#10.5.2025

صديقي بعتلي أطلع أشوف القمر وشاركني صور له كمان، طلعت أشوفه في محاولة إني أسكّت دماغي وأهدأ وبس أشوفه وأتأمله. ايه اللي حصل؟ فضلت بعيط كتير عشان استوعبت إن ده نفس القمر اللي كنت بصوّره وبشاركه مع سارّة، ونفس القمر اللي كنت بعاكس وبناغش بيه، ونفس القمر اللي "صديقتي" القديمة كانت بردو رابطاني به زي صديقي وبتقولي أشوفه، نفس القمر اللي كنت بغنّيله وأنا مبسوطة يا قمر أنا ويّاك، ونفسه اللي كنت ببحلق فيه وفي جماله قبل ما يدخل غيبوبة بيومين وبعدها يموت، ونفس القمر اللي في نفس السما اللي تحتها الناس بتموت أو بتجوع أو بتتقصف، ولما سمعت صرخة عيال من بعيد تخيّلت الصوت مضاعف ألف مرة وسط ضلمة وصواريخ، وايه؟ ضيّ القمر. نفس القمر. طول السنين دي وبكل أحداث حياتي وبكل الحيوات وبكل الناس اللي بتبص على نفس القمر. كان نفسي أقدر أشوف القمر وأتبسط بجماله وبس. مجرد مشاهدة مجرّدة من أي مشاعر غير استشعار الجمال وتأمله. نفسي مبقاش أنا ولو للحظة.