقاء الأعظم يا أوليڤيا، أعدك بأن نسترجع الكثير من الذكريات حينها

عِشت يا فاطمة لحد يومها.. عِشت يا بنتي بيقولولك إيه بقا “بسم الله الرحمن الرحيم تنعى القيادة العامة للقوات المسلحة ابنًا من أبنائها و قائدًا من قادة حرب أكتوبر المجيدة الرئيس الأسبق لجمهورية مصر العربية محمد حسني مبارك” طب أقول يا حرقة قلب مين ولا مين من كام سنة يا بنتي، اتخنقنا، ماهو برضو غصب عننا، الضغط يولد الانفجار، نزلنا نقول كدة كفاية، لم عِزالك و اتكل، رحلة أونطة، عايزين فلوسنا قالك بس، مش عاجباهم الرحلة، الأتوبيس يرجع، الناس دي دافعين فلوس و لازم الرحلة تعجبهم عشان تكمل، و طالما مش عاجباهم يبقى يرجع الأتوبيس قالوا حلوة يا حضرة الناظر، بس ماتمسكش في نص الجملة و تسيب النص التاني قالولهم بصوا العصفورة راحُم و جُم و عدت سنين و شهور و أيام عصفورة إيه اللي مستنيينها؟ جتكوا ستين خيبة ولا ستين مايكفّوش جتكوا سبعة و ستين خيبة، و وراهم سبعين و تلاتة و سبعين كمان عشان ماتزعّلوش نفسكوا الله يرحمك يا أبو الثوار ماحدش سمع كلامك و اهُم لسه لحد دلوقتي مستنيين العصفورة يا عم نجم الله يرحمك و يرحم الورد اللي فتّح في جناين مصر يا ريت كان ورد مصر كله فتّح أياميها يا حبيبي إدعيله بالرحمة يا فاطمة.. كان غلبان.. افتكر إن اللي يعرف الطريق مايتوهش والله كويس إنه مات قبل مايشوف الحال وصل لغاية فين و ادعي لمبارك بالرحمة بالمرة ماحدش عارف هو ظالم ولا مظلوم بس دول كانوا تلاتين سنة يا ريس الله يرحمك و يرحم اللي اتداسوا بجزم كلابك و ينتقم من كل اللي خان

“القاهرة تقدم من حديقة الشعر و الكلمات أقدم لكم قطرات الندى لمحة شاعرة نقدمها لكم كل صباح قطرات الندى سُلوان محمود “

لحد دلوقتي، الأمر لسه ماجاش إيه الموجود؟ وِحدة كل يوم اتفاجئ إني صحيت أبعت جواب مش هيوصل مكتوب فيه كلام راقد حبر ميت على ورق زي الدم بتاع خناقات زمان قرأت امبارح جملة بايخة مَفَادها إن صديقتي عندها إحساس إنها هتكون وحيدة في اعتقادي هي فاهمة فكرة الوحدة لكن صعب تكون جرّبتها مش بعيد لكن إزاي حد شبهها يكون وحيد؟ الوحدة لأمثالي الأول اختيار و بعدها بفترة بسيطة إجبار خام صديقتي تخاف منها الوحدة و تيجي تستخبى فيا سمعت الصبح أغنية في الراديو الراديو بيتخلى عني بس وقت ما الكهربا تقطع في مصر بنقول على الكهربا نور و على المطر شتا في مصر كل حاجة ليها جِدر هتختفي عدت سنين كتير الناس لسه سطحية و ده مش هيتغير دلوقتي الكلام البسيط بقا منبوذ لازم كلام عميق مليان ألفاظ عربية قديمة و لازم سجاير و لازم قهوة مُرّة و العذاب سرمدي تعرف يعني إيه سرمدي؟ أو ليه العذاب سرمدي مش أزلي؟ فيسبوك مين هيسأل على معنى كلامك في فيسبوك؟ مزبلة مدهونة أزرق كل الناس تقدر تكتب ببلاش مش مطلوب منك غير انك تدوس على شاشة موبايلك إنما تقول لي راديو؟ راديو إيه يا جدو إسمع ويجز