#livingchronicles

Minsan sa aking pag-uwi ay naisipan kong kunin ang aking cellphone at isaksak sa butas ang earphones nito. Pinili kong mapakinggang muli ang kanta ng bandang The Fray na may pamagat na "Look After You". 

Sa pagsisimula ng kanta ay nabatid ko na mahirap pigilan ang aking sarili sa paggunita ng ilang magagandang alaala at ang kaakibat nitong hindi mawaring pakiramdam. 

Naalala ko ang bus nang kinanta ang koro. Hindi lang ang bus kundi maging ang nadaanan ng bus. Naalala ko ang mga puno sa bawat daan, ang mga malalawak na taniman ng palay o mais, ang mga madamong kabundukan, ang mga matatangkad na poste ng kuryente, ang mahabang tulay at ang ilog sa ibaba nito, ang maulap na panahon at ikaw. 

Naalala ko ang pagkakataong nakaupo ka sa harap at ako ay nasa iyong likuran. Naalala ko ang iyong mga kamay na inilagay mo sa likuran ng iyong upuan na para bang sinasabihan ako na hawakan ko ang mga ito. 

Nais kong gawin. Pero hindi ko ginawa.