Memento

June 15, 2015

Sa tumayong nanay at tatay ko, sa nagpalaki sa akin, sa SOBRANG SARAP MAGLUTO, sa nagturo gumabay sa akin upang maging lisensyadong nars ako, sa taong di napagod ipagdasal angkabutihan ng aming kapakanan, sa katabi kong matulog sa loob ng dalawampu’t-isang taon, sa hindi nagsawang magmahal sa aming magkakapatid kahit gaano katigas ang ulo namin, sa isang mabuting tagapagtaguyod ng pamilya, sa taong hindi nauubusan ng ibubuhos na pagmamahal at pag-unawa sa mga taong mahalaga para sa kanya, sa aking diary, bestfriend, kachikahan, foodtrip buddy, sa lola kong kailan man ay hindi ko matutumbasan ang dakilang pagmamahal na inialay sa akin.. SALAMAT.

Matapang mong nilabanan ang iyong karamdaman. Sa kabila ng iyong paghihirap, ng ating mga problemang hinarap, hindi mo kwinestyon ang Diyos, sa halip ay lalo kang nanalig sakanya. Lahat ng mga payo mo’y ‘di ko mallimutan. Lahat ng mga pangaral mong magagamit ko hangang sa pagtanda.

Marami kang natulungan. Marami kang nabigyan ng inspirasyon. Marami kang binagong buhay. Ika nga nila, you have lived a good life. Iba na ngayon, ako na ang magsisilbing nanay at tatay ng aking mga kapatid. Biglaan man ang iyong paglisan, kakayanin namin.. dahil alam kong may tiwala ka sa amin at gagabayan mo pa rin kami mula sa Itaas.