SOLUSYONG MEDIKAL PARA SA KRISIS PANGKALUSUGAN!
Ang hinihingi ng taumbayan ay mass testing, hindi mass arresting! Utang nang utang ang administrasyong Duterte, ngunit ang pondo... saan ba napupunta?
Bakit pinapabayaan ang mga healthcare workers? Bakit bili nang bili ng armas at handang pumatay ang estado ng ordinaryong mamamayan? Bakit ang bilis-bilis ipa-shut down ang isang network na makatutulong sana sa paglaganap ng balita? Bakit ikinulong ang mga tsuper na nananawagan na magbalik ng pasada? Bakit hinuhuli ang mga nagpoprotesta, kahit na walang quarantine violations? Bakit pinush pa rin ang online classes kahit maraming estudyante at guro na hindi handa? Bakit maraming Pilipinong nanghihingi ng piso para sa laptop, sa tuition, sa gamot, sa pagkain? Bakit pasaway ang tingin sa mga Pilipinong sumusunod naman sa batas (hal. pagsuot ng face mask, pagpraktis ng social distancing)? Bakit handa ang gobyerno na tawagin ang lahat ng mga kritiko na komunista o NPA, at i-justify ang pagpatay sa mga aktibista? Bakit maraming nawalan ng trabaho’t walang makain, pero sinasabi ng iba na biyaya raw ang pandemya, na masarap daw mabuhay?
Sanga-sanga ang mga problema na kinakaharap nating mga Pilipino. Mga problemang hindi masosolusyunan ng crushed dolomite sa Maynila (na nagkakahalagang P300 milyones)! Konektado itong lahat! At sumosobra na ang mga karahasan at paglabag sa karapatang pantao sa ilalim ng administrasyon ni Duterte!
Hanggat militaristiko ang pagtugon ng gobyerno sa pandemya, hinding-hindi talaga ito maaayos! Kailangan ng makatao na polisiya, at katarungan para sa lahat ng mga biktima!
