karachi, teray naam
tujh se naraz nahi ab.
iss adam aitmaadi main rehne ke baad tu bilkul apne jesa lagta hai.
Ab ehsaas hota hai jese tu ne khud pala hai mujhe. apni agosh main bitha ke jeena sekhaya. wou sab diya jou terey paas tha. karachi, tujh se itna la-ilm kab se thi ye maloum nahi.
tujhe bhi apnoun ne chorra. tuney bhi apna aap gunwa diya. karachi, tujhe bhi apnoun ne khokhla kia. tujhe uppar ley ke aye, aur phir saath chorr diya. karachi, tuney bhi khud apna sahara banna seekha. aur phir mujhe sekhaya. iss mitti main qadam rakhtey hi tuney ajeeb dost milwaye. phir unhey bhulwaya. phir wapis milwaya. aur ab gunwaya. koi nahi, Karachi, sab le lou mujhse. sab ehsasaat le lou. mera dil le lou. karachi, raat ke shorr main tuney rona sikhaya. teri hawaein sahara banni. karachi tu ne dost diye, liye, yaadein bhi le lein, acha kia. mujhse kahan paali jaani thein ye tamaam baatein? karachi, maut ke moun main jaa ke nikalna bhi tuney sikhaya. karachi tuney wou sab diya jou terey paas tha. tujhe bhi jaldi apne paoun pe kharra hona parra, tujhe bhi saaloun saal zeest ki nichli sat'ha dekhni parri, tujhe khud ka khayal rakhna parra. tujhe bhi hans ke bharrna parra, apni paak zameen kou khud paak karna parra. apne aap pe yaqeen, apni awaaz pe labaik kehna parra, apne bu't khud giraney parey, apney ansoun khud ponchnay parrey. karachi, tu ne insaan banna sikhaya.
