#frettatiminn

Heiða Rún verður Stella Blómkvist

Ástfangin upp fyrir haus eltir hún ævintýrin til Bandaríkjanna

Hefur nýtt líf í Bandaríkjunum

Heiða Rún Sigurðardóttir, sem slegið hefur í gegn í búningadramanu Poldark, mun leika Stellu Blómkvist í nýjum þáttum. Hún er ástfangin upp fyrir haus og er að flytja til Bandaríkjanna – að elta ástina og freista gæfunnar.

Ég býst við því að sú Stella sem þú ert búin að sjá fyrir þér í huganum sé allt öðruvísi en Stella sem kemur til með að birtast á skjánum,“segir leikkonan Heiða Rún Sigurðardóttir, eða Heida Reed eins og hún kallar sig úti í löndum. Mynd | Saga Sig Hún kemur til með að leika hina einu sönnu Stellu Blómkvist í þáttum sem Sagafilm framleiðir um lögmanninn skelegga sem leysir dularfullar ráðgátur og lifir gjarnan á ystu nöf. Hélt hún fengi ekki hlutverkið Þættirnir eru byggðir á bókum eftir hulduhöfund sem ber sama nafn og söguhetjan og ýmsar getgátur hafa verið uppi um hver hann sé í raun og veru. Því hefur hins vegar aldrei verið ljóstrað upp og Heiða býst ekki við því að það breytist með gerð þáttanna. „Það er fólk sem veit hver höfundurinn er, en það fólk er ekki að fara að segja neitt. Ég veit það ekki sjálf og held að ég fái ekki að vita það. Það breytir engu fyrir mig, en ég er auðvitað forvitin,“segir hún og skellir upp úr. „Við erum auðvitað með handritshöfund sem er okkar maður og ég get talað við hann um hvernig Stellan hans er. Það er Stellan mín.“Það er Óskar Thor Axelsson sem leikstýrir þáttunum en tökur hefjast í apríl. „Þeir ætla að ýkja Stellu aðeins. Ég er sjálf að rétt að byrja að lesa bækurnar, en ég þarf að muna að hún verður ekki alveg eins og í bókunum. Þetta leggst annars rosalega vel í mig. Ég kom heim í stutt stopp til að hitta þá sem standa að þessu hjá Sagafilm og byrjaði allt í einu að verða rosalega spennt fyrir þessu.“ Það er ár síðan Heiða fékk handritið fyrst í hendurnar og þá var hún fyrsta leikkonan sem framleiðendur þáttanna hittu. En það leið svo langur tími þangað til eitthvað meira gerðist að hún var orðin sannfærð um að hún fengi ekki hlutverkið. „Ég var ekki alveg að finna rétta taktinn í fyrstu en svo bað ég Óskar leikstjóra um einhverja punkta og fékk að taka upp annað vídeó í London. Ég vann aðeins í Stellu og þá gekk þetta upp og ég fékk hlutverkið, sem kom skemmtilega á óvart.“ Ástfangin og flytur til LA Það eru annars töluverðar breytingar að eiga sér stað í lífi Heiðu á nýju ári. Hún hefur búið í London í tíu ár en stefnir á flutninga til Los Angeles í Bandaríkjunum innan tíðar. Hún hefur verið í sambandi með bandarískum manni í tæpt ár og þau ætla að hefja sambúð í borg englanna á næstu mánuðum. „Þetta er svo sannarlega ár breytinga hjá mér. Allt mjög spennandi,“segir Heiða og viðurkennir að það hafi vissulega haft sín áhrif í ákvarðanatökunni að kærastinn sé bandarískur. „Það er auðvitað helsta ástæðan fyrir því að ég er að flytja þangað, en þar fyrir utan er þetta staður sem er ekki vitlaust fyrir leikara að heimsækja. Það stóð alltaf til hjá mér að prófa þetta einhvern tíma, þó það hafi ekki endilega staðið til að flytja þangað. Ég held samt að við munum ekkert endilega setjast að í LA. Við ætlum bara að sjá til næstu árin hvernig þetta verður. Ég er til dæmis ekki viss um að ég vilji vera með fjölskyldu þar. Þetta er akkúrat staður sem maður prófar að búa á áður en maður eignast fjölskyldu.“ Heiða og kærastinn kynntust í gegnum sameiginlega vini fyrir tæpu ári. „Þetta hefur gerst ansi hratt hjá okkur,“segir Heiða og verður hálf feimin þegar blaðamaður forvitnast um sambandið. Hann er framleiðandi og rithöfundur og þau eru ástfangin upp fyrir haus. „Við erum mjög ánægð með sambandið okkar eins og það er, og erum afslöppuð varðandi framtíðina. En þegar maður er með manneskju sem mann langar að eyða ævinni með þá hugsar maður ýmislegt. Við erum samt tiltölulega nýbúin að kynnast og maður veit ekki hvað framtíðin ber í skauti sér.“ Skilja ekki hvernig hún er á lífi Parið hefur tæknilega séð aldrei búið saman áður, þó þau hafi vissulega eytt töluverðum tíma saman og dvalið mikið heima hjá hvort öðru. Hún óttast ekki að óvæntir lestir eða skrýtnar venjur komi í ljós þegar kemur að því að flytja inn saman. „Þegar við erum hjá hvort öðru þá erum við alltaf saman. Ég var rosalega mikið úti í sumar og það var eiginlega eins og við byggjum saman. Mér finnst því alveg komin reynsla á sambúðina. Ég þreif alla íbúðina hjá honum og er búin að segja honum hverju ég er ekki hrifin af, og öfugt. Ég þoli til dæmis ekki blaut handklæði og hann verður að búa um rúmið. Við erum búin að læra inn á þessa hluti hjá hvort öðru,“segir hún hlæjandi. „Við erum bæði mjög skilningsrík við hvort annað sem er mikill kostur.“ En þó Heiða þoli ekki blaut handklæði og vilji hafa rúmið umbúið þá segist hún alls ekki vera skipulögð manneskja og með allt á hreinu – þvert á móti. „Ég er mjög utan við mig og er þekkt fyrir það. Vinir mínir eru oft í því að passa upp á mig og skilja stundum ekki hvernig ég er ennþá á lífi.“Hún segist þó vera með allt sitt á hreinu þegar kemur að starfinu. Það sé einhvern veginn allt öðruvísi. En Heiða hefur meðal annars slegið í gegn í búningadramaþáttunum Poldark sem sýndir hafa verið á RÚV og Íslendingar kannast því vel við. Tökur standa nú yfir á þriðju seríu þáttanna en svo taka við ný verkefni. Það leggst vel í Heiðu að flytja til Bandaríkjanna. „Ég hlakka til að búa einhvers staðar þar sem er alltaf gott veður og rosalega góður matur. Kærastinn minn er frá San Fransisco og við höfum ferðast mikið saman um Kaliforníu. Mér finnst hún alveg yndisleg. Það er mjög ljóðrænt að hugsa til þess að ég sé búin að vera í tíu ár í London og hafi tekið minn tíma þar. En nú sé að hefjast nýr kafli með annarri manneskju,“segir hún einlæg. Fyrirsætustarfið hundleiðinlegt Heiða var aðeins 15 ára gömul þegar hún hóf að starfa sem fyrirsæta hérna heima, en skömmu síðar var hún komin út í heim og ferðaðist heimsálfa á milli vegna verkefna. Hún dvaldi meðal annars mikið á Indlandi og ferðaðist þaðan um Asíu og Mið-Austurlönd. „Þetta var eitthvað öðruvísi, en í sannleika sagt þá hafði ég aldrei mikinn áhuga á fyrirsætustarfinu. Mér fannst það eiginlega hundleiðinlegt og ekki nógu skapandi. Það voru allir aðrir að skapa í kringum mig. Mér finnst miklu skemmtilegra að fara í myndatöku núna sem leikkona. En það var mjög gaman að fá að ferðast og það átti stærstan þátt í því af hverju ég var að þessu.“ Draumurinn var að starfa við eitthvað meira skapandi eins og dans eða leiklist og leiklistin varð ofan á. Um tvítugt flutti hún til London þar sem ætlunin var að læra leiklist. „Ég var ekki komin inn í neitt nám. Ég byrjaði bara að vinna í búð og starfaði aðeins sem fyrirsæta. Sjö, átta mánuðum síðar komst ég svo inn í rosa góðan skóla.“Hún viðurkennir að það hafi í fyrstu verið svolítið hark að vera leikkona í London. „Ég þurfti alveg að vinna með leikarastarfinu þangað til fyrir þremur árum. Ég fékk alltaf eitthvað og var oft heppin, en það dugði ekki til að framfleyta mér. Ég vann því oft á veitingastöðum og búðum, eins og flestir vina minna gerðu líka og margir gera ennþá. Mér fannst ég alltaf mjög heppin þegar ég þurfti þess ekki.“ Háskólapróf án stúdentsprófs Heiða er fædd og uppalin í Seljahverfinu í Breiðholtinu, gekk í grunnskóla þar og fór svo í Fjölbrautaskólann í Breiðholti. Hana langaði samt í MH en komst ekki inn því hún var ekki með nógu góðar einkunnir í stærðfræði. „En hver veit, ef ég hefði komist inn í MH þá hefði lífið kannski þróast allt öðruvísi. Ég fann mig aldrei beint í FB og var alltaf að skipta um braut.“ Skömmu eftir að hún skipti af tungumálabraut yfir á myndlistarbraut bauðst henni tækifæri til að fara til Indlands að sinna fyrirsætustörfum. Hún kláraði því aldrei stúdentsprófið. „Ég fékk að heyra hryllingssögur að ég yrði að vera með stúdentspróf til að komast inn í eitthvert nám og ég var mjög hrædd um að mér yrði neitað um inngöngu í leiklistarskóla í London á þeim forsendum. En það skipti svo engu máli. Þannig ég er með háskólapróf en ekki stúdentspróf,“segir Heiða sem var ekki spennt fyrir því að læra leiklist á Íslandi. Hún vildi reyna fyrir sér á stærra sviði, læra á ensku og opna fleiri dyr. Sem hún hefur svo sannarlega gert.