#eulogy4me

Sa ilang taong namalagi ako sa mundong ito,

Aaminin ko marami akong natanggap na regalo,

Pero kahit gaano karami pa ang mga ito,

Kayo at kayo pa rin ang aking paborito.

Hindi ko na alam kung paano tayo nagsimula,

Hindi ko na maalala kung saan tayo unang nagkasama,

Nakakainis naman, lahat na lang hindi ko alam,

Pasensya na ha, sana ako’y iyong maintindihan.

Sa aking biglaang paglisan, ako sana’y mapatawad mo,

Hindi ko rin naman nais na umalis sa tabi mo,

Kung may kakayahan lang akong pigilan ito ay gagawin ko,

Lalo pa’t marami pa kong hindi nasasabi sayo.

Patawarin mo ako kung hindi ako naging tapat sayo,

Natatakot kasi akong malaman mo ang aking mga sikreto,

Dahil baka maging sanhi ito ng paglayo mo,

at baka saakin ay magbago ang tingin mo.

Patawarin mo ako kung hindi kita nabigyan ng mga pangaral sa tuwing may problema ka,

Ayaw ko kasing isipin mo na pinangungunahan kita,

Kaya’t dalawang tenga na lang ang inilalaan ko,

Para maibsan ang problemang dala-dala mo.

Patawarin mo ako kung hindi kita nasabihan ng mga salitang makapagpapagaan sa loob mo,

Tuwing tumatangis ka sa harap ko,

Tanging kapirasong tela ang naiaabot ko,

Kaakibat ang dalawang brasong, yumayapos sa kalungkutan mo.

Patawarin mo ako kung hindi ko nasabi sayo ang mga salitang, “Mahal Kita”.

Dahil duwag ako at sadyang nahihiya,

Pero sana ay naramdaman mo ang pagmamahal ko,

Sa mga simpleng bagay na ginagawa ko para sayo.

Ngayon kaibigan, pwede ba akong humiling?

Pwede bang ikaw ang maghatid ng aking huling habilin?

Sana ay walang tatangis sa aking libing,

Dahil gusto ko ay Masaya tayo sa huling araw na kayo ay aking kapiling.

Salamat sa mga ala-alang ibinigay ninyo,

Sa aking paglalakbay ito ang baon ko

Wag kayong mag-alala babantayan ko kayo