#schottisch

Wow, zwoi hundert (200) täg bini scho da und jetzt channi echt säge, dass ich es am gnüsse bin. Ja,  ich fühl mich ihbezoge, han schottischi kollege, chume öppe druss was abgaht. Und jetzt gahni fasch scho wieder hei, huere schiissdreck. Ih drü (3) mönet und vierezwänzg (24) täg flügi wieder hei. Mal luege öbs denne no meh Corona-virus fäll ih de Schwiiz hett.

Hüt hetts schön wetter geh, ih de Schwiiz hetts ja gschneiet, aber da hett schön d'sunbe gschine. Ich bin sogar am Mittag id schuel gloffe und am namitag wieder hei mit de Viviane.

Mrs. Barnes hett wieder umegstresst, hend die nögscht unit ahgfange, blablabla, ich han mis heft vergesse, also hanni eifach föteli vo de powerpoint gmacht und vor mich hieträumet. Ihr glaubets ned aber es isch eigentlich no recht schwierig schwiizerdütsch z'schriebe will mer fallet immer nume englischi wörter ih, aber ich versueche es so bünzlihaft wies nume gaht zmache.

Ich bi recht zügig hei cho, han mini trainer hose ahgleigt, mini föteli i mis heft kopiert und denne nüt gmacht bis ich ha wieder id schuel müesse.

Ih de schuel ahcho hanni recht warm gha, vorallem wills mathi abteil mega warm isch und ich ih mim wintermantel han gschwitzt und denne bini recht greizt gsi ih de stund und has ah de Giulia usglah. Ups.

Im franz, Mrs Clarke hett wieder vor sich hoe philosophiert, eus nomol erklärt dass Tahiti und all die alte kolonie vo Frankriich immer no zu ihne ghöret, euro hend und so wiiter. Denn hett sie au no d'gschicht vo Joan D'arc verzellt und denne isch sie uf katholike und reformierti cho und zum schluss zu heilige täg und nämentäg. Ih ihrem französische kalender wo sie immer vo ihrere muetter gschenkt bechumt sind alli nämentäg glischtet, aber min name hanni ned gfunde. Isch warsch ned franz gnueg.

Ich bi mit de Viviane hei spazzifizottlet, will es schön wetter gsi isch. Dehai bini wieder i mis pischi (lol wie schriebt mer das in schwiizerdütsch?), han es buuch workout gmacht, es isch jetzt nümm so schlimm. Zum znacht hett mer Pauline pasta mit poulet würscht geh. Ich weiss ned wieso es poulet würscht hend müesse sii aber ok.

Ja mini eltere sind ned besorgt über de corona virus.

Ok hüt hend Prelims ahfange und es isch eigentlich gar ned so schlimm gsi. Prüefig isch ih de Turnhalle gsi, mit hundert und nünenünzg (199) anderne Schüeler. Close reading hanni alles beantwortet aber ich würd jetzt ned säge, dass die Antworte jetzt die beschte gsi sind. Eusi Mittagspause isch recht churz gsi, hetti en halb Stund sölle sii, aber will all die chinder au grad Mittagspause gha hend isches echli schwierig gsi. Schlussendlich hemmer im Gang, stehend euses zmittag abegwürgt dass mer rechtzitig wieder ih de Turnhalle für de Ufsatz gsi sind.

D’ufsatz ufgabe sind all die gsi womer im Unterricht au behandlet hend, was aber ned heisst, dass min Ufsatz jetzt hammer gsi isch. Nach dere Stund, isch mis Handglenk dezent beansprucht gsi, derum bini froh dass es jetzt vorbii isch mit de Ufsätz (für die Wuche).

Nachdem mer us de Prüefig cho sind, simmer zersch mal is Costa zum eus öppis gönne und echli erhole. Ich han de Irish Velvet Frostino gha und er isch jetzt ned schlecht, aber ich würds jetzt ned nomol neh.

Redemer über de hütig Tag, ihr hend vellecht bemerkt, dass de hütig Ihtrag ned in Änglisch isch. Wow, würklich gschidi Lüüt sinder. Hüt isch min hunderschte (100.) Tag da in Schottland und da hanni denkt, schribi de doch in Schwizerdütsch. Ich meine, es wird ihn niemert verstah ussert mini Kollege us de Schwiiz aber ich han denkt das isch doch luschtig, wenn all die fremde Lüüt wo mer folged und mis Züg lesed mal echtes Schwiizerdütsch würdet gseh und merke, dass Änglisch ned die einzig Sprach uf dere Welt isch. Und es isch immer luschtig wenn die Dütsche eus ned verstönd, gelled?

Ja morn isch d’Mathi Prüefig, hüt hanni gar ned so möge lehre, han eifach Theorie nomol ahglueget aber jetzt kei Ufgabe glöst, will ih de letschte paar Täg hanni das zu genüege gmacht.  Es chund wies s’chund. Mittlerwile isch mer das au scho egal. (Sägi und morn am Morge leggi no en Endspurt Lehrstund ih)

Ach das isch eifach luschtig Schwiizerdütsch schriebe, vellecht machi das ja für de zweihunderschti (200.) Tag nomol, wer weiss?

Aber eigentlich scho krass, jetzt isch scho en Drittel vo min Ufenthalt da vorbi, ich chans ned so ganz fasse, wahrschinlich wills immer no ziemli wiit weg isch, aber ebe au nüme so wiit weg… :( Aber ich wott jetzt ned sentimental werde, ich wird die Ziit da no so guet wies gaht gnüsse, mit volle Züg.

Morn channi sogar no länger schlafe, will d’Prüefig ersch am Mittag ahfangt, es eigentlich scho no en chilligi Ziit.

Morn schribi wieder in Änglisch, kei Angscht mini verwirrte ned-Schwiizer Follower. Aber hüt wirdi nie übersätze, selber schuld, wenn mer kei Schwiizerdütsch chan. (Und es git au nirgends en Google Translate für Schwiizerdütsch, muhaha)

ABENDESSEN /// Di - So : 18-22h

FRÜHSTÜCK /// Sa + So : 12-17h

Schottische, Britische, Italienische, Französische, Deutsche Hooligans!