الكلام والرد على رسالة بالنسبة لي حِمل، قراءة حاجة أيًا كانت ايه هي بردو حِمل، حتى الأغاني بقيت بحس إن ورايا واجب لازم أخلَّصه. دماغي مبتسكتش ولا لحظة، وكل حاجة في يومي حتى النَفَس وكوباية الشاي بالنسبة لي حاجة مُجبرة عليها ولازم أعملها. لازم آكل عشان مقعش، لازم أستحمى الدنيا صيف، لازم أهتم بنفسي الناس تقول عليا ايه، لازم أخرج صحابي ليهم حق عليا، لازم أعيش الانتحار مؤلم وصعب.

في الكورس اللي باخده حاسة إني أغبى واحدة في الكون، رغم إني مش أغبى واحدة خالص وأنا عارفة ده، بس عشان أمهات ومتجوزين وشغّالين وكبار وصغيرين قادرين يعملوا المطلوب من غير صياح -أو بشوية صياح مش هكدب- وأنا مش قادرة. مش عارفة حتى أعتذر ومليش وش عشان هقوله والله يا باشمهندس اللي بتقوله مش صعب أنا عارفة، واللي بتطلبه مش كتير مفهوم، بس أنا مش قادرة. أنت عارف إن بقالي يومين مباكلش عشان مش قادرة؟ طيب عارف دماغي صوتها عالي قد ايه دلوقتي؟ مش سامعة شرحك حتى، ولما سمعته الجملة اللي قلتها عن نفسك فكرتني باللي مات. معلش، تاخد كام وتسيبني في حالي؟ تاخدي كام يا دنيا وتسيبيني في حالي؟ طيب تاخد كام يا رب وتاخدني؟

Michael Blackwell via IG story [10.7.2024]

July 10, 2024 - Day 21

Durch Wien schwimmen: Obere Alte Donau