#sugbo

Magwayen Boxer Codex inspired depiction

Below the text in Badlit contains an old folk invocation/prayer that reads:

Malulutong Mahulayon

Kon kami pagahunoson

Ihatag Mo ang kamatayon

Nga tawhay ug malinawon

Kay sa agak nga mahumpayon

Osimandyas

kang Percy Bysshe Shelley

Nagkabagat ako’g tigpanaw sa karaang dapit,

Nga miingon, “Adunay dagkong kinulit nga tiil,

Nagbarog sa kabalasan… Unya, adunang sikbit,

Nadugmok nga nawong naunlod, ng’ang tamihid,

Ug ngabil nga kunot, ug bugnaw nga pagping-it,

Nagpaila sa tinguha nga iyang tagkulit nakahibaw

Nga apan aduna pa, ug nagiak ining mga butanga,

Ang kasingkasing nga magpakaon, mga kamot mamalikas;

Ug aduna sa patonganan ang kining mga pulonga:

Ako ang Hari sa mga Hari, ang pangalan Osimandyas;

Tan-awa akong mga Buhat, mga Gamhanan, ug pagsubo!

Wala nay laing nahabilin. Nagpalibot sa kagabok

Sa kadtong dakong Kagubaan, mahawan og malayo

Ang pagkalapad sa balas mihaklap kaayo’g tabok.” 

Ang Dayametro sa Bomba

kang Yehudai Amichai

Ang dayametro sa bomba traynta ka sentimetro

ug ang dayametro sa iyang sangpotanan mga pito ka metro,

nga adunay upat ka namatay ug onse ka nasamad.

Ug palibot ani nila, sulod sa mas dakong sirkulo

sa kasakit ug panahon, duha ka hospital ang nabungkag

ug usa ka menteryo. Apan ang usa ka dalaga

nga nalubong sa dakbayan nga diin siya nagikan,

sa distansya sa lapas sa usa ka gatos ka kilometro,

nagpadako gyu’g maayo sa sirkulo,

unya ang laking nag-inusara nga nagasubo’s iyang kamatayan

sa layong baybay sa usa ka nasod nga aduna layo tabok sa dagat

nagpalakip sa tibuok kalibotan sulod sa sirkulo.

Unya dili lang ko muhisgot sa mga hilak sa mga tuwapos

nga naabot ngadto babaw sa trono sa Ginoo ug

layo pa, naghimo’g sirkulong walay kataposan ug walay Ginoo.

kang Rudyard Kipling

Kon aduna pa imong maayong buot bisan ang tanan 

   Nangayabag na unya ikaw ang gipasinganlan,

Kon sigurado ka’s imong barog bisan ikaw gidudahan

   Unya gipabili pa g’yod nimo ilang giduhaduhaan,

Kon makahuwat ka unya dili ka kapoyon, 

   Unya ilaron gani apan dili ka mangilad balik,

O gidumtan ka unya dili madumtanon

   Unya dili ka mahambogon o mabugirit:

Kon dili ka madala sa imong mga gipangdamgo;

   Kon dili lang g’yod ka kutob sa pagtinguha;

Kon ang Kadaogan ug Katalagman’s imo mutagbo

   Unya walay kalahian imong pagtagad’s duha;

Kon madawat ra nimo imong gipanghisgot

   Nga ibitik para’s mga tonto sa mga limbongan,

Kon imong singkamot matan-aw nimong madaot

   Unya ayohon ra nimo balik gamit’s karaang himan:

Kon mapundok nimo tanan nimong nadag-an

   Unya irisgo nimo tanan sa usa lang ka sulay,

Unya mapildi ka ‘pan makabalik gihapon’s gigikanan 

   Unya dili g’yod magpabilin sa diin ka nabitay;

Kon mapugos nimo’ng kasingkasing, ugat ug unod

   Nga imbis wala na sila, palihokon gihapon 

Unya mopadayon nga wala nay nagbuhi g’yod

   Gawas sa Diwa nga misinggit og “Padayon!”

Kon paray’gon nimong tawo unya ikaw mithion gihapon

   Kon makasugat ka’g Hari unya dili ka mubiya’s katawhan

Kon sa kalaban ug sa kauban dili ka masamaran

   Kon tanan mupasakay’s imo unya dili nila palabion;

Kon mapuno nimo ang usa ka minutong bagsak

   Sa sisenta ka segundong pagpaninguha,

Imoha ang Kalibotan ug tanang aduna diha,

   Ug—unsa pa g’yod—ikaw Ulitawo na, anak!