sa pagbangon sa umaga,

kumusta ka?

kaya pa ba?

 papasok na ng maaga

handa nang harapin ang bagong umaga

pero bakit parang napipilitan ka na lang talaga?

'Yang matamis na ngiti sa labi mo,  totoo ba?

 makikipag-biruan

makikipagtawanan

pero bakit sa mga halakhak mo,

parang may sumisigaw ng saklolo?

 Uuwi kang gabi na

sa wakas, makakapagpahinga!

pero bakit tila pagod ka na para bukas?

para bang gusto mo na lang makatakas?

 sa pagpikit ng mga mata

tumulo na nga ang mga luha

dinadalanging sana'y wala nang bukas

pero kaibigan, hindi pa ito ang wakas.

 nakakapagod na nakakalungkot

nakakainis na nakakatakot

pero teka, hindi mo na kailangang magpanggap

nandito naman akong uunawa't sayo ay tatanggap

 siguro nga't hindi kita lubos na mauunawaan

pero nandito lang ako't ika'y pakikinggan

hindi mo na kailangang sarilihin ang bigat

asahan mong tutulungan kita, sabay tayong magbubuhat

 walang kwenta, mahina, yan ka sa tingin mo

malakas, matapang, yan ka sa mata ko

mga kalabang hindi maaninag, pilit mong nilalabanan

babangon at babangon, ang pagod man ika'y dapuan

 sa bagong umaga, muling imulat ang mga mata

ngayon, makakasama mo na ako sa giyera

kung inaanod ka na ng luha mula sa'yong mga mata

kapit ka lang, tutulungan kitang umahon sa agos ng problema

 kaya kaibigan, kung hindi mo na kinakaya,

nandito lang ako, kakayanin nating dalawa

kung pakiramdam mong ika'y nag-iisa

nagkakamali ka dahil sa'kin, may kasangga ka.