Papaano kaya kung sa t'wing ang isang tao'y maliligo, naglalaho ang bawat sakit na kaniyang naramdaman kalakip ang ala-alang nagdulot nito kasabay ng pagkatanggal ng dumi sa katawan? Hindi naman isang biglaan, kundi, unti-unti ang proseso. Sumasabay sa pagbanlaw ng mga bula dulot ng shampoo sa buhok? O kasabay ng paghilamos, ng pagkatanggal ng muta't mantika sa mukha. Kasabay ng bawat pagmumog, bawat tingang naalis ng pagsisipilyo. Kung kaya't pagkatapos mong maligo, sariwa ang pakiramdam mo--hindi lamang sa pisikal na aspekto kundi sa iyong buong pagkatao.