#rumauntsch

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

ALMOST ALL'S WELL THAT ENDS WELL

How will the FIS Alpine World Ski Championships St. Moritz 2017 go down in history? As one that nearly could have ended in disaster, as a military display plane for once did fly too low, as one that saw our neighbors from Team Austria flying high? Let's say it was a big party that brought together people from across the world in a peaceful manner and everybody got away with a slap on the wrist.

In dumengia ho il president da la FIS, Gian Franco Kasper, declaro cha‘ls champiunedis mundiels da skis 2017 a San Murezzan sajan a fin. Fotografia: Reto Stifel

Che finischun! Ils 44evels champiunedis mundiels da skis a San Murezzan sun daspö her istorgia. Duos eivnas da cumbat sportiv süllas pistas traunter Corviglia e Salastrains, duos eivnas da cumbat per millievels da secundas, duos eivnas dad assedi da medias e fans dal sport da skis, duos eivnas però eir da stedi d'urgenza a reguard il trafic a San Murezzan. 65 milliuns francs per duos eivnas evenimaint e l'onur, d'esser sto preschaint in quel temp illa vaidrina mundiela. E, pel nair d'ün‘ungla vess tuot pudieu esser sto invaun, tuot las fadias pel giat, tuot l'onur pel diavel. Alura nempe, scha quel accidaint d'ün dals aviuns PC 7 da l'armeda svizra nu vess desdrüt be üna camera da televisiun, dimpersè chaschuno ün greiv accidaint cun dans e victimas. Alura füss sto ruino tuot in d'ün batterdögl. Incredibel perque, cha organisatuors da festas scu'ls champiunedis mundiels da skis haun da ris-cher taunt cun da quists acts prepotents. Disgrazchas düraunt demonstraziuns aviaticas haun musso già diversas voutas, quaunt invaun cha similas acziuns sun. San Murezzan es gnieu liber bunmarcho, cun ün ögl blov per uschè dir. E be grazcha a que restaro in algordanza il success dals champiunedis mundiels da skis – taunt our da vista organisatorica scu eir our da vista sportiva. Ad es sto üna grand-bella festa paschaivla da las naziuns!

La Lia Rumantscha ho pruvo d'integrer taunt rumauntsch scu pussibel i'ls champiunedis mundiels a San Murezzan. Ils stizis rumauntschs dad oters, scu la reclama rumauntscha da la Swiss, sun stos percunter püchöntsch rers. Fotografia: Jon Duschletta

Che cha'ls champiunedis 2017 haun purto suot il strich turisticamaing, economicamaing e socielmaing a la vschinauncha da San Murezzan ed a la regiun, que mussaron pür ils prossems ans. A vo almain pella reputaziun, il gro da renomina, l'onur ed eir per rester i'l ravuogl da las destinaziuns da sport d'inviern, chi sun ablas dad insomma organiser tels arrandschamaints grands. Fin alura saro schmancho eir l'accidaint militer, la camera da televisiun rimplazzeda ed il respunsabel da l'accidaint – chi so – forsa gnieu tramiss in Austria. Taunt per fer schnöss ün‘ultima vouta. Schi, ils Austriacs, quels chi's haun tgnieus inavous prudaintamaing al cumanzamaint dals champiunedis e fat crajer da maniera tuot maligna als  Svizzers, ch'els, ils Össis, surlascharon quist an straglüsch ed onur als osps. Sbaglio, ma da grand! Precis a partir da quel mumaint, cha s'ho proibieu als Tirolais da fer grand festa sülla plazza da la scoula veglia, da quel mumaint haun eir ils Austriacs reagieu spermalos e s‘haun dits: Bain, scha vus nun ans cuis nossa festa, alura tramettains nus a la partenza da las ultimas cuorsas noss meglders skiunzs. E che es capito? Intaunt cha'l «Tiefflieger» svizzer ho tschunch il fil da la camera, sun ils Austriacs partieus per lur svoul in ot ed haun guadagno in seguit medaglia per medaglia. E scu cha que nu vess bastieu, haun els guadagno a la fin finela eir auncha il spievel da las medaglias aunz la Svizra. Che blamascha pels alv-cotschens, quels culla crusch! Dimena, che pudains nus imprender da quist'istorgia? Tgnair aint l'otezza güsta da svoul, e mê ruiner üna festa tirolaisa.

Uossa ho que nom sgumbrer, disfer, demonter ed alluntaner tuot ils fabricats temporars e refer la cuntredgia sü Salastrains darcho il stedi dad avaunt ils champiunedis mundiels da skis. Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

RED AND WHITE

The medals are awarded in a sea of red and white, as Austria and Switzerland seem to ski in a league of their own. For most of the other 75 nations it's not the winning but the taking part that counts. They can showcase themselves instead in shops and restaurants all over the village thanks to a local initiative called the Nations-Walk – colorful encounters between locals and guests only steps away from the dichromatic main stage.

La medaglia d’or dals champiunedis mundiels da skis, per quella vain fat bger brimbori. La valur da la medaglia es l’onur da l’atleta, da l’atlet – vain dit. Fotografia: Jon Duschletta

Che banalited! Da profetiser, chi chi guadagna la prosma cuorsa da skis, que saun be ingiuvineders e singuls schurnalists da sport, quels drets, quels chi saun eir, cha’l muond es üna schaibgia, simil ad ün frisbee, be bgerun pü granda. Però, da presümer, cha sül podest da las cuorsas da skis dal champiunedi mundiel a San Murezzan dominessan las culuors alv e cotschen, que savaiva dafatta eau scu «banausa-expert». Austriacas, Canadais ed eir ils Svizzers, tuots portan alv e cotschen – chi in strivlas orizontelas, chi in verticalas e chi – quels chi nu saun as decider – in fuorma d’üna crusch alva sün fuonz cotschen. Ed eir süllas tribünas a Salastrains ho domino ün mer da binderas alv e cotschnas. Tuot la cuolpa d’ün numerus ed alleger public chi sventulaiva üna pruna queders da stoffa cotschna cun sü cruschs alvas. E vais vis quellas cumbinaziuns da culuors sül podest? Ün masdügl sgrischaivel da strivlas, cruschs e föglias in alv e cotschen. Logic cha quell’impreschiun as repeta eir  guardand il spievel da las medaglias illa «Posta Ladina»: alv e cotschen tuot que cha l’ögl vezza. Da pür alv e cotschen am vain la sön, che lungurella!

Ma a do sclaridas i’l desert alv-cotschen: «Merci» Frauntscha, «hvala» Slovenia, «takk» Norvegia, «thank you» Stedis Unieus e «dankschön» Principedi da Liechtenstein per quel miel blov. «Tack» Svezia pella crusch melna, e «grazie mille» Italia per dafatta üna strivla verda! Almain vus avais purto düraunt ils ultims dis ün pô culur in quist cumbat alv-cotschen.   Ma, insè pudess tuot esser bgerun pü fras-ch, alleger e culurieu. 75 naziuns sun nempe preschaintas als champiunedis mundiels da skis a San Murezzan. E traunter da quellas eir naziuns pü curaschusas a reguard la concepziun da lur culuors naziunelas, scu per exaimpel l’Andorra, l’Azerbaijan, la Bolivia, la Germania (es quella insomma da la partida tar quists champiunedis?) u il Brasil.

Grazcha a l’iniziativa da las indigenas Eveline Fasser Testa, Heidi Kopp e da l’indigen Christian Gartmann, s’haun pudieu preschanter düraunt quists dis las singulas naziuns tar divers affers, butias e restorants in tuot San Murezzan. «Nationen-Walk» ho nom la spassageda sur 84 posts, sustgnieu da la Societed da commerzi e misteraunza da San Murezzan, la Societed da cura e preschanteda da l’«Engadiner Post/Posta Ladina». Divers afferists haun uschè invido ad inscunters traunter la populaziun indigena e giasts culs atlets ed ils funcziunaris da las singulas naziuns. Els tuots insembel haun do als champiunedis ün culurit fantastic e contribuieu lur part a las duos eivnas «festa da skis» cun bgers inscunters, plaschair ed armonia traunter las naziuns. Scha nu füss be na steda quista dominanza alv e cotschna.

Be üna minurited dals arduond 600 skiunzs activs da 75 naziuns es riveda düraunt las ultimas duos eivnas a la fin finela eir sül podest. «Que es oramai part of the game», s’haun dit bgers oters, surtuot quels cullas binderas culuridas, e s’haun partecipos i’l sen sportiv, nempe d’esser sto tiers. Guadagner dessan, scu’l solit, quels alv e cotschens. Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

ROMANSH TAKING CENTER STAGE

After Austria dominated on the slopes, the Romansh were called for to save the day for Switzerland on the central stage in Kulm Park. Rock music and hip-hop: two solid acts by Prefix and Liricas Analas stood up successfully to adversities of various kinds such as, again, canned Austrian après-ski sound.

Granda inscenaziun pella band indigena da rock dür «Prefix» in venderdi saira sül palc principel i’l parc dal Kulm a San Murezzan. Fotografia: Jon Duschletta

Che schleppa! Be cha vus sajas avertieus: mê rir sur dals Austriacs, mê fer schnöss dad els! Na ils provocher, dschand per exaimpel, cha lur festas sülla plazza da scoula cun musica tirolaisa sajan be fracasch e disturban il sön da quels chi reclaman düraunt l'an, cha a Sankt Mooritz nu gira mê ünguotta. Ils Austriacs nu's laschan spermaler uschè svelt, na, els sbassan evidaintamaing e cun tuot il respet invers il chantunais il volüm dals amplifichaduors, daun üna risattina maligna e – apaina cha tü ils hest do las arains – daun els «botta per tschücha»!

S-chüsè, cheras lecturas, chers lectuors, insè vulaivi scriver hoz da la granda festa rumauntscha chi ho gieu lö sül palc principel dals champiunedis mundiels da skis sül parc dal Kulm. Sü sper «Edy» (il futur museum da skis a San Murezzan;-)

Insè vulaivi scriver da quella grandiusa preschantaziun dals rockers engiadinais Rico Puorger, Curdin Urech, Christoph ed Andri Casty, Marco Niggli e Fredy Muriset. Els fuorman la band rumauntscha da rock dür «Prefix» e sun stos invidos da la Lia Rumantscha da musser che ch‘els saun. E hoppla, cumplimaint, els haun persvas il numerus public cun ün concert solid, plain energia ed ün gaudi exalto da suner. Ma que nun es da‘s der da buonder. Il palc d'eira nempe telmaing grand, ch'els as varegian sentieus scu la pre-gruppa dals «Stones». In vardet es steda «Prefix» però la pre-gruppa da las «Liricas Analas». Na da congualer, ma neir na mel! Ils rockers engiadinais s'haun dimena arcumandos sainza scha‘s e ma‘s pels grands palcs naziunels. Els haun eir güsta profito da l'occasiun, dal palc immens, dal sound perfet e da las installaziuns da video, ed haun da lur vart registro il concert in möd audiovisuel. Per dapü infurmaziuns saja cusglieda la pagina d'internet www.prefix-rock.ch.

Il ghitarrist da «Prefix», Curdin Urech, circundo dal public. Fotografia: Jon Duschletta

Savais, cha'l pled schleppa deriva dal tudas-ch messaun, dimena dal 13evel tschientiner, circa? E savais eir, che chi'd es üna schleppa austriaca? Precis, üna watschn, üna fotzn e tuot tenor eir üna maulschelln. La vendetta austriaca ho cumanzo venderdi già sün pista: Hirscher e Leitinger süsom quist s-chelin melnüz, e dafatta Schörghofer ho auncha gieu il curaschi da's pusiziuner aunz il meglder svizzer, l'ochevel Murisier. Bain, que es sport, e damaun già schmancho. Ma cha'l Haus Tirol ho darcho fat brav festa fin zieva las desch la saira – ün s-chandel! Dafatta üna impertinenza da nu crajer es capiteda a l'ur dal concert dals «Prefix». Nos egen furnitur discounter d'energia ed immens sponsur dals champiunedis mundiels da skis, la BKW, invida in l'ambiaint chod da sia bar sül Kulmparc. Üna porta da vaider be davent dal sbischöz da naiv e dals suns e tuns dals «Prefix». Que, scu tel, nu füss natürelmaing niauncha mel. La granda schleppa, l'affrunt invers ils musicists indigens our i'l fraid e la granda offaisa da las uraglias sensiblas es il fat, cha illa bar giraiva musica da conserva ¬otezzas – scu, apropos, eir our da la tenda dal producent da biera güsta daspera. E, scu cha que nu füss già avuonda maungel da respet, sorta lo dals amplifichaduors la vusch da Gerhard Gerry Friedle. Logic, ün Austriac! Meglder cuntschaint es Friedle scu DJ Ötzi. Dadour «Gloria» dals «Prefix» e dadains Ötzi e sieu spavantus «Einen Stern, der deinen Namen trägt, Hoch am Himmelszelt, Den schenk ich Dir heut'Nacht...» Buna not, chers chantunais, la vendetta as es gratageda! E cu!    

L'act principel da la saireda rumauntscha da la Lia Rumantscha, las «Liricas Analas», la gruppa grischuna da Hip-Hop da la Surselva. Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

A MUSEUM FOR EDY THE GIANT As the championships are drawing to a close, one question gains more and more urgency: what will become of Edy the giant, the wooden skier who has been guarding so stoically the whole event? Jon the blogger suggests: turn him into a museum of local winter sports history. Imagine the top-of-the-world view from out of one of his eyes!

Il grand star static dals champiunedis mundiels da skis ed eterniso scu tel sün millis da fotografias as stu tschercher üna nouva dmura. Il blogghist l’ho fat visita in l’avegnir. Fotografia: Jon Duschletta

Che kerli! Il telefonin sclingia. «Chau mia chera», disch eau e guard svelt a schnestra ed eir a dretta aunz cu traverser la via. «Eau sun güst sto i’l Museum Engiadinais a San Murezzan, propi bel cu cha quel es gnieu renovo.» Eau spost il telefonin in l’oter maun ed evr ün miel il zip da mia giacca. Eau sun chamino svelt e cumainz a süjer ligermaing. Ad es utuon, già memma fras-ch per rester in chamischa ma eir auncha memma chod per purter il tschop. «Ed aunz», disch eau, intaunt ch’eau riv tar la culuonna chi spetta davaunt üna porta da lain, «ed aunz, suni sto a visiter darcho üna vouta il Museum da Segantini. Que es adüna darcho ün grand evenimaint, d’esser in frunt al tripticon, tü sest».

Plaun plaunin rivi in vicinanza da la cassa. «Inua ch’eau vegn uossa?» – eau guard svelt sün l’ura e ponderesch, quaunt temp chi am resta fin cha’l tren per l’Engiadina Bassa parta – «s-chüsa, eau vegn uossa a visiter il nouv museum da skis a San Murezzan. Sest, quel chi muossa tuot l’istorgia dals grands evenimaints dal sport alpin a San Murezzan e contuorns. Cumanzo tar l’istorgia da la scumissa cha l’hotelier Johannes Badrutt ho formulo aunz passa 150 ans cun giasts inglais chi d’eiran cò da sted, sur ils duos gös olimpics chi haun gieu lö dal 1928 e 1948 a San Murezzan fin tals trais champiunedis mundiels dal 1974, 2003 e quels da l’inviern passo.» – «Spetta ün mumaint», disch eau, met il telefonin in giglioffa, pej l’entredgia e pigl incunter, cun ün amiaivel «grazcha fich», quel s-chierp nair numno Audio-Guide our dals mauns d’üna scharmanta dama, vstida d’ün schic deux-pièce blov cler e mellan. Quels vstieus am algordan in qualche möd a la mandura dals Voluntaris dals champiunedis da favrer, pens eau e pigl darcho in maun il telefonin. «Hest auncha cò?» dumand eau guardand intuorn.

Eau contaimpl la tevla da survista chi m’infuorma, che ch’eau chat sün che plaun ed in che local. «Tü vulaivast savair, inua ch’eau sun?», dumand eau distrat. «Eau sun i’l magun dad Edy, sest, da quella statua gigantesca da lain chi faiva telmaing parada düraunt ils ultims champiunedis sül parc dal Kulm.» Eau schmach sün ün pom suot il titel «Ski-WM 1974», tschern la lingua «Rumauntsch/Puter» e fatsch uschè partir il film documentar «Studio Engadin» chi muossa cu cha la televisiun ho installo quella vouta tuot la tecnica da transmissiun. «Che svilup in confrunt cun hozindi, incredibel!» «S-chüsa, eau d’he discurrieu cun me svess», disch eau darcho i’l telefonin. «Pensa, uossa sun eau süsom, illa testa dad Edy. Cò es gnida monteda üna fnestra in fuorma d’ün grand öglier da sulagl e drizzo aint ün pitschen bistro cun specialiteds indigenas. Propi cool, e che bella vista giò sün San Murezzan, sül lej e la cuntredgia surdoreda d’utuon.» Eau post üna bella biera engiadinaisa fras-cha e pigl ün prüm lung süerv. «So mia chera, eau at stögl lascher. No cò stuvainsa però gnir bainbod üna vouta insembel – Chau!»

Vista exclusiva sül dadains dal skiunz Edy. La sculptura gigantesca es gnida construida cun singuls trianguls da lain. Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

LOCAL HISTORY IN A NUTSHELL

Actors Annina Sedláček and Lorenzo Polin offered a special introduction to local history and to Puter, the Romansh variety spoken in and around St. Moritz. With only a few props they told the story of hardship, emigration and longing for home. Passersby were involved and got their fair share of paper snowballs with some words in Romansh and English – a fun way to start learning the language.

Öglieda critica dal magi da pleds e da formulaziuns poeticas. Göri Klainguti ho visito in marculdi il Öglieda critica dal magi da pleds e da formulaziuns poeticas. Göri Klainguti ho visito in marculdi il «Crashcuors» da la Lia Rumantscha e gieu viepü gust dal gö dad Annina Sedláček e Lorenzo Polin. Fotografia: Jon Duschletta

Che ideja! Bger es gnieu quinto in occasiun da l'avertüra dals champiunedis mundiels da skis davart l'istorgia da San Murezzan, da l'Engiadina e dal svilup dal turissem d'inviern. In möd multimedial cun pleds, preschantaziuns, musica, glüsch e da tuotta sorts mezs visuels. Cu cha's po però quinter listessa istorgia sainza grand brimbori, be cun duos vuschs, üna petarda da füm, ün pêr guaffens da requisit ed üna rolla da palperi alv da crep, que haun demonstro ils duos actuors indigens Annina Sedláček e Lorenzo Polin in occasiun dal «crashcuors da  rumauntsch». In möd summaric, cuort e bön, ed immez ils passants i'l minz dal cumün da San Murezzan haun els druvo güsta s-chars üna mezz'ura per quinter da la populaziun da las valledas muntagnardas, da la vita quotidiauna, da la natüra, da las üsaunzas engiadinaisas scu'l Chalandamarz u la chatscha, da poverted, emigraziun, randulinas. Que es ieu sur ils pioniers dal turissem d'inviern fin tals champiuns da quists dis. E l'unic cha'ls duos actuors haun dumando als audituors d'eira ün pitschen applaus ed il motto da la Lia Rumantscha per quists champiunedis «piglia't il temp - take your time!» Bain cler, cha eir Sedláček e Polin haun quinto l'istorgia in möd biling, nempe in puter ed inglais, dimena: «From north to south and from south to north».

Lorenzo Polin ed Annina Sedláček vaun culs skis. Fotografia: Jon Duschletta

Il temp da perseguiter il teater «crashcuors» s'ho piglio her zievamezdi eir il pur, scriptur e sturnical Göri Klainguti. Il Samedrign culla barba plaina ed ils chavels sbarüffos ho druvo qualche minuts fin cha sia öglieda critica s'ho müdeda per prüm in üna risattina e bainbod eir in ün rir, ün da quels chi merita sieu nom. Al pü tard cur cha Lorenzo Polin l'ho do in mauns üna liangia da palperi sfurmeda e pretais, cha que saja ün schluppet da chatscha chargio, ho'l cour da Göri battieu uschè dad ot cha's pudaiva bod l'udir. «Ma la curuna nu poss eau insomma na schluppetter», ho'l dit frustro e guardo zieva a l'Annina chi s'ho alluntaneda – decoreda cun üna chaplina cun duos grandas cornas da sulvaschina – üna d'ün tschierv curuna e l'otra d'ün grand bel stambuoch. «Da l'otra vart», ho repondero Göri da que furb, «pudess eau cò schluppetter cun ün tun güsta tuottas duos bes-chas». Memma tard, cher Göri, too late. Dimena, saung nun es culo üngün düraunt il «crashcuors», ma bainschi sun svuledas poch zieva buorlas da naiv in tuottas direcziuns. Ils «snowballs» però d'eiran bel lammins, e niauncha ün pô «cold». Que nun es da's der da buonder, eir quels eiran nempe furmos da «paper» da crep. Splajand las buorlas as vaiva zieva in mauns ün fögl ordinari cun sü il vocabulari rumauntsch puter - English. Sgrufligno, ma da cour. «Grandius», ho resümo intaunt Göri, «üna fich bun'ideja, chi do curaschi da s'occuper dal rumauntsch». 

Lorenzo Polin integrescha a Göri Klainguti in sieu gö da pleds e'l fo fer da chatscheder. Fotografia: Jon Duschletta

Savair rumauntsch güda ad imprender inglais: bit.ly/2lRVu6Q

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

MY COUNTRY RIGHT OR WRONG Twenty students from the Academia Engiadina Samedan performed the Marseillaise yesterday to honor the French who won the team event, an anthem in a language they might be quite familiar with. It would no doubt be much harder to intone the Hungarian anthem the right way, although this happening seems very unlikely. Best case scenario: more Swiss victories – neither words nor notes required.

«Allons enfants de la Patrie, le jour de gloire est arrivé!» Her saira ho chanto il cor da l'Academia Engiadina da Samedan suot la bachetta da Werner Steidle la «Marseillaise», l'imna francesa. Fotografia: Jon Duschletta))

Che onur! E che chatschöz! 20 scolaras e scolars da l'Academia Engiadina da Samedan as squitschan illa luocha dal skiunz da lain «Edy» e stumplan bod sur la spuonda giò a lur dirigent e promotur Werner Steidle. Sur ils amplifichaduors fo Knackeboul atmosfera i'l parc dal Kulm a San Murezzan e pissera per buna glüna. Quella haun surtuot ils fans da la squedra francesa chi ho guadagno zievamezdi l'occurrenza da las squedras. Ot sü sur il plazzel da festa ed ot sur il palc dals champiunedis mundiels da skis regna ün'atmosfera agiteda. Steidle quieta, fo curaschi e tira adimmaint duos passaschas pü difficilas da la chanzun ch'els chantaron in pochs minuts. El as sfruscha ils mauns cunter il fraid. «Eau nu vess mê cret ouravaunt, cha taunts as vessan libramaing miss a disposiziun per gnir cò a chanter las imnas», ho dit Steidle poch aunz, cun traverser la via in direcziun dal plazzel da festa. Illa sela da pravenda, situeda be güst illas arains dad «Edy», as vaiva raduno il cor aunz ün'ura per fer marenda e s-chuder las vuschs. «Allons enfants de la Patrie, le jour de gloire est arrivé!» rimbomba que illa sela. Que chi tuna al cumanzamaint auncha dret paschaivel, as munta già a la fin da la prüma strofa in que, cha l‘imna da la republica francesa es – nempe üna chanzun da guerra: «A las armas, vschins, furmè voss battagliuns, marchains, marchains, cha‘l saung impür bagna noss suolchs...» Scritta la chanzun ho Claude Joseph Rouget de Lisle dal 1792 tar la declaraziun da guerra a l'Austria. Ed il nom «La Marseillaise» ho la chanzun survgnieu, pervi cha'ls sudos da Marsiglia l‘haun chanteda cur ch’els sun rivos a Paris. Mais non! Las giuvnas chantaduras ed ils giuvens chantaduors sun cò per chanter l'imna in onur dals vandscheders e düraunt la ceremonia da medaglias, e na, per commenter cuntgnieus d'imnas sechaditschas. E da quellas do que diversas, scu cha eir nus Svizzers savains. Da l'imna russa per exaimpel, vess la chantadura Arina Lazzarini da Samedan schont ün pô respet. «Ma eir da quellas chi pretendan passaschas da vusch fich otas», disch la scolara. Bain pussibel cha Arina e sias collegas nun haun dad intuner, ne l'imna russa, ne quella ungiaraisa düraunt ils ultims dis dals champiunedis. A crajer a Werner Steidle es güst l'imna ungiaraisa nempe üna da las pü greivas d'imprender, e que in prüma lingia causa la lingua. Bger pü gugent gessan Arina e consorts nempe sü, illa pitschna foura dal buttatsch dad «Edy» darcho sainza notas. E que faune – nus savains – be cur cha giò suot els e dadour lur champ visuel vain onureda üna atleta svizra, onuro ün atlet svizzer. In quel sen: «Allez les Suisses!»      

La FIS ho admiss a las chantaduras ed als chantaduors dal cor da scoula, da druver notas e texts per chanter las imnas naziunelas cur cha que fo dabsögn. Fin sün quella svizra, quella chauntane natürelmaing ourdadour. Fotografia: Jon Duschletta

Davous las culissas es eir davaunt quellas. Il cor da scoula her saira, cuort aunz l'intunaziun da l'imna francesa sül pitschen palc dal skiunz «Edy». Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

HAPPY VALENTINE'S DAY!

Are you virtually agonizing over what to get your sweetheart for Valentine's Day? Red roses (again)? A box of chocolate (your favourite one)? Why not take her up to Salastrains to the Nations Team Event for a special treat? But make sure to read the general terms and conditions that say what you can bring along. Flowers should be no problem, weapons have to be left at the entrance.    

Bes-chas ed armas sun scumandedas illa zona da las cuorsas a Salastrains. Chi so scha quists duos fans haun stuvieu, per pudair entrer, depuoner lur cumbinaziun da bes-chas ed armas tals posts da controlla? Fotografia: Jon Duschletta

Che cumbinaziun! Hoz es il di da San Valentin, il di dals inamuros stracots, da quels chi s‘haun simplamaing gugent, ma eir il di da quels chi s‘haun adüsos ün a l‘oter e da quels chi crajan, cha cun ün bel püschel rösas cotschnas, saja darcho tuot rösa. Ma attenziun, memma rösas memma cotschnas pudessan signaliser blagöz, naïvited u dafatta noscha conscienza. Memma pochas rösas ed eir ün miel pü sblechas, dischinteress opür ün caracter dad avar. Che fer, per fer bain? Culla tschiculatta es que listess. Che sort, che ingrediaints, che quantited? Mieu cussagl: Cumprer simplamaing quellas dutscharias chi gustan a se svess il meglder, uschè es la prubabilited granda, cha eir tü survegnast ün quedrin – u duos.

S-chüsè stimedas damas, vus vais bado, quistas frasas ho scrit ün hom – ed exclusivmaing pels homens. Sorry, ma vos möd da surmunter il di da San Valentin nu m'es cuntschaint. Eau poss be suppuoner, cha vus forsa spettais tuottadi speculand sül cuntgnieu dal regal, chi la saira – s'inclegia – es puzzo dasper duos courins da tschiculatta sül linzöl? U, cha vus passais il di fand scumissas cullas collegas da lavur, chi da vussas chi survain listess regal scu l'an passo?

Dimena, hoz vains nus la cumprouva, cha'l di da San Valentin ho lö adonta cha a San Murezzan haun lö ils champiunedis mundiels da skis. Che cumbinaziun! E finelmaing d'heja eir chatto la stüerta per turner tal tema. Eau vulaiva nempe scriver ün pêr impissamaints a reguard la sgürezza düraunt ils champiunedis. L'ideja m'es gnida, legiand il fögl volant «Verbotene Gegenstände und Auflagen» cha's chatta cun bgera pazienzcha sülla pagina d'internet www.stmoritz2017.ch e, poch pü grand eir in fuorma d'ün placat in ün u duos lös sü Salastrains. Mia frasa prediletta es quella, cha entrand i'l areal dals champiunedis conferm eau automaticamaing, ch'eau hegia let (be let, na eir inclet) las uschè numnedas AGBs. In rumauntsch sun que las cundiziuns generelas da la fatschenda. E leger as po quellas – güst – sülla pagina d'internet. Uossa d'heja eir inclet, perche cha in sanda e dumengia ho que do tauntas culuonnas davaunt las entredas – pensè, fin cha minchün(a) ho let sül telefonin quistas banadidas duos paginas AGBs.

E, be per dir, i'l tuotsapiaint Internet as chatta ,cun duos clics e pü svelt cu'ls AGB's, eir la documainta d'üna scolaziun interna da sgürezza dals organisatuors inclus plans da servezzan.  «Augen auf!» es lo scrit sün üna da las paginas. Perque am resta be auncha da dir: «Ün bel di da San Valentin e – Augen auf!»

Traunter ils ogets scumandos da piglier cun se as chatta eir la sparta «instrumaints chi faun fracasch e musica». Perque, que suppuon eau, s’haun mascros ils musicists da quista «Gugge». La mascarada nu figürescha nempe sülla glista. Fotografia: Jon Duschletta

BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST

A CRAZY WEEKEND So much to do and see in St. Moritz over the weekend. Hockey, horse racing on the frozen lake and two downhill runs, the top events of the championships, both on the same day. About 30'000 people found their way to Salastrains to cheer for their favourite skiers. When was the last time such a huge crowd met for lunch?

Eir il concept dal trafic public es rivo sanda e dumengia a San Murezzan e contuorns al cunfin dal pussibel. Furtüno, chi chi ho pudieu giodair sainza stress l'atmosfera nocturna a la Via Serlas.  Fotografia: Jon Duschletta

Che sfida! Da la fin d'eivna passeda vaivan tuots ün pôin chila a San Murezzan. Eir, scha que nu vulaiva natürelmaing üngün admetter aviertamaing. A la fin finela as porta cò sül tschop il label «Top of the World» ed il sulagl i'l cour e que cun superbgia. Ma divers, grands evenimaints sportivs ed importantas decisiuns politicas haun tgnieu sü ot il puls e chaschuno cò e lo ün sön liger. Forsa cha eir la glüna plaina da gövgia passeda ho auncha güdo tiers e tgnieu sdasdo a quels, chi zieva ün'eivna da champiunedis, zieva lungs dis e cuortas nots, füssan stos cots da sön.     Ma, ad es uossa eir a San Murezzan mited favrer e dimena stagiun ota – Highlife cun tuot que chi tuocha tiers. Grazcha als champiunedis mundiels da skis es preschainta üna massa da  glieud. Insomma dapü cu’l solit. Sül champ sportiv haun gieu lö las duos cuorsas rojelas dals champiunedis mundiels da skis, il derby da hockey engiadinais ed eir la prüma dumengia da las cuorsas da chavals White Turf sül lej inglatscho. Tuot i'l radius da pochs tschient meters e, tuot infra pochas uras. Duos dis stedi d'urgenza! 222 spectatuors haun vis in sanda saira, scu cha l'osp, il EHC San Murezzan ho decis illa prolungiaziun il derby cunter il Club da hockey Engiadina. Arduond 9000 persunas as haun radunedas intuorn l'oval da cuorsa sül lej ed incurascho ils quadrupeds cun lur jockeys süllas arains. E dafatta fin 40'000 persunas haun visito las duos cuorsas aval chi haun gieu lö her dumengia üna zieva l'otra.

Arduond 58 pertschient da las votantas e dals votants da San Murezzan haun do giò lur fögls da votumaziun quista fin d'eivna. Il travasch sülla Plazza Mauritius invezza es collio als champiunedis mundiels da skis. Fotografia: Jon Duschletta

In sanda, chera glieud, es nempe capito que, cha's pudess circumscriver cul pled inter rumauntsch «Worst Case». Sgür our da vista dals organisatuors e forsa eir our da vista da quels tschients u millis da spassagiunz chi d'eiran bloccos sülla senda da Uorsin, be pochs tschient meters suot l'entreda e suot las tribünas a Salastrains. Sgüra ch'els haun vis sü, spettand in culuonna, quella maledetta nüvla gigantesca sü sur la pista. Per üna vouta na la misteriusa «serp da Malögia», ma la parainta, spessa vetta anonima da tschiera, chi s'ho missa imprudaintamaing sur la pista da skis ed impedieu uschè la partenza da quella. Invezza da scriver cò da «Worst Case» as pudess guarder però tuot que eir in sen positiv e scriver las seguaintas lingias grassas: «Record mundiel! 40'000 as radunan a Salastrains per fer cumünaivelmaing marenda.» Ün evenimaint cha'ls turistikers stuvessan svilupper inavaunt, par exaimpel il sen d'üna «Tavolata d'inviern» opür d'üna «Stramangeda» extaisa.