#chibear

Yeah Chi? She needs the belly rubs. You honestly don’t know how often I find her waiting like this. #chibear #chi #chihiro #yeg #bellyrubs #yegpets #blackcat

Guess which sound is produced by me (Chi Bear) hehe

是咁的，Chi Bear 我今日雅興所至，搬左去荃灣咁耐，打算番去兒時成長既地方 － 土瓜灣，搵番我住果棵樹。 眼見盞紅綠燈「明明綠燈轉眼變成紅燈」，好彩多得民x聯「成功爭取」綠燈多左兩秒，我咁腳短先至可以追倒上架開去土瓜灣既紅Van。 快步登上有「平民版林寶堅尼」之稱既紅Van，拎住杯Starducks 咖啡，扮一扮堅尼地城既中產。Well，話曬我都係ABC （Australia-born Chi ）bear 黎架嗎。 一開始都無咩野，一上高速公路就知中大伏 － 我太睇小「平民版林寶堅尼」既威力啦！！！ 睇住個計速器由係荃灣時候既60，高速攀升至80，加埋個「嗶嗶嗶」既超速聲背景音樂， 同聽倒某高官話自己地位超然一樣，真係嚇到我個心離一離。「林寶」 由80 加到95，我既心跳就由80 跳到220。Chi Bear 我真係想同司機大佬講，可唔可以慢D呀 － 當然，我無講到出口，你懂的－你講出口，你係阻緊一個專業賽車手搵食，正所謂斷人衣食尤如殺人父母，我夠膽開口，佢係肯肯定夠膽問候我父母。所以同車沉默的香港人只會繼續沉默落去 － 唯有聽住關菊英既「講不出聲」，睇住賽車手既表演。 話佢地係專業賽車手係一D都無錯，睇住司機大佬係群車中左串右插，我既感覺係「來回地獄又折返人間」。係地獄既時候，諗住綁番個安全帶 － Sorry，係無既；想Hold實個扶手－ Sorry，係鬆既。 到番市區，終於折返人間，可以睇一睇窗外風景，只見廣告處處，最明顯既莫過於補習名師既廣告。但Chi Bear 有啲野唔明，呢個又話佢根據ABC 公司既調查，學生人數第一；果個又話佢根據XYZ公司既調查，學生人數第一，咁邊個先係呀？？！！真係好困擾。最困擾既係，究竟某中文名師完左約之後會唔會過檔呢，過左檔佢由一個月可以買倒一部真。林寶堅尼變成一個月買倒兩部真。林寶堅尼。雖然香港地唔係個個有資格講夢想，但醬爆有一個成為偉大作曲家既夢想，我Chi Bear 又何嘗唔想成為一個補習名師丫。。。 終於到左土瓜灣，因為起緊沙中線，啲路開始窄，打算打開窗去零距離接觸呢個成長既地方 ，點知又係中大伏！雖然未到滾滾黃沙既地步，但近地盆既空氣真係差到唔講得笑。一落車，見倒一條條寫住「田x」、「新x基」既橫額，原來佢地已經係土瓜灣收左好多樓。Chi Bear 又有野唔明啦，究竟地鐵起好左，對居民方便左定係地產商另一次收割肥田既機會呢？ 行兩條街，終於黎到細細個成日幫襯既雞蛋仔婆婆果度。 未同佢打招呼，佢已經摸住我個頭，一路笑一路講：「哈哈，樹熊仔，咁耐都唔番黎探雞蛋仔婆婆既？你又話減肥既，做咩脹左咁多」 我摸一摸自己比細個脹左5個碼既肚腩：「我。。。會減架啦！」 「減咩丫，黎，請你食舊雞蛋仔啦。沙中線起緊，又加租啦，我做埋呢個月就唔做啦，真係圍唔倒皮。」 「下 ⋯⋯ 你啲雞蛋仔咁好味，真係唔做？」同旺角豪大大旁邊果間有朱古力味，芝麻味，紅豆味。。好多唔同味果間雞蛋仔鋪唔同，雞蛋仔婆婆賣既雞蛋仔淨係得兩種味，一種係原味，另外一種係舊區小店既人情味。 同婆婆傾多左陣就出發去搵細個住果棵樹，行到去，先發現樹已經無曬，成個公園變左擺地鐵建築物料既儲存地方。般咸道棵百年古樹，政府係斬之前三十分鐘send左個email比區議員通知一聲。或者係呢個被人遣忘既舊區，發展才是硬道理 － 阻住既樹斬曬佢，阻住既古蹟搬走曬佢。 咁，成個香港呢？一百年後，歷史書上又會否將香港評價成一個「扭曲得變形，窮得只剩下錢」既城市呢？

點解Chi Bear 係 Chi Bear? 從前有隻樹熊，佢係香港出世，學左tree gun級既英文。佢覺得自己應該改返個英文名，於是叫自己做Chi Bear. (其實佢係咪想講Tree Bear！ ?）

Our Chi Bear series is going to be launched~!