حرية

انا بايبولار نوع تانى ومبتكسفش اعلن عن دا بالمناسبه دا تحدى مبسوط انى عشته وعديته بنجاح وتكيف حلو اوى ، ضيع عليا فى الاول سنين عمر كتير اه بس مضيعش منى حلمى ولا كسرنى وكملت وهزمته والعمر بيتعوض عادى

فيه ملحوظه بس عن البايبولار، مواجهتى للبايبولار خلت الطريق اللى بمشيه انا وحد عشان نوصل لنفس الحاجه عندى عائق دايما فيه اكتر منه، يعنى مثلا امتحان داخلينه انا ودفعتى وكلنا بنذاكر ونجتهد، بس انا بذاكر وبجتهد وانا باخد علاج ياثر علي تركيزى اصلا ونومى مضطرب وافكارى مش سهل التحكم فيها اوقات الضغط وتقلبات المزاج العنيفه قاسيه جدا ودا كله بيحصل وانا ماشى فى طريقى عادى ، مثال حى حصل من اسبوعين كدا ، عملت شوية تحاليل لقيتها مش لطيفه وبعد مالفيت لفه حلوه اكشتفت ان التحاليل دى كدا بسبب علاج كنت باخده بوصفة طبيب من سنه ونص لغاية يوم ماعرفت ، وطبعا قرار دكتورى انى اوقف العلاج فورا وابدا خطة علاج جديده، اكتشفت ان العلاج مش مجرد انه اثر على شوية تحاليل لا دا بياثر عالتركيز والطاقه والكسل والخمول بشكل بشع ولما اخدته مكنش ينفع غير انى اخده عشان اعدى انتكاسه بس كان اامفروض الاقى طريقه وقتها اوقفه بيها وللاسف الدكتور بتاعى وقتها معملش كدا وانا كنت بتهم كل حاجه بتحصلى غريبه في اي حاجه تانيه غير الدوا دا

حاليا بعيش لحظات مش حلوه وبيجيلى كل يوم والتانى panic attacks واضطرابات نوم وعصبيه مفرطه وكل دا بسبب انسحاب العلاج المؤذى دا ، فى وسط دا كله المفروض انى اشتغل واركز مع الناس ف تعاملاتى وارعى ابويا وامى واقابل صحابى ومنعزلش ومبعدش وافضل زي مانا وكل اللى بيحصل بينى وبين نفسى يفضل بينى وبين نفسى ، وبنسبه كبيره بفضل الله بعمل دا بس السؤال هنا .. هل عشان اعمل دا هبذل نفس المجهود اللى بيعمله شخص معندهوش التحدى دا

فخور انى وصلت للى انا فيه في ظل الظروف دي كلها ومكنتش مجرد ظروف مرض بالعكس بعد التخرج قابلت واقع مرير فى سوق الشغل خلتنى اعمل كارير شفت فى سن كبير لمجال تاني من مجالات الهندسه واذاكر واتبهدل عشان اوصل لمكان نفسى فيه ، دي كلها تحديات تخلينى نهاردا اسامح نفسى على شوية التقصير اللى حصلو الفتره اللى فاتت

اول مره اقولها لانى شخص معروف بجلد ذاته، بس فعلا المرادى لازم اسامح نفسى انى معملتش حاجات معينه كان نفسى اعملها السنادى ، بس الظروف كانت اقوى منى ، بالعكس المفروض انى اكافئ نفسى عشان مخسرتش حاجه فى وسط المطحنه دي كلها ومكمل وربنا كارمنى