#personal documentation

في فترة ما في حياتي، لما كنت محاوطة نفسي بأشخاص معينة، كان عندي شعور قوي إني ناقصني حاجات عشان أقدر أتناسب وأتماشى معاهم وإلا هبقى طراز قديم. فا كنت بدعي بالحاجات دي، وبفرُك بطرق مختلفة عشان اوصل ليها ومتجيش، وموصلش. وبعد فترة، لما ربنا أراد إننا نقف عند مفترق طرق وكل واحد يمشي من طريق، أكتشفت إن كل الحاجات اللي كنت بفرُك عشانها مطلعتش هي الأساس ولا حتى من اولوياتي وإنها كانت شر عشان لو كانت جاتلي في ساعتها مكنتش هستخدمها صح. وبعدها فعلًا مبقاش عندي (حرارة الرغبة) فيها؛ لو ربنا رزقني بيها فأكيد هتبقى حاجة حلوة، ولو ماجتش فا أنا مش متضرّرة وعايشة عادي.

• وأنا راكبة الميكروباص حصل لفتة لطيفة للغاية، بنت بكل شجاعة قالت للسواق "ياسطى لو سمحت، فيه حد بيشرب سجاير" وهو احترم ده وكان له رد فعل.

• امبارح بعتو إن الدكتور دخلت لجروپ ولقت عددهم قليل فإدتهم بونص ٥ درجات، النهاردة الرووم كانت مليانة على آخرها، والدكتور اتأخرت، فلما جت، قالت أنا إديتهم امبارح ٥ درجات بس عشان اتأخرت فا هديكم انتو ٧ ولوهلة الرووم بقت عبارة تصفيق وتهليل وصفّارات وضحك وإنشكاح :D والدكتور باين عليها طيبة جدًا ولطيفة جدًا جدًا

• دي واحدة من الأيام اللي بقول فيها إني بكره التيكستينج وبجد صعوبة في التعامل مع شخصيات معينة رغم إننا في الواقع صحاب وقريبين عادي!

23:44 on the clock