النهارده الصبح بعد عياط كتير وأرق ووجع قلب ياما ياما يعني نزلت الساعة 6 ونص أشتري سندوتشات فول وطعمية من المكان اللي كان بيجيبلي منه معاه وهو نازل الصبح. طول الطريق ماشية بعيط وواقفة بقول للراجل الطلب وعينيا مدمعة ومروحة بعيط شلالات. كنت نازلة على أساس دي حاجة هتقربني منه بشكل ما، وأول ما دوقت السندوتش افتكرته وعيطت عشان كان هو اللي بيجيبهولي وقت ما ببقى صاحية. وأنا راجعة كنت عايزة أروح أزوره وأنا قلبي بيتقطع عشان مش مستوعبة يعني ايه ده المكان الوحيد اللي هلاقيه فيه وحتى مش هلاقيه هو دي هتبقى بقاياه تحت التراب، ويعني ايه يبقى قريب كده ومستحيل تمامًا كده. مقدرتش أروح في الآخر عشان خوفت يبقى حد هناك أو يبقى فيه كلاب. جامدة الحياة دي يا أسطى. كسم أفكارك اللي خليتنا هنا ولسه هنا.