#jailavakusha

టెన్షన్ పడుతున్నమహేష్ బాబు ఈ మధ్య కాలంలో డిజిటల్ మీడియా ప్రభావం సినిమాల మీద బాగా పడుతోంది. పెద్ద సినిమాల టీజర్లు, ట్రైలర్లు విడుదలకు ముందే సోషల్ మీడియాలో ప్రత్యక్షమవుతున్నాయి. దీంతో దర్శకనిర్మాతలు చాలా ఇబ్బందులను ఎదుర్కొంటున్నారు. తాజాగా ఎన్టీఆర్ నటిస్తోన్న 'జై లవకుశ' సినిమా టీజర్ ను కూడా కొందరు ఆకతాయిలు ఆన్ లైన్ లో రిలీజ్ చేశారు. ఈ విషయం అటు చిత్రబృందంతో పాటు ఇటు నందమూరి అభిమానులకు సైతం షాక్ తగిలేలా చేసింది. దీంతో నిర్మాత కల్యాణ్ రామ్ పోలీస్ స్టేషన్ లో కంప్లైంట్ చేశారు. ఇప్పుడు ఈ ఎఫెక్ట్ మహేష్ బాబు 'స్పైడర్' సినిమాపై ఎక్కడ పడుతుందా..? అని ఆందోళన చెందుతున్నారు. ఇప్పటికే ఈ సినిమాకు సంబంధించి ఒక టీజర్ ను విడుదల చేశారు. ఇప్పుడు జులై రెండో వారంలో మరో టీజర్ ను విడుదల చేయాలనుకుంటున్నారు. అయితే వారు అనుకున్నదానికంటే ముందుగానే టీజర్ బయటకు వస్తుందేమో అనే టెన్షన్ మేకర్స్ ను పట్టిపీడిస్తుంది. అలా గనుక జరిగితే సినిమాపై హైప్ తగ్గుతుందని భయపడుతున్నారు. పైగా ఈసారి సెకండ్ టీజర్ లో సినిమా కంటెంట్ ను చూపించే ప్రయత్నం చేస్తున్నారని సమాచారం. కాబట్టి ఈ టీజర్ సినిమాకు చాలా ముఖ్యమని తెలుస్తోంది. ఈ టీజర్ గనుక ముందుగానే విడుదలైతే దాని ప్రభావం ఖచ్చితంగా రిజల్ట్ మీద పడుతుందని భావిస్తున్నారు. ప్రస్తుతం టీజర్ ఎడిటింగ్ స్టేజ్ లో ఉంది. చెన్నైలో ఈ టీజర్ ఎడిటింగ్ వర్క్స్ జరుగుతున్నాయి. ఎడిటింగ్ రూమ్ లోకి దర్శకనిర్మాతలు, హీరో, మరో ఇద్దరు, ముగ్గురు కీలకవ్యక్తులను తప్ప ఎవరినీ అనుమతించకుండా.. ఎన్నో జాగ్రత్తలు తీసుకుంటున్నారు. మరి ఈ టీజర్ ప్రేక్షకులను ఎంతవరకు కట్టిపడేస్తుందో.. చూడాలి!