#25.05.2008

عدي ١٤ سنة يمكن أاه، لكن معدوش هوا ولا حاجة بالعكس يابابا أنا لسه بحس نفس الأحساس ولسه مش حاسة بالأمان ولا بالبيت ولا إني عندي حد بتاعي أنا زي ما كنت بحس إنك بتاعي أنا لوحدي، لسه طفلة عايزاك تنيمني وبتطبطب عليا وتدخل عليا بحاجات حلوة، عارف بحب أتخيل وانا كبيرة كدا وانت راجع من الشغل بالليل بحاجات حلوة وبنتعشى ونتفرج على فيلم ولا مسلسل ولسه فاكرة الحاجات اللي بتحبها وكل الأغاني وكل كلام قولته قدامي، أنا بتمنى دقيقة بين إيدك ولو كان ليها تمن كنت دفعت عمري وشوفتك دقيقة حضنتك ومسكت إيدك علشان اطمن دقيقة بس، نفسي أرجع مرتاحة ومطمنة نفسي ربنا يديني المشاعر دي علشان أنا متشتتة منغيرها ومنغيرك، كان نفسي تبقى في حياتي وفي يومي في فرحي وزعلي وتهون عليا وتساعدني، أنا متأكدة إني كنت هبقى حد تاني خالص وكانت حياتي هتبقى حياة تانية خالص حاجات هموت عليها ونفسي احس بيها ولو لحظة، الدنيا مبتقفش على حد وبتمشي بس انتَ حياتي اتشقلبت في بُعدك عني ومش عارفة مفكرش فيك لو كنت هنا كنت هبقى عاملة ازاي وحاسة أمان واستقرار وطمئنينة ازاي