#papiagyu

Nabitin ba kayo noong huling beses dahil di namin pinakilala ng husto si Papi? Puwes, ito na ang pinakahihintay niyong introduksyon!

Ngunit bago ang lahat, dapat niyong malaman na hindi kami magnonobela tungkol kay Papi (kahit gustong-gusto namin) dahil sa panahon ngayon, hindi na masyadong nagbabasa ang mga kabataan kapag lumampas na ng isang daan at apatnapu ang bilang ng titik. Tiyak na mabilis na ngang mawalan ng pokus at atensyon ang mga kabataan ngayon!

Sa halip, narito ang pitong (7) dahilan kung bakit namin mahal na mahal si Papi:

Tatlong beses siyang nagapi at namatay, ngunit di nagtagal ay nabuhay muli! Talagang walang sinabi ang mga epal sa buhay ni Papi! Basahin dito ang buong kwento!

Siya ang may pinaka maraming pangalan dito sa Nalandangan: Datu Lungba, Yungba-en, Yungbe-en, Salagyaen, Lumalu-lumalanday, Mendayawi te Yandang, Dig Dagatun Mayungba, Digdag-en Masalagya, Pinalangga te Yandeng, Makagwas Dig Dagatun, at Begyasan teg Libalan! Diba't nakaka-aliw?

May taglay siya na sobrenatural na lakas. Laking pasalamat talaga sa kanya at nailigtas niya tayo!

Si Agyu ay isang one-man army! Susko, kung hindi dahil sa kanya eh hindi sana tayo nanalo laban sa mga taga-Sagilan!

Tatay siya ng isa pang dakilang bayani dito sa Nalandangan—si Minayun! Basahin dito ang kuwento ng batang magaling!

Noong nilunok kami lahat ni Namanding, si Agyu ay naglakbay para hanapin kami. Minalas lang siya dahil sa nangyari sa kanya. 

May mahiwaga siyang singsing at kalasag na kanyang inuutusan at tumutulong sa paglaban. Parang James Bond ng Nalandangan si Papi!  

Alam niyo na ba? Masayang-masaya ang buong Nalandangan ngayong araw na ‘to dahil sa wakas, maayos na ulit ang bayan (nako, mabuti naman). Yehey! Sa sobrang saya namin, gumawa kami ngayon ng fansite na siyang magiging inyong pangunahing sanggunian para sa lahat ng gusto niyong malaman tungkol kay... walang iba kundi kay Papi Agyu!!!

Bakit ba kami gumagawa ng blog? Unang una, ito'y dahil nais naming  ibahagi sa lahat ng mamamayan ang kwento ni Papi! Bukas sa lahat ng tao ang blog na ito at wikang pang-masa ang aming ginagamit--taglay ng komyunalidad ng mga epiko namin dito. Ang kwento ni Papi ay karapat-dapat alamin ng lahat sapagkat kwento rin ito ng bayan mismo! Para sa buong komyunidad ang blog na ito at sa ganitong paraan,  inaasahan namin na lumaganap ang mga kuwento ni Papi, lalo na sa inyong mga nagbabasa ngayon! 

Aba’y h’wag niyong sasabihing di niyo pa pala kilala si Papi? Aber, buti naman at napadaan kayo dito. Kung hindi niyo pa kasi nalalaman, marami siyang ginawa na talagang nakitaan namin ng pagpapamalas ng angking galing at tapang! Oh siya na nga, at abangan niyo na  lang aming unang artikulo tungkol kay Papi! Sa ngayon, libangin niyo muna ang sarili niyo sa ilang mga litrato ni Agyu. Huwag kalimutang gumamit ng tisyu kung sakali mang maglaway!