#brewedthoughts

                Sa isang pagkakataon, kahit pilit mong pigilan, kusa itong mangyayari. Totoong lahat ng kababaihan sa inyong eskwelahan ay nahuhumaling sa kanya. Kahit anong tanggi mo na hindi ka nila katulad ay hindi kailanman magsisinungaling ang puso mo. Sige nga, paano mo ipapaliwanag ang sayang nararamdaman mo tuwing nakikita mo siya? Bakit ka kinakabahan kapag malapit siya sa iyo at bakit ka malungkot kapag hindi mo  siya nakikita?

                Unti-unting nagbago ang kinasanayan mong mundo. Bawat isa dito ay balikwas sa dating takbo ng buhay mo. Higit sa lahat, hindi mo maintindihan kung ano na nga ba ang nangyayari sa iyo. Ang bawat pagdagundong ng iyong puso, ang bawat kaba at panlalamig kapag napapalapit ka sa kanya ay naging palaisipan sa iyo. Adik ka ba? Kung ayaw mo pang maniwala, marahil ay abnormal ka nga. Mga senyales iyan na umiibig ka. Posible ba iyon? Oo naman. Simple lang ang mga sagot sa katanungan mo. Ang mga ngiti sa iyong labi ang nagpapatunay na masaya ka sa nararamdaman mo. Siya ang nagdudulot ng kaunting kasiyahan sa boring mong mundo. Tanggapin mo ng buong puso.

                O sige, mahal mo na kung mahal. Natuto kang magmahal kahit malayuan lang. Pero hinay-hinay lang dahil baka masaktan ka kapag ika’y madapa. “Take your time,” sabi nga nila. Minsan kasi sumosobra ka naman. Biruin mo ba naman na gampanan mo ang buhay stalker. Sa bawat pagkakataon na mayroon ay sinusungaban mo. Makita mo lang siya ay heaven na agad ang ambience mo. Sa araw-araw ay naging routine mo ang makipagtaguan sa kaniya. Ikaw ang taya at ang eskwelahan ang playground ninyo. Sa break, lunch at maging sa uwian ay hindi mo pinalampas na siya ay makita.

                Nakuntento ka na sa ganoong set-up. Sapat na sa iyo ang  tumingin, mag-abang at umasa. Hindi mo kasi kayang aminin na katulad ka din nila, na mayroon ka ring pagtingin at sa sulok ng iyong puso ay naghahangad ka ng atensyon mula sa kanya. Ang kaibahan lang nila sa iyo ay malaya  nilang naipaparating ang kanilang nararamdaman. Samantalang ikaw, takot ka na malaman nila at lalo niya. Ano ka ba naman kumpara sa kaniya? Sikat siya sa buong eskwelahan kabaligtaran sa iyo na ni hindi man lamang kilala sa loob ng klasrum. Marami siyang kaibigan habang ikaw ay mabibilang lamang sa daliri. Malaki ang pagkakaiba ninyo kaya’t nakuntento ka na lamang sa pagsulyap at pagtanaw sa kaniya.

                Paulit-ulit ang naging schedule mo. Mula sa pasukan hanggang sa uwian. Minsan, bigla mo na lang naramdaman na nagiging ordinaryo na lang ang lahat. Hindi na mabilis ang bawat pagtibok ng iyong puso. Nawala na rin ang kaba at kakaibang kasiyahan. Nakakauwi ka na rin kahit pa hindi mo siya nakita buong araw. Nasabi mo na lang sa sarili mo na marahil hindi mo naman talaga siya minahal kundi isang paghanga lamang. Marahil ay natutunan mo ng tanggapin na magkaiba kayo ng mundong ginagalawan at kahit kailan ay hindi kayo magtatagpo. Marahil napagod ka ng umasa at mangarap. Ito ang pinaniwalaan mo hanggang sa nakapagtapos kayo at tuluyang nagkahiwalay ng landas. Mula noon, tinanggap mo sa iyong sarili na mananatili na lang siyang isang pangarap. Ngunit huwag kang magpakasiguro. Malikot ang tadhana. Pilyo. Kung kalian hindi mo inaasahan saka ito gagawa ng paraan upang guluhin ang mundong akala mong bumalik na sa pagiging payapa.

                Unang araw mo sa iyong trabaho at isang di inaasahang tao ang iyong nakatagpo. Muli kayong nagkita makalipas ang ilang taon. Sa hindi inaasahang pagkakataon ay naging malapit kayo sa isa’t-isa. Palibhasa ay parehas ang eskwela ninyo noong high school. Madalas kayong magkasabay tuwing breaks at uwian. Nagpapalitan kayo ng text messages at nag-uusap sa telepono. Kung tutuusin, buong araw na kayong magkasama sa opisina ngunit hindi pa rin kayo nauubusan ng mapag-uusapan. Ang weird no? Dahil lahat ng nararanasan mo ngayon ay mga tagpong inaasam mo noon.

                Naging mas malapit pa kayo at naging mag-bestfriend. Naging takbuhan ninyo ang bawat isa sa oras ng kasiyahan maging sa kalungkutan. Naipon ang bawat tawa at iyak sa inyong pagkakaibigan. Isang araw ay problemado siyang tumawag sa iyo. Humihingi siya ng ideya sa mga bagay na tipo ng isang babae. Manliligaw daw kasi siya at gusto niyang maging perpekto ang lahat. Ano daw ba ang magandang bulaklak, tsokolate at romantikong lugar para sa kanyang “perfect date.” Full effort mo namang sinagot ang lahat. Masaya ka dahil sa wakas ay nakita na ni bespren ang taong hinihintay niya pero bakit parang may bahid kang lungkot? Doon mo naramdaman ang selos. Selos dahil ba may iba ng pagtutuunan ng pansin ang bespren mo o dahil sa ninais mong ikaw na lang sana ang babaing iyon? Pinilit mong imbahin ang damdaming pilit na kumakawala. Mas pinili mong manahimik dahil ayaw mong maging sagabal sa kanyang diskarte.

                Humirit pang muli si bespren. Nagpapasama siya sa iyo sa kanyang perfect date. Moral support daw at isa pa gusto niyang maging parte ka sa pinakimportanteng araw ng kanyang buhay. Eto pa, have your best dress in the closet para naman daw hindi masira ang ambiance. Mokong talaga ‘yun, ‘eh para ka na nga niyang sinampal ng doble pero dahil career mode ka sa pagiging bestfriend, pumayag ka sa hiling niya.

                Kinabukasan, alas otso impunto ng gabi nagulat ka na lang dahil nasa labas ng bahay ninyo si bespren. Nakaramdam ka ng kakaibang pintig sa iyong puso. Muling nanumbalik ang kaba at panlalamig tulad noong nag-aaral pa lang kayo. Kinipkip mo lahat ang iyong damdamin dahil alam mong wala itong maidudulot na mabuti. Teka teka teka lang, tama ba itong nakikita ko? Mukhang bagong car wash ang mokong ah. Espesyal nga talaga pero kakaiba ang aura ni bespren ngayon. Bukod pa doon, kusa niyang binuksan ang pinto ng kotse para sa iyo. Ang weird hindi ba? Kasi dapat si “the one” ang nakaupo doon. Ayon naman sa kanya, kailangan mo daw mauna para matignan mo kung ayos na ang lahat saka niya susunduin si the one.

  ... And I've got all that I need

Right here in the passenger seat

Oh and I can't keep my eyes on the road

Knowing that she's inches from me...

  Kaloka din naman ang background music ano? Parang gumuguwapo yata siya ngayon. Ooops!! Hinay lang ang pagtitig. Baka matunaw iyan. Abusuhin daw ba ang view? Sobrang tahimik talaga ni bespren ngayon. Ubos na ang mga bago mong kwento pero wala pa rin siyang imik. Hypothesis: Naka-silent mode siguro siya.

                Pagdating sa restaurant ay bigla kang kinabahan. Nag-atubili siyang bumaba ng kotse at binuksan ang iyong pinto. Kinuha niya ang iyong kamay at isinukbit sa kanya. Pagdating sa table ay pinaupo ka nito in a gentleman’s way. Iba na sana ang iisipin mo kung hindi niya sinabing: “PRACTICE LANG!” Napahampas ka sa kanya. Hindi dahil sa nakikiride-on ka sa panloloko niya kundi dahil muntik ka na niyang mapaniwala. Nagpaalam na siyang aalis para sunduin si the one. Binilinan ka pa niyang tignan ng mabuti ang lugar baka sakaling mayroon pa siyang nakalimutan. Hindi mo mawari ngunit parang may kung anong sakit kang nararamdaman. Nang mapag-isa ka na ay saka bumalot sa iyo ang malaking panghihinayang.

                Tutulo na sana ang iyong luha ng biglang tumugtog sa harap mo ang tatlong lalaki.

  ... They say it's a man's world 

Well, that cannot be denied 

But what good's a man's world 

  Without a woman by your side , And so i will wait 

Until that moment you decide ...

  Pinilit mong ipaliwanag sa kanila na nagkakamali sila ng taong hinaharana. Ngunit mas napatigil ka nang biglang nagsalita si bespren. Napalingon ka sa kanya at nakita mo siyang hawak ang isang bungkos ng puting rosas. Lumapit siya sa iyo at nagwika:

                “Hindi sila nagkakamali Pren dahil mula noon, iisang babae lang ang nagpatibok ng puso ko. Ang problema ko lang ay hindi ko alam kung paano ko siya lalapitan. Wala akong lakas ng loob noon pero ngayong ibinalik ka sa akin ay ‘di ko na hahayaang mawala kang muli. Ikaw ang the one ko simula pa noon. Maari bang ako na lang din ang maging the one mo?”

Tuluyan nang tumulo ang mga luhang kanina mo pa pinipigilan. Sa unang pagkakataon ay hinayaan mong makawala ang damdaming matagal mo ng tinatago. Hinagkan mo siya at inamin ang totoong itinitibok ng iyong puso. Doon mo napagtanto na hindi naglaho ang pagmamahal mo sa kanya. Natuto itong maghintay at handang magparaya para sa iyong minamahal. Tama ba bespren?Ü

  ...I'm your girl (you're my girl) 

You're my boy (i'm your boy) 

You're my pride 

  I'm your joy 

I'm the sand 

You're the tide 

Be the groom 

I'll be your bride (be my bride)...